Azərbaycan velosipedçilərinin bu il iştirak edəcəyi daha 3 beynəlxalq yarış dəqiqləşib
Bakı, 30 yanvar, AZƏRTAC
Azərbaycan velosipedçiləri bu il bir sıra beynəlxalq turnirlərdə iştirak edəcəklər.
Bu barədə AZƏRTAC-a Azərbaycan Velosiped Federasiyasının baş katibi Elnarə Musayeva məlumat verib.
Onun sözlərinə görə, idmançıların çıxış edəcəyi daha üç yarış dəqiqləşib: “Bunlar Avropa Gənclər Olimpiya Festivalı, Avropa çempionatı və Balkan açıq çempionatıdır. Yarışların məkanı və yeri barədə yaxın vaxtlarda məlumat veriləcək. Turnirlər təkcə bununla bitməyəcək, daha bir neçə yarışda iştirak etmək planımız var. Bu il Azərbaycan velosipedi üçün zəngin olacaq”.
Baş katib bildirib ki, bu cür yarışların təşkili velosipedçilərin hazırlıq səviyyəsinin yüksəlməsinə kömək edəcək.
Qeyd edək ki, Azərbaycan velosipedçiləri bu il Səudiyyə Ərəbistanında təşkil olunacaq VI İslam Həmrəyliyi Oyunları və Azərbaycanda keçiriləcək III MDB Oyunlarında da mübarizə aparacaqlar.
Bölmənin digər xəbərləri
