AZƏRBAYCAN VƏ MOLDOVA PREZİDENTLƏRİNİN GENİŞ TƏRKİBDƏ GÖRÜŞÜ
Azərbaycan dövlətinin başçısı İLHAM ƏLİYEV Moldova Prezidentinə və Moldova nümayəndə heyətinin üzvlərinə müraciətlə dedi:
- Hörmətli cənab Prezident!
Hörmətli dostlar!
Mən sizi bir daha salamlamaq və sizə “Xoş gəlmisiniz!” demək istərdim. Biz Moldova Prezidentinin Azərbaycana səfərinə böyük əhəmiyyət veririk. Xalqlarımız arasında həmişə çox səmimi münasibətlər olub, biz bir çox illər ərzində fəal əməkdaşlıq etmiş, görüşmüş, təcrübə mübadiləsi aparmışıq. Əlbəttə, çox mühümdür ki, Moldova və Azərbaycan müstəqilliyə qovuşduqdan sonra bu əlaqələri itirmədilər. Bu əlaqələr itirilmədi, əksinə, hətta deyərdim ki, indi əməkdaşlığımız tamamilə yeni səviyyəyə yüksəlir. Biz ikitərəfli formatda fəal əməkdşalıq edirik, müxtəlif beynəlxalq təşkilatların, o cümlədən ölkələrimizin fəal əməkdaşlıq etdikləri GUÖAM kimi təşkilatın üzvləriyik. İqtisadi əməkdaşlıq sahəsində yaxşı perspektivlər var.
Vladimir Nikolayeviç, bu gün biz Sizinlə ölkələrimizin iqtisadi təsərrüfatında işlərin vəziyyəti barədə məlumat mübadiləsi apardıq və məmnunluqla qeyd etdik ki, Moldovada da, Azərbaycanda da çox ciddi iqtisadi yüksəliş müşahidə olunur. Ölkələrimizin potensialı möhkəmləndikcə, səmərəli ikitərəfli iqtisadi əməkdaşlıq imkanları da artır. Ümidvarıq ki, Sizin səfəriniz və imzalanacaq sənədlər iqtisadi layihələrin tam həyata keçirilməsinə təkan verəcəkdir.
Əlbəttə, beynəlxalq qurumlara inteqrasiya proqramlarımız baxımından hər iki ölkə böyük uğurlar qazanmışdır. Lakin bizi birləşdirən problemlər də var. Təəssüf ki, ölkələrimizin ərazilərində təcavüzkar separatizm ünsürləri baş qaldırır və bu, həm regional əməkdaşlıq üçün, həm də regional təhlükəsizlik üçün böyük bəla və təhlükədir. Ümidvarıq ki, beynəlxalq hüquq normaları zəfər çalacaq və hər iki ölkənin ərazi bütövlüyü bərpa ediləcəkdir.
Mənim üçün çox xoşdur ki, Siz böyük nümayəndə heyəti ilə gəlmisiniz və əminəm ki, nazirlərimiz də fəal əlaqə yaradacaq, əməkdaşlıq edəcək, görüşəcəklər. İndiki halda, prezidentlər onlara yaxşı nümunə göstərirlər. Biz Sizinlə MDB çərçivəsində bütün görüşlərimizdə həmişə çox fəal surətdə fikir mübadiləsi aparırıq və zənnimcə, nazirlərimiz bizdən nümunə götürməlidirlər.
Mən bir daha Sizi ürəkdən salamlamaq və arzu etmək istəyirəm ki, səfəriniz uğurlu olsun, Siz vətənə ən xoş təəssüratlarla qayıdasınız.
Moldova Prezidenti VLADİMİR VORONİN qonaqpərvərliyə və səmimi qəbula görə Prezident İlham Əliyevə təşəkkürünü bildirərək dedi:
- Cənab Prezident İlham Əliyev, çox sağ olun!
Hörmətli azərbaycanlı dostlar!
