Bakı, 2 aprel (AZƏRTAC). Prezident İlham Əliyev “Azərbaycan Respublikasında 2012-ci ilin “İdman ili” elan edilməsi ilə bağlı Tədbirlər Planı”nın təsdiq edilməsi haqqında” Sərəncam imzalamışdır. Azərbaycanın idman tarixində böyük əhəmiyyət kəsb edəcək bu sənədin təsdiqi bütün idman ictimaiyyətini, o cümlədən Azərbaycan bayrağının beynəlxalq yarışlarda dalğalanmasını istəyən insanların sevincinə səbəb olmuşdur.

Tam inamla söyləmək olar ki, ulu öndər Heydər Əliyevin əsasını qoyduğu uğurlu idman siyasəti bu gün bəhrəsini verir. Dövlət müstəqilliyinin ilk illərində özünü bütün sahələrdə qabarıq göstərən ideoloji-siyasi, iqtisadi böhran səbəbindən idman siyasəti tamamilə diqqətdən kənarda qalmışdı. Hələ sovetlər dövründə qazandıqları müvəffəqiyyətlərlə məşhurlaşmış adlı-sanlı, perspektivli idmançılarımızın böyük əksəriyyəti dözülməz şərait ucbatından ölkəmizi tərk etmək məcburiyyətində qalmışdılar. İdmana tarixən marağın güclü olduğu Azərbaycanda vəziyyətin belə acınacaqlı şəkil alması gənclərin qeyri-sağlam həyat tərzinə, zərərli vərdişlərə aludəçiliyinə, bir sözlə, mənəvi aşınmasına səbəb olur, müharibə şəraitində yaşayan ölkədə fərarilik hallarının çoxalmasına rəvac verirdi. Digər tərəfdən, ulu öndər Heydər Əliyevin vaxtilə xalqına ərməğan etdiyi idman kompleksləri baxımsızlıq üzündən dağıdılmış, idmanımız taleyin ümidinə buraxılmışdı.

Ümummilli lider Heydər Əliyevin 1993-cü ildə yenidən hakimiyyətə qayıdışından sonra idmanın inkişafı dövlət siyasətinin prioritet istiqamətindən birinə çevrildi. Beləliklə də bu sahədə yüksəlişin əsası qoyuldu. Azərbaycanın bir idman ölkəsi kimi beynəlxalq aləmdə tanınması və Olimpiya hərəkatına qoşulması geniş vüsət aldı. Çox qısa zamanda həyata keçirilən mühüm tədbirlərin nəticəsi olaraq idmançılarımız tədricən möhtəşəm qələbələrə imza atdılar. İlk dəfə 1996-cı il Atlanta Olimpiadasına 23 nəfər idmançı ilə qatılan Azərbaycanın 197 ölkə arasında 61-ci yeri tutması idmanımızın beynəlxalq Olimpiya hərəkatında ilk nailiyyəti idi.

Ulu öndər Heydər Əliyevin idman sahəsində həyata keçirdiyi siyasət 1997-ci ildən mühüm mərhələyə qədəm qoydu. Rəhbərlik etdiyi bütün sahələrdə uğurlara imza atan İlham Əliyevin həmin ildə Milli Olimpiya Komitəsinin prezidenti seçilməsi Azərbaycan idmanının həyatında mühüm və əlamətdar hadisə kimi tarixə yazıldı. Bu tarixi seçim ümummilli lider Heydər Əliyevin respublikada idmanın inkişafı ilə bağlı ideyalarının daha sürətlə gerçəkləşməsini təmin etdi, idman sahəsində həyata keçirilən dövlət siyasətinin yeni şəraitdə reallığa çevrilməsinə böyük imkanlar açdı. İlham Əliyevin idman və bədən tərbiyəsinin tərəqqisi, Azərbaycanın dünya idman ailəsinin bərabərhüquqlu üzvünə çevrilməsi üçün atdığı addımlar ölkənin bütün idman ictimaiyyəti tərəfindən razılıqla qarşılandı. Ulu öndərin layiqli varisi olan İlham Əliyev Azərbaycan Respublikasının Prezidenti seçildikdən sonra ölkədə idmanın inkişafı daha da sürətləndi.

Prezident İlham Əliyevin ölkəmizin kompleks inkişafına xidmət edən siyasi xəttinin konturları həm də idman infrastrukturunun möhkəmlənməsi, genişlənməsi, yenilənməsi və idmanımızın inkişafına xidmət edən digər tədbirlərlə müşayiət olunur. Dövlət başçısı Azərbaycanın hər yerində idmanla məşğul olmaq üçün müasir tələblərə cavab verən idman infrastrukturunun formalaşdırılmasını mühüm vəzifələrdən biri kimi müəyyənləşdirmişdir. Ötən illərdə Gəncə, Naxçıvan, Şəki, Quba, Şamaxı, Lənkəran, Qazax, Bərdədə, Bakının Maştağa kəndində və digər bölgələrdə olimpiya idman kompleksləri tikilmişdir. Hətta cəbhə xəttinin bir neçə kilometrliyində, Ağdamın Quzanlı qəsəbəsində möhtəşəm idman qurğusu idmançılarımızın istifadəsinə verilmişdir.

