Bakı, 17 avqust, AZƏRTAC

Sərhəd hər bir ölkənin müstəqilliyinin hökm sürdüyü ərazinin bütövlüyünü və toxunulmazlığını göstərir. Bu səbəbdən sərhəd anlayışı hər birimiz üçün əzizdir. Çünki ərazilərimizin sərhədləndiyi yer bizim Vətən torpaqlarımızdır. Bizim Ana Vətənimiz də sərhəddən başlayır. Sərhədi ciddi və etibarlı qorunan Vətən həmişə əzəmətli görünüb. Bu gün qürurla qeyd edə bilərik ki, Azərbaycanın Silahlı Qüvvələri sırasında Dövlət Sərhəd Xidmətinin şəxsi heyətinin peşəkarlıq səviyyəsi daim yüksəlməkdədir. Azərbaycan sərhədçiləri şərəfli missiyanın öhdəsindən layiqincə gəlməyi bacarırlar. Sərhədlərimizin mühafizəsi xalqımız və qədim ənənələrə malik dövlətçiliyimiz üçün mühüm əhəmiyyət daşıyır. Bu gün Dövlət Sərhəd Xidməti milli sərhəd mühafizəsini yaşadır və inkişaf etdirir.

Bu sözləri AZƏRTAC-a açıqlamasında “Gənc Nəslin Maarifləndirilməsi” İctimai Birliyinin sədri Mikayıl Həsənli söyləyib.

Ölkəmizdə milli sərhəd xidmətinin 1918-ci ildə yaradıldığını xatırladan QHT sədri deyib ki, Azərbaycan Sərhəd Xidmətinin yenidən təşkil olunması, formalaşdırılması və inkişafı müstəqil dövlətimizin qurucusu, Ümummilli Lider Heydər Əliyevin adı ilə bağlıdır. Ulu Öndər Sərhəd Qoşunlarının formalaşdırılması, ölkəmizin sərhədlərinin qorunması işinin təşkilində əvəzsiz xidmətlər göstərək milli sərhəd siyasətimizin əsasını qoydu, bununla da sərhəd strategiyasını müəyyənləşdirdi. Müdrik dövlət xadimi 2000-ci il avqustun 16-da Azərbaycan Xalq Cümhuriyyətinin ilk sərhəd mühafizəsinin təsis edildiyi tarixin Azərbaycan Sərhəd Qoşunları əməkdaşlarının peşə bayramı kimi qeyd olunması haqqında Sərəncam imzaladı. 2002-ci il iyulun 31-də Ulu Öndər Heydər Əliyevin imzaladığı Fərmanla Sərhəd Qoşunları Milli Təhlükəsizlik Nazirliyinin tərkibindən çıxarıldı. Eyni zamanda, onun bazasında Dövlət Sərhəd Xidməti yaradıldı. Bununla da Sərhəd Qoşunlarında keyfiyyətcə yeni mərhələ başladı. Bu, bir daha onu göstərdi ki, Azərbaycan dövləti sərhədlərimizin etibarlı mühafizəsinə xüsusi önəm verir.

“Ümummilli Lider Heydər Əliyevin müəyyənləşdirdiyi milli sərhəd siyasəti bu gün Prezident, Müzəffər Ali Baş Komandan İlham Əliyev tərəfindən uğurla həyata keçirilir. Ölkəmizdə sərhəd mühafizəsinin müasir tələblərə cavab verməsi, dövlət sərhədinin toxunulmazlığı tam təmin olunub.

Ötən müddət ərzində Sərhəd Qoşunlarının maddi-texniki bazası möhkəmləndirilib, maliyyə-təsərrüfat fəaliyyəti nizama salınıb. Həmçinin yeni yaradılan sərhəd dəstələrində və zastavalarında müasir tələblərə cavab verən xidməti və yaşayış binaları tikilərək istifadəyə verilib. Eyni zamanda, dövlət sərhəd mühafizəsinin infrastrukturu müasirləşdirilib, yeni hərbi hissələr yaradılıb. Hazırda sərhəd xidmətində ən müasir texnika və avadanlıqlar tətbiq edilir. O cümlədən şəxsi heyətin döyüş vərdişlərinin və peşəkarlığının daha da yüksəldilməsi istiqamətində mühüm əhəmiyyət daşıyan tədbirlər həyata keçirilir. Prezident İlham Əliyev “Mən Sərhəd Qoşunlarının inkişafına böyük önəm verirəm” deyərək sərhəd quruculuğu prosesinin uğurla davam etdirilməsi üçün lazımi tədbirlərin görüldüyünü diqqətə çatdırdı. Dövlətimizin başçısı Sərhəd Qoşunları haqqında deyib: “Sərhəd xidmətinin formalaşması işində Ulu Öndər Heydər Əliyevin müstəsna xidmətləri vardır. Azərbaycan dövlət müstəqilliyini bərpa edəndən sonra, demək olar ki, sərhədlərimiz açıq idi. Sərhəd infrastrukturu mövcud deyildi. Əvvəlki illərdə yaradılmış sərhəd infrastrukturu isə dağıdılmışdı. Bizim demək olar ki, bütün sərhədlərdə heç bir infrastruktur yox idi. Ulu Öndərin rəhbərliyi altında qısa müddət ərzində bütün sərhədlərimizdə tikinti-quruculuq işləri başlamışdır, sərhəd mühafizə infrastrukturu yaradılmışdır və bu proses bu gün uğurla davam etdirilir”. Dövlətimizin başçısının “Sərhəd Qoşunlarının formalaşdırılmasında Heydər Əliyevin rolu müstəsnadır. Məhz onun rəhbərliyi altında Azərbaycanda Sərhəd Qoşunları formalaşdı, gücləndi və bu gün ölkəmizin milli maraqlarını çox ləyaqətlə qoruyur” sözləri isə onun Sərhəd Qoşunlarının sabahına da böyük ümidlər bəslədiyinin bəyanıdır”, - deyə M.Həsənli vurğulayıb.

