Azərbaycanda ilk böyük keçi təsərrüfatının ünvanı: Ağcabədi rayonu
Ağcabədi, 7 dekabr, AZƏRTAC
Həyata keçirilən uğurlu iqtisadi siyasət, qeyri-neft sektorunun inkişafının sürətləndirilməsi, əlverişli biznes və investisiya mühitinin formalaşdırılması, sahibkarlığa dövlət dəstəyinin artırılması nəticəsində ölkəmizin bölgələrində iri, orta və kiçik istehsal müəssisələri yaradılır, uğurlu investisiya layihələri həyata keçirilir.
Son illərdə respublikamızın bütün regionlarında olduğu kimi, Ağcabədi rayonunda da sahibkarlığın inkişafında uğurlar qazanılıb, kənd təsərrüfatı, qida və sənaye məhsulları istehsalına yönəldilən investisiyaların həcmi çoxalıb, yeni istehsal və emal müəssisələri yaradılıb.
Rayonda sahibkarlığa dövlət qayğısının təzahürü olaraq yaradılan iri sahibkarlıq subyektlərindən biri də Ağabəyli kəndi ərazisində “BMS Aqro” Məhdud Məsuliyyətli Cəmiyyət tərəfindən yaradılmış ölkəmizdə ilk böyük damazlıq keçi təsərrüfatıdır.
“BMS Aqro” MMC-nin icraçı direktoru Svetlana Məmmədova AZƏRTAC-a bildirib ki, keçi təsərrüfatının əsası 2013-cü ilin mayında qoyulub. Təsərrüfatın yaradılmasında İqtisadiyyat və Sənaye Nazirliyinin Sahibkarlığa Kömək Milli Fondunun güzəştli kreditlərindən istifadə olunub. Ümumilikdə 11 hektar ərazini əhatə edən təsərrüfat hər biri 1500 başlıq 8 fermadan, təkə, revir, çəpiş üçün binalardan, baş ofis, sağımxana və sağımxana ofisindən ibarətdir.
Binalar müasir qaydalara uyğun olaraq ana keçi, təkə, çəpiş və gənc heyvanlar üçün ayrı-ayrı nizamlanıb, heyvanların sağlamlığı və rahat saxlanması üçün lazımi şərait yaradılıb. Təsərrüfat ən müasir ferma avadanlığı - avtomatik yönəltmə və yemləmə, “DeLaval” şirkətindən 2x36 paralel sağım sistemi və xüsusi texnikalarla (bobcat, traktorlar, qoşqular, ekskavator, yem paylayan vaqonlar və s.) təchiz edilib, işçilərin çalışmaları və istirahəti üçün hər cür şərait yaradılıb.
Hollandiya və Fransadan məhsuldarlığına və südünün keyfiyyətinə görə ən yüksək göstəricilərə malik “Saanen” və “Alpin” cinslərindən olan 4496 baş keçi gətirilib. Yerli iqlimə asanlıqla uyğunlaşan, diri çəkisi 50-55 kiloqram, südünün yağlılığı 4-4,6 faiz olan bu keçilərin hər birindən 1 laktasiya dövrü üçün 800-1200 litr süd sağmaq olur.
Təsərrüfatda keçilərin yemlənməsinə diqqətlə yanaşılır və yem rasionunun tərkibi südün keyfiyyətindən və miqdarından asılı olaraq dəyişilir. Keçilər keyfiyyətli yonca, arpa, xüsusi süd yemi, quru yem və müəyyən edilmiş normalarda mərmər tozu, duz, kəpəklə yemlənir.
Keçilərdən bir gündə orta hesabla 2 tondan çox süd sağılır. Təsərrüfatın süd emalı sexində baytar-sanitariya qaydalarına ciddi əməl olunur. Burada motal pendiri, duzlu pendir, təzə pendir, qəlib pendiri və şüyüdlü pendir hazırlanır.
Keçi südü inək südünə nisbətən yüngül və dadlıdır. Tərkibinə görə ana südünə yaxın olan keçi südü kalsium, maqnezium, vitaminlər və digər minerallarla zəngindir. Allergiya riskinin olmaması, qastrit, mədə-bağırsaq xəstəliklərinə qarşı müalicəvi xüsusiyyəti keçi südünün əsas üstünlüklərindən sayılır. Odur ki, keçi südünə ölkəmizdə böyük tələbat var.
Keçilər digər ev heyvanlarına nisbətən xəstəliklərə daha davamlıdır. Buna baxmayaraq xəstəliklərə qarşı mütəmadi olaraq profilaktiki tədbirlər həyata keçirilir, heyvanlarda vaxtaşırı qan təhlilləri aparılır.
Bu yaxınlarda fermaya İspaniyadan 900 baş “Asaf” cinsli və 11 baş “Şarole” cinsli qoyunlar da gətirilib. “Ətlik-südlük istiqamətli “Asaf” cinsli qoyunların laktasiya dövründə süd verimi 250-450 litrdir. Bu qoyunlar yerli qoyun cinsləri ilə müqayisədə 5-8 dəfə çox süd verirlər. Ətlik istiqamətli “Şarole” cinsli qoyunların 1 yaşında ət verimi 55-60 kiloqramdır. Bu qoyunlar gələcəkdə yaradılacaq ailə təsərrüfatlarına da veriləcəkdir. Bu yaxınlarda təsərrüfata daha 1169 cins qoyun gətiriləcəkdir.
Keçi təsərrüfatında qazanılan uğurlar fərdi təsərrüfat sahiblərində də bu sahəyə maraq oyadıb. Odur ki, damazlıq keçi və qoyunlardan ibarət kiçik fermer təsərrüfatlarının yaradılması üçün ailələrə kömək ediləcəkdir.
Regionda belə bir təsərrüfatın yaradılması ölkədə uğurla reallaşan iqtisadi siyasətin məntiqi nəticəsi, sahibkarlığa göstərilən dövlət qayğısının təzahürüdür.
Tahir Ağaməmmədov
AZƏRTAC-ın müxbiri
Bölmənin digər xəbərləri
