Azərbaycan-Türkmənistan tərəfdaşlığı Türk dünyasında yeni əməkdaşlıq modelinin formalaşmasına xidmət edir - ŞƏRH
Bakı, 25 iyun, AZƏRTAC
Azərbaycan və Türkmənistan arasında münasibətlərin dinamik inkişafı təkcə ikitərəfli əlaqələrin genişlənməsi ilə məhdudlaşmır, bu proses bütövlükdə Türk dünyasında əməkdaşlığın yeni məzmun qazanmasına və ortaq strateji baxışın formalaşmasına mühüm töhfə verir. Son illərdə iki ölkə arasında siyasi dialoqun intensivləşməsi, iqtisadi, enerji, nəqliyyat, logistika və humanitar sahələrdə əməkdaşlığın dərinləşməsi regional inteqrasiyanın mühüm istiqamətlərindən birinə çevrilib.
Bu fikirləri AZƏRTAC-a açıqlamasında Kocaeli Heydər Əliyev Mədəniyyət Mərkəzinin sədri, türkiyəli siyasi ekspert Bilal Dündar bildirib.
Ekspert qeyd edib ki, Azərbaycan və Türkmənistan ortaq tarixi köklər, dil və mədəni bağlılıq üzərində formalaşan münasibətlərini müasir dövrün geosiyasi və iqtisadi çağırışlarına uyğun şəkildə inkişaf etdirirlər. Onun sözlərinə görə, bu əməkdaşlıq modeli türk dövlətləri arasında əlaqələrin daha institusional və davamlı xarakter almasına nümunə yaradır. Bilal Dündar vurğulayıb ki, son dövrlərdə yüksəksəviyyəli qarşılıqlı səfərlər, dövlət başçıları arasında keçirilən görüşlər və əldə olunan razılaşmalar əlaqələrin yeni mərhələyə yüksəldiyini nümayiş etdirir.
“Azərbaycan ilə Türkmənistan arasında formalaşan strateji yaxınlaşma Xəzər regionunda yeni iqtisadi imkanların açılması ilə yanaşı, türk dövlətləri arasında qarşılıqlı etimadın daha da güclənməsinə şərait yaradır. Bu gün Türk dünyası artıq yalnız ortaq tarixi və mədəniyyət üzərində deyil, həm də iqtisadi inteqrasiya, enerji təhlükəsizliyi və nəqliyyat əlaqələri üzərində birləşən yeni inkişaf mərhələsinə daxil olur. Orta Dəhlizin genişlənməsi və Xəzər üzərindən tranzit imkanlarının artırılması baxımından Azərbaycan və Türkmənistan arasında koordinasiyanın güclənməsi xüsusi əhəmiyyət daşıyır. Bu əməkdaşlıq Avropa ilə Asiyanı birləşdirən marşrutların rəqabət qabiliyyətini artırmaqla yanaşı, region ölkələrinin iqtisadi potensialının daha səmərəli istifadəsinə imkan yaradır. Azərbaycanın son illərdə həyata keçirdiyi iri infrastruktur layihələri, beynəlxalq nəqliyyat və logistika təşəbbüsləri, eləcə də Türkmənistanın bu istiqamətdə artan fəallığı türk dünyasının vahid iqtisadi məkan kimi formalaşmasına mühüm töhfə verir”, - deyə o bildirib.
Ekspert vurğulayıb ki, enerji sahəsində əməkdaşlığın genişləndirilməsi də münasibətlərin strateji xarakterini gücləndirən əsas amillərdəndir. Onun fikrincə, Xəzər hövzəsinin imkanlarından səmərəli istifadə olunması və regional enerji əməkdaşlığının genişlənməsi yeni iqtisadi əməkdaşlıq platformalarının yaranmasına səbəb ola bilər: “Türk Dövlətləri Təşkilatı çərçivəsində inkişaf edən münasibətlər göstərir ki, Türk dünyasının gələcəyi daha çox ortaq iqtisadi maraqlar, koordinasiyalı siyasət və davamlı əməkdaşlıq üzərində qurulur. Azərbaycan və Türkmənistan bu prosesdə mühüm hərəkətverici qüvvələrdən biri kimi çıxış edir. İki ölkə arasında humanitar əlaqələrin, təhsil və mədəniyyət sahəsində əməkdaşlığın genişlənməsi də uzunmüddətli perspektivdə türk həmrəyliyinin daha da möhkəmlənməsinə xidmət edir. Azərbaycan-Türkmənistan münasibətlərinin hazırkı inkişaf dinamikası yalnız regional deyil, bütövlükdə türk coğrafiyasında siyasi sabitlik, iqtisadi rifah və ortaq gələcək baxışının güclənməsi baxımından mühüm əhəmiyyət daşıyır”.
Bölmənin digər xəbərləri