QHT sədrinin sözlərinə görə, bu gün sərhədçilərimiz Vətən sərhədlərini yüksək peşəkarlıqla qoruyurlar. Şəxsi heyətin döyüş hazırlığının artırılmasına xidmət edən təlimlərin keçirilməsi təqdirəlayiqdir. Belə təlimlərin keçirilməsində əsas məqsəd onlarda döyüş zamanı çeviklik, cəsurluq, qorxmazlıq vərdişlərinin aşılanması, həmçinin real döyüş şəraitində bölmələr arasında əlaqələndirmə idarəetmə orqanlarının birgə fəaliyyətinin təkmilləşdirilməsidir. Məhz Dövlət Sərhəd Xidmətində həyata keçirilən bu tədbirlər Vətən müharibəsində öz nəticəsini verdi. Sərhəd Qoşunları bu müharibədə bir sıra mühüm yeniliklərə imza atdı ki, həmin yeniliklər Ermənistan üzərində möhtəşəm Zəfərin qazanılmasında mühüm rol oynadı. Belə ki, İkinci Qarabağ müharibəsində müasir hərbi texnikanın real döyüş əməliyyatlarında geniş tətbiqinin şahidi olduq. Bunlardan biri də pilotsuz uçuş aparatlarının – dronların tətbiqi idi ki, onların bir çoxu Dövlət Sərhəd Xidməti tərəfindən həyata keçirildi. Bu mənada “Harop”, “Quzğun” və “Hermes” pilotsuz uçuş aparatları vasitəsilə düşmənə ağır zərbələr endirən sərhədçilərimizin peşəkarlığı xüsusi qeyd edilməlidir.

Dronlar vasitəsilə düşmənin zenit-raket qurğularına, tank və artilleriya sistemlərinə ağır zərbələr endiririldi. Hədəflərin dəqiqliklə məhv edilməsi nəticəsində düşmən mühüm atəş dəstəyindən məhrum olundu, böyük itkilər verərək geri çəkildi. Eyni zamanda, Ordumuzun canlı qüvvəsinin, texnikasının qorunması, müdafiəsi təmin edildi. Bu arada qeyd etmək lazımdır ki, DSX pilotsuz uçuş aparatlarından 2016-cı il Aprel döyüşlərində də istifadə edərək düşmənə sarsıdıcı zərbələr vurmuşdu.

“Sərhədçilərimiz bir sıra rayonlarımızın işğalçılardan təmizlənməsi ilə yanaşı, dövlət sərhədlərinin azad olunmasında da qəhrəmanlıq nümayiş etdiriblər. Həyata keçirilən əməliyyatlar nəticəsində Azərbaycan-İran sərhədinin işğal altındakı 132 kilometrlik hissəsi azad olundu. Həmçinin Azərbaycan-Ermənistan dövlət sərhədinin 500 kilometrlik hissəsi də düşməndən təmizləndi. Eyni zamanda, Xudafərin körpüsündə, Zəngilan rayonunun Ağbənd qəsəbəsində və Zəngilan şəhərində üçrəngli Bayrağımız ucaldıldı. Sərhədçilərimizin apardıqları rəşadətli mübarizə nəticəsində Ermənistanla dövlət sərhədində Bartaz və Şükürataz kimi strateji yüksəkliklər düşməndən azad edilib. Prezident, Ali Baş Komandan İlham Əliyev tərəfindən qarşıya qoyulmuş tapşırıqları uğurla yerinə yetirən sərhədçilərimiz Füzuli, Cəbrayıl, Zəngilan, Qubadlı rayonlarının, həmçinin Hadrut qəsəbəsinin azad olunmasında qəhrəmanlıq nümayiş etdiriblər. Vətən müharibəsində sərhədçilərin göstərdikləri qəhrəmanlıqları yüksək dəyərləndirən Ali Baş Komandan deyib: “Hər bir ölkənin sərhədi onun dövlət rəmzlərindən biridir. Azərbaycan öz sərhədlərini, ərazi bütövlüyünü tam bərpa edib. Bizim Silahlı Qüvvələrimiz rəşadət, qəhrəmanlıq göstərərək Vətən müharibəsində zəfər çaldılar. Sərhədçilərin ümumi zəfərimizdə rolu çox böyükdür. Mən bunu qiymətləndirirəm. Təsadüfi deyil ki, bir çox hərbçilər dövlətimizin yüksək orden və medalları ilə təltif edilmişlər”.

Bu gün hər bir Azərbaycan sərhədçisi öz missiyasını şərəflə yerinə yetirərək ölkəmizin sərhədlərini ayıq-sayıq qoruyur. Öz işində məsuliyyətli olan sərhədçilərimiz sayəsində əminliklə deyə bilərik ki, Azərbaycan sərhədləri etibarlı əllərdədir”, - deyə o əlavə edib.