Azərbaycan WUF13 çərçivəsində keçiriləcək AUF2 platformasında Afrika ölkələri ilə əməkdaşlığa maraqlıdır
Bakı, 12 fevral, AZƏRTAC
Aprelin 8-dən 10-dək Keniyanın paytaxtı Nayrobidə keçiriləcək 2-ci Afrika Urban Forumuna (AUF2) hazırlıqla bağlı bu ölkədəki diplomatik korpusu məlumatlandırmaq məqsədi ilə Keniya Hökuməti tərəfindən brifinq təşkil olunub.
Azərbaycanın Keniyadakı səfirliyindən AZƏRTAC-a bildirilib ki, tədbirdə Azərbaycanı bu ölkədəki səfir Sultan Hacıyev təmsil edib.
Keniyanın torpaq, ictimai işlər, mənzil və şəhər inkişafı naziri Alis Vahome çıxışında ölkəsinin Afrika İttifaqı və UN-Habitatla birgə təşkil etdiyi AUF2-nin qlobal və regional əhəmiyyəti, aidiyyəti digər beynəlxalq platformalarla mahiyyət baxımından yaxınlığı barədə danışıb. O, WUF13 Zirvə Toplantısında Afrika ölkələrinin sahə üzrə fikir həmrəyliyinin formalaşdırılması üçün üzv ölkələrin AUF2-də iştirakının əhəmiyyətini vurğulayıb və Azərbaycanın təşəbbüsü ilə belə bir ali toplantının keçirilməsini yüksək qiymətləndirib.
Tədbirdə çıxış edən Azərbaycanın Keniyadakı səfiri Sultan Hacıyev AUF2 platformasının fəaliyyəti çərçivəsində ölkəmizin Afrika ölkələri ilə əməkdaşlığa maraqlı olduğunu bildirib, həmçinin iqlimə dayanıqlı şəhərsalma və əlçatan mənzil sahəsində qlobal töhfələri, postmünaqişə dövründə bərpa və yenidənqurma, habelə humanitar minatəmizləmə sahəsində qazandığı geniş təcrübəni maraqlı tərəflərlə paylaşmaq imkanlarını dilə gətirib.
O, WUF13-ə hazırlıq işləri barədə məlumat verərək, Zirvə Toplantısında Afrika ölkələrinin iştirakının qitə üçün əhəmiyyətli olacağını vurğulayıb. Həmçinin COP29 və daha öncəsindəki bir sıra mötəbər beynəlxalq tədbirlərə uğurla ev sahibliyi edən Azərbaycanın WUF13-ün də yüksək səviyyədə keçirilməsi üçün ciddi tədbirlər gördüyünü söyləyib.
Bölmənin digər xəbərləri
