Azərbaycan-Türkmənistan münasibətlərinin mühüm sütunlarından birini mədəni əməkdaşlıq təşkil edir RƏY
Bakı, 25 iyun, AZƏRTAC
Türkmənistan Prezidentinin Azərbaycana səfəri ölkələrimiz arasında münasibətlərinin strateji tərəfdaşlıq mərhələsinə daxil olduğunu göstərən mühüm siyasi mesajdır. Azərbaycan və Türkmənistan münasibətlərinin inkişafı yalnız ikitərəfli və regional çərçivə ilə məhdudlaşmır. Eyni zamanda, daha geniş geosiyasi və geoiqtisadi məkanlara təsir göstərən strategiya kimi çıxış edir. İki qardaş və dost xalqlar arasındakı bu yaxınlaşma Avropanın enerji təhlükəsizliyinin möhkəmləndirilməsi, qitənin enerji təchizatı mənbələrinin və marşrutlarının şaxələndirilməsi baxımından yeni imkanlar yaradır. Belə geniş və strateji vacib münasibətlərin əsas sütunlarını əlbəttə ki, milli, dini və tarixi yaxınlıqdan doğan ortaq mədəniyyət, enerji əməkdaşlığı, nəqliyyat layihələri, təhlükəsizlik maraqları və Türk dünyasının inteqrasiyası təşkil edir.
Bu sözləri AZƏRTAC-a açıqlamasında Mətbuat Şurası İdarə Heyətinin üzvü Yeganə Hacıyeva söyləyib.
O bildirib ki, mövcud geosiyasi şəraitdə Azərbaycan-Türkmənistan münasibətlərinin güclənməsi yalnız iki dövlətin deyil, bütövlükdə Xəzər regionunun, Türk dünyasının və Avrasiya məkanının gələcək siyasi-iqtisadi inkişafına təsir göstərə biləcək strateji prosesdir. Çünki bu əməkdaşlıq 21-ci əsrdə Xəzərdən başlayan və Avropaya, Yaxın Şərqə, Cənubi Qafqaza və Mərkəzi Asiyaya uzanan yeni geoiqtisadi körpünün formalaşmasına xidmət edir. Türkmənistan Prezidentinin Azərbaycana səfərinin regional əhəmiyyəti haqqında danışırıqsa onu qeyd edim ki, bu, çoxşaxəli əhəmiyyət daşıyan və Cənubi Qafqaz ilə Mərkəzi Asiya arasında əməkdaşlığın yeni mərhələyə yüksəlməsinə xidmət edən səfərdir. Səfər, ilk növbədə, Azərbaycanın Mərkəzi Asiya ölkələri ilə siyasi, iqtisadi və nəqliyyat əlaqələrinin daha da dərinləşməsinə mühüm təkan verməklə regionlararası inteqrasiya proseslərinin sürətlənməsinə xidmət edir. Bu baxımdan Azərbaycan–Türkmənistan əməkdaşlığının inkişafı təkcə ikitərəfli münasibətlər çərçivəsində deyil, həm də Avrasiya məkanında formalaşan yeni iqtisadi və nəqliyyat arxitekturası kontekstində xüsusi əhəmiyyət kəsb edir.
