Azərbaycan Turizm və Menecment Universitetində Bilik günü qeyd olunub
Bakı, 15 sentyabr, Ceyhun Alışlı, AZƏRTAC
Sentyabrın 15-də Azərbaycan Turizm və Menecment Universitetində (ATMU) yeni dərs ilinin başlanması və Bilik günü münasibətilə təntənəli mərasim keçirildi.
Əvvəlcə Azərbaycan Respublikasının Dövlət himni səsləndirildi.
AZƏRTAC xəbər verir ki, universitetin rektoru İlham Mədətov çıxış edərək 2017/2018-ci tədris ilinin başlanması münasibətilə müəllim-tələbə heyətini təbrik edib. Universitetin 11 illik fəaliyyəti dövründə ölkənin ali təhsil ocaqları arasında bir sıra nailiyyətlərə imza atdığını deyən rektor qeyd edib ki, indiyədək bakalavr pilləsini 2 min 122 nəfər bitirib, 143 nəfər magistr dərəcəsi alıb, 171 nəfər isə bakalavr və magistr pilləsində iki diplom - Azərbaycan Turizm və Menecment Universiteti ilə bərabər Avstraliyanın İMC Krems Tətbiqi Elmlər Universitetinin diplomunu alıb.
İlham Mədətov vurğulayıb ki, yeni tədris ilində ATMU-ya 12 ixtisas üzrə qəbul olunan 458 tələbədən 201-i dövlət sifarişi əsasında, 257-si isə ödənişli əsaslarla oxuyacaq. Azərbaycan bölməsində 369, rus bölməsində 34, ingilis dili bölməsində isə 55 tələbə təhsil alacaq.
Rektor tələbələrə yüksəkixtisaslı kadr kimi yetişmək üçün tövsiyələr verib: “Tədris olunan fənləri lazımi səviyyədə mənimsəmək, bir neçə xarici dil öyrənmək, təhsil və təcrübənin üstünlüklərindən səmərəli faydalanmaq, universitetimizin şərəfini daim uca tutmaq siz tələbələrin dərslərə müntəzəm hazırlığından asılıdır. Hər zaman öz üzərində çalışın, ictimai tədbirlərdə fəallıq göstərin”.
Mərasimdə çıxış edən mədəniyyət və turizm nazirinin birinci müavini Vaqif Əliyev yeni tədris ilinin başlanması münasibətilə tələbə və müəllimləri təbrik etdi.
Ölkəmizdə təhsilə, o cümlədən turizm sahəsində kadr hazırlığına dövlət qayğısından danışan Vaqif Əliyev bildirib ki, Prezident İlham Əliyevin 22 dekabr 2014-cü il tarixli Sərəncamı ilə Azərbaycan Turizm İnstitutunun bazasında Azərbaycan Turizm və Menecment Universiteti yaradılıb. Ölkə başçısı təhsil sisteminin maddi-texniki bazasının gücləndirilməsinə, bu sahədə beynəlxalq əlaqələrin formalaşmasına, yeni təhsil ocaqlarının yaranmasına hər zaman diqqət göstərir: “Son illər regionlarda turizm infrastrukturunun gücləndirilməsi, çoxsaylı yeni turizm obyektlərinin istifadəyə verilməsi, turizm mərkəzlərinin turist cəlbediciliyi baxımından inkişafı və ölkənin tanıdılması istiqamətində önəmli tədbirlərin təşkili qeyri-neft sektorunun aparıcı sahələrindən biri olan turizmin inkişafı deməkdir. Ölkə başçısının 2016-cı il sentyabrın 1-də imzaladığı “Azərbaycan Respublikasında turizmin inkişafı ilə bağlı əlavə tədbirlər haqqında” Sərəncamı ölkənin dinamik inkişaf sferasında turizmin yeni mərhələyə qədəm qoyduğunun bariz nümunəsidir. Turizmin milli iqtisadiyyatın prioritet istiqaməti kimi müəyyənləşdirilməsi bu universitet üçün yeni imkan və perspektivlər açır. Ölkə rəhbərliyinin bilavasitə diqqət mərkəzində malik turizm sənayesinin inkişafı bu təhsil ocağında yetişən kadr potensialının hazırlıq səviyyəsindən də asılıdır. Ölkəmizdə turizm sahəsi üzrə ixtisaslaşmış yeganə ali məktəb olan Turizm və Menecment Universiteti qısa müddət ərzində bu sahədə qabaqcıl təhsil müəssisəsi olmaqla yanaşı, sektorda çalışan elm, təhsil və biznes dairələrinin nümayəndələrini özündə birləşdirən məkana çevrilib. Hazırda ATMU-nun məzunları Azərbaycanın nüfuzlu hotel və turizm müəssisələrində məsul vəzifələrdə çalışır”.
Vurğulanıb ki, ildən-ilə tələbələr bu təhsil ocağına daha yüksək nəticələrlə qəbul olurlar: “Ali məktəb seçimi hər bir gəncin həyatında mühüm qərarlardan biridir. İnanıram ki, ATMU-nu seçməyinizdə yanılmayacaqsınız”.
Sonda müəllim-tələbə heyətinə uğurlar arzulayan nazirin birinci müavini universitetə yüksək balla qəbul olan tələbələrə tələbə biletlərini təqdim edib.
Mərasimdən sonra Vaqif Əliyev ATMU-da yaradılan tədris şəraiti ilə tanış olub. Tələbələrin bilik və bacarıqlarının daha da yüksəldilməsi istiqamətində həyata keçirilən praktiki işlər haqqında məlumat verilib. Bildirilib ki, universitetin kitabxanasından tələbələrin səmərəli istifadə etməsi üçün hər cür şərait yaradılıb. Burada universitetin profili üzrə xarici ölkələrdən gətirilən yeni tədris vəsaitləri də toplanıb.
Bölmənin digər xəbərləri