Mən ilk dəfədir ki, Azərbaycandayam və bu, mənim Cənubi Qafqaz dövlətinin paytaxtına ilk səfərimdir. Hərçənd, biz aydınlaşdırmışdıq ki, bu dəfə səfər etmək növbəsi Azərbaycan tərəfinin idi. Lakin biz Prezident Əliyevlə belə razılığa gəldik ki, indi o, iki dəfə dalbadal Moldovaya gələcək və bu da bizi çox qane edir. Bunu rəsmi dəvət kimi qəbul edin.
Həqiqətən, mən Sizinlə razıyam ki, ölkələrimizin və xalqlarımızın taleyində ümumi cəhətlər çoxdur - həm Sovet İttifaqının tərkibində tarixi keçmişimiz baxımından, həm də dövlətlərimizin müstəqillik qazandıqdan sonra təşəkkül tapdığı ağır illərdə baş verən hadisələr baxımından. Lakin bizim əməkdaşlığı və ikitərəfli əlaqələri möhkəmləndirmək üçün çox yaxşı perspektivlərimiz də vardır. Biz beynəlxalq təşkilatlar, MDB çərçivəsində də fəal əməkdaşlıq edirik. Səfərimizin məqsədi də bütün bunlardır. Mən bu səfərə dəvət edildiyimə görə Sizə təşəkkür edirəm və görülmüş böyük hazırlıq işlərinə görə azərbaycanlı həmkarlarıma minnətdarlığımı bildirirəm, cünki bütün səfərlərim ərzində heç bir ölkədə bu qədər sənəd imzalamamışıq.
Ona görə də hesab edirəm ki, həqiqətən, bizim qarşılıqlı surətdə faydalı ikitərəfli əməkdaşlıq üçün çox yaxşı perspektivlərimiz var.
Biz Sizin ölkənizə, xalqınıza həmişə çox böyük hörmətlə yanaşmışıq və yanaşırıq. Moldovada heç də kiçik olmayan diaspor – təxminən 2 min etnik azərbaycanlı var. Ölkəmizin parlamentinin deputatı buradadır, o da azərbaycanlıdır. Qarşılıqlı münasibətlərimizin dərinləşməsi üçün digər çoxlu imkanlar da mövcuddur. Zənnimcə, nazirlərimizin, rəhbər işçilərimizin şəxsi tanışlığı daha geniş əməkdaşlığa xidmət edəcəkdir. Hesab edirəm ki, biz əməkdaşlığın yeni yollarını tapa biləcəyik. Bizim Sizinlə BMT çərçivəsində ölkələrimizin dəstəklənməsi, ayrı-ayrı namizədlərin irəli sürülməsi, habelə qətnamələrin qəbul edilməsi baxımından çoxlu vəzifələrimiz var. Ən kədərlisi budur ki, ümumi problemimiz də mövcuddur: ərazi bütövlüyü məsələsi həll edilməyibdir. Bizim Dnestryanı bölgə problemimiz, Sizin isə öz separatçılarınız var. Bunlar çox ağrılı məsələlərdir.
Nümayəndə heyətimizin tərkibinə Qaqauziyanın başqanı da daxildir. Demək istəyirəm ki, dekabrın 23-də biz Qaqauziya muxtariyyətinin 10 illiyini qeyd edəcəyik. Bu, muxtar ərazi qurumu probleminin sülh yolu ilə həlli sahəsində Avropada ilk nümunədir. Biz bu muxtariyyətin normal inkişaf etməsinə, orada yaxşı iqtisadi baza olmasına çox böyük diqqət yetiririk.
X X X
Sonra prezidentlər İlham Əliyev və Vladimir Voronin iki ölkə hökumətləri nümayəndələrinin iştirakı ilə qarşılıqlı maraq doğuran məsələləri ətraflı müzakirə etdilər.
Bölmənin digər xəbərləri