Azərbaycan-Türkmənistan əməkdaşlığı Avrasiyada iqtisadi inteqrasiya proseslərinə əlavə dinamika qazandırır
“Trans-Xəzər Beynəlxalq Nəqliyyat Marşrutu və Orta Dəhliz üzrə əməkdaşlığın genişlənməsi Çinlə Avropa arasında yükdaşımalarının səmərəliliyini artırmaqla yanaşı, bu marşrutun beynəlxalq logistika sistemində rəqabət qabiliyyətinin yüksəlməsinə şərait yaradır. Eyni zamanda, Azərbaycan və Türkmənistan arasında strateji tərəfdaşlığın möhkəmlənməsi türk dövlətləri arasında siyasi koordinasiyanın, iqtisadi əməkdaşlığın və qarşılıqlı fəaliyyət mexanizmlərinin inkişafına töhfə verərək Türk dünyasının beynəlxalq münasibətlər sistemində mövqeyini və geosiyasi çəkisini gücləndirir. Nəqliyyat, logistika, enerji və ticarət sahələrində əməkdaşlığın genişləndirilməsi Xəzər hövzəsinin Avrasiyanın əsas iqtisadi və kommunikasiya mərkəzlərindən birinə çevrilməsi üçün əlverişli zəmin yaradır. Xüsusilə qlobal geosiyasi proseslərin təsiri altında ənənəvi Şimal və Cənub nəqliyyat marşrutlarının müxtəlif çağırışlarla üzləşdiyi bir dövrdə Xəzər dənizi üzərindən keçən Trans-Xəzər Beynəlxalq Nəqliyyat Marşrutu və Orta Dəhlizin əhəmiyyəti daha da artır. Bu marşrutların inkişafı Asiya ilə Avropa arasında yükdaşımaların həcminin artmasına, tədarük zəncirlərinin şaxələndirilməsinə və alternativ nəqliyyat-kommunikasiya xətlərinin strateji rolunun güclənməsinə şərait yaradır. Azərbaycan və Türkmənistan arasında əməkdaşlığın dərinləşməsi Avrasiyada iqtisadi inteqrasiya proseslərinə əlavə dinamika qazandıraraq Mərkəzi Asiya, Cənubi Qafqaz və Avropa arasında qarşılıqlı əlaqələrin möhkəmlənməsinə xidmət edir. Ölkələrimiz arasında münasibətlərin hazırkı inkişaf tempi türk dövlətləri arasında siyasi, iqtisadi və humanitar əməkdaşlığın genişlənməsinə, ortaq maraqlar ətrafında daha sıx koordinasiyanın formalaşmasına və Türk dünyasının beynəlxalq münasibətlər sistemində təsir imkanlarının artmasına mühüm töhfə verir. Eyni zamanda, Azərbaycan və Türkmənistan arasında strateji əməkdaşlığın güclənməsi qlobal enerji, nəqliyyat və ticarət marşrutlarının şaxələndirilməsi baxımından da mühüm əhəmiyyət daşıyır. Bu əməkdaşlıq Xəzər hövzəsinin geostrateji və geoiqtisadi əhəmiyyətini daha da artıraraq regionun Avrasiyanın əsas enerji, logistika və ticarət qovşaqlarından birinə çevrilməsi potensialını gücləndirir. Bu baxımdan Türkmənistan Prezidentinin Azərbaycana dövlət səfəri yalnız ikitərəfli münasibətlərin inkişafı deyil, həm də regional əməkdaşlığın dərinləşməsi və Avrasiya məkanında yeni iqtisadi əlaqələrin formalaşması baxımından mühüm siyasi hadisə kimi qiymətləndirilə bilər”, - deyə Y.Hacıyeva diqqətə çatdırıb.
“Azərbaycan və Türkmənistan arasında münasibətlərin mühüm sütunlarından birini humanitar və mədəni əməkdaşlıq təşkil edir. İki ölkə arasındakı əlaqələrin dayanıqlılığı təkcə siyasi və iqtisadi maraqlara deyil, həm də ortaq türk mənşəyinə, dil, ədəbiyyat, mədəniyyət və tarixi yaddaş kimi dərin mənəvi dəyərlərə əsaslanır. Bu baxımdan Türkmənistan Prezidentinin Azərbaycana səfəri çərçivəsində elm və təhsil sahəsində əməkdaşlığın genişləndirilməsi, tələbə və akademik mübadilə proqramlarının artırılması, ortaq mədəni layihələrin və mədəniyyət günlərinin təşkili, ümumtürk tarixi-mədəni irsinin birgə təbliği, eləcə də media və informasiya məkanında əməkdaşlığın dərinləşdirilməsi strateji əhəmiyyət kəsb edən istiqamətlər kimi ön plana çıxır. Sözügedən proseslər xalqlar arasında qarşılıqlı etimadın və mənəvi yaxınlığın daha da möhkəmlənməsinə xidmət etməklə yanaşı, Türk dünyasında sosial-humanitar inteqrasiyanın güclənməsinə, ortaq mədəni kimlik şüurunun dərinləşməsinə və türk dövlətləri arasında əməkdaşlığın institusional əsaslarının daha da möhkəmlənməsinə mühüm töhfə verir”, - deyə o əlavə edib.
Bölmənin digər xəbərləri