Uğurlu idman siyasətinin nəticəsi olaraq Azərbaycan dünyanın idman ictimaiyyəti tərəfindən ciddi tərəfdaş, idmançılarımız isə əsas rəqib kimi qəbul olunurlar. Ölkəmizin qısa müddətdə idman sahəsində əldə etdiyi nailiyyətlər Beynəlxalq Olimpiya Komitəsinin və Avropa Olimpiya Komitəsinin rəhbərliklərinin diqqətindən yayınmamışdır. Məhz beynəlxalq idman təşkilatlarının istəyi ilə ölkəmizdə onlarla olimpiya lisenziyalı beynəlxalq turnirlər, mötəbər yarışlar, dünya və Avropa çempionatları keçirilmişdir. Hazırda Bakı şəhəri 2020-ci ildə Olimpiya Oyunlarına ev sahibliyinə namizədliyi iddia olunan şəhərlər sırasındadır. Artıq bu istiqamətdə ölkəmizdə imzatoplama kampaniyasına başlanılmışdır.

Yazının əvvəlində qeyd edilmişdir Prezident İlham Əliyevin “Azərbaycan Respublikasında 2012-ci ilin “İdman ili” elan edilməsi ilə bağlı Tədbirlər Planı”nın təsdiq edilməsi haqqında” Sərəncamı isə idmançılarımıza göstərilən ən böyük mənəvi dəstəkdir.

Sərəncamdan irəli gələn məsələləri həll etmək üçün Nazirlər Kabinetinə tapşırıqlar verilmişdir. Eyni zamanda, bu sahədə Gənclər və İdman Nazirliyi, Milli Olimpiya Komitəsi ilə yanaşı, müxtəlif nazirliklərin və yerli icra hakimiyyəti orqanlarının da il ərzində kütləvi idman tədbirlərinin keçirilməsi sahəsində vəzifələri müəyyənləşdirilmişdir.

Tədbirlər Planına əsasən, aprel ayında 2012-ci ilin “İdman ili” elan edilməsi ilə əlaqədar təntənəli mərasim və “İdman ili” loqosunun hazırlanması üçün müsabiqə keçiriləcəkdir. Bundan əlavə, şəhər və rayonlarda bədii-tərtibat işlərinin aparılması, küçə və meydançalarda, park və xiyabanlarda təbliğat vasitələrinin yerləşdirilməsi, idman təşkilatlarında tədbirlər planının hazırlanması nəzərdə tutulmuşdur. Bütün il boyu şəhər və rayonlarda yerli idman ictimaiyyətinin nümayəndələri ilə görüşlər təşkil olunacaq, idman mövzusunda rəsm müsabiqələri keçiriləcəkdir.

Tədbirlər Planında idman qurğularının inşası, idman jurnalistləri üçün kursların təşkili, dövlət qurumlarının əməkdaşları, Azərbaycanda fəaliyyət göstərən xarici ölkələrin və beynəlxalq təşkilatların nümayəndəlikləri arasında yarışların keçirilməsi, o cümlədən paralimpiya və xüsusi olimpiya idman növləri üzrə yarışların təşkili yer almışdır.

Yay aylarında isə respublika miqyaslı idman təşkilatlarının fəaliyyətlərini əks etdirən sərgi, “Müstəqil Azərbaycanda bədən tərbiyəsi və idmanın inkişaf dinamikası” mövzusunda elmi-praktiki konfrans keçiriləcək, Azərbaycanda Olimpiya hərəkatının inkişafı ilə bağlı qısametrajlı film hazırlanacaqdır. Azərbaycan milli olimpiya və paralimpiya komandalarının 30-cu London Yay Olimpiya Oyunlarına yola salınması və idmançılarımızın çıxışlarının yekunları ilə bağlı müşavirənin keçirilməsi də yay tədbirlərinə daxildir.

Payızda Almaniya, Türkiyə, İngiltərə, Rusiya, Belarus, Gürcüstan və Qazaxıstan idman akademiyalarının iştirakı ilə Beynəlxalq Olimpiya konfransının, şagirdlər arasında “Bizim Olimpiya çempionlarımız” mövzusunda inşa müsabiqəsinin keçirilməsi nəzərdə tutulmuşdur.

Dekabr ayında isə “İdman ili”nin ən yaxşılarını müəyyən etmək məqsədi ilə müxtəlif nominasiyalar üzrə respublika müsabiqəsi keçiriləcək, “Azərbaycan Olimpiya idman kompleksləri” kitabı hazırlanacaqdır. İlin sonunda “Bakı Expo” Mərkəzində sərgi təşkil olunacaq və “İdman ili”nin yekunlarına həsr olunmuş mərasim keçiriləcəkdir.

İnanırıq ki, bu tədbirlərin həyata keçirilməsi bütün sahələrdə dinamik inkişaf edən Azərbaycana idman sahəsində möhtəşəm qələbələr qazandıracaqdır.