Azərbaycandakı sabit durum ulu öndər Heydər Əliyevin milli barışıq və həmrəylik strategiyasının təntənəsidir
Bu fikir Bakı Beynəlxalq Multikulturalizm Mərkəzində “Heydər Əliyev irsi və zamanın çağırışları” mövzusunda keçirilən beynəlxalq konfransda səsləndirilib
Bakı, 16 iyun, AZƏRTAC
Bakı Beynəlxalq Multikulturalizm Mərkəzində (BBMM) 15 İyun - Milli Qurtuluş Günü münasibətilə “Heydər Əliyev irsi və zamanın çağırışları” mövzusunda beynəlxalq konfrans keçirilib.
Tədbirdə iştirak etmiş BBMM-in əməkdaşları, Mərkəz nəzdində fəaliyyət göstərən nəzarət-təftiş komissiyalarının sədrləri, ölkədə yaşayan milli və dini icmaların rəhbərləri, eləcə də Mərkəzin xaricdə çalışan filial rəhbərləri (Skype vasitəsilə) müzakirə olunan məsələlərə münasibət bildiriblər.
BBMM-in icraçı direktoru, professor Azad Məmmədov Azərbaycanda tolerantlıq mühiti və ümumxalq konsensusunun yaradılmasında ulu öndər Heydər Əliyevin müstəsna rolunu vurğulayıb. Bildirib ki, 1993-cü il iyunun 15-də Azərbaycan xalqı təkidlə Heydər Əliyevi Naxçıvan Muxtar Respublikasından Bakıya dəvət etdi. Xalqın bu dəvəti Ümummilli Liderin siyasi konsepsiyasına, təcrübə və idarəçilik qabiliyyətinə inamının ifadəsi idi. Xalqın ən dar günündə, çoxlarının Azərbaycandan üz çevirdiyi bir vaxtda Heydər Əliyev xalqının çağırışına gəldi və vətəndaş müharibəsi ilə üz-üzə dayanan Azərbaycanı qardaş qanı tökülməsi təhlükəsindən xilas etdi. Bu, əsl dönüş nöqtəsi oldu, çünki bir ölkədə xarici təcavüz müqabilində iki ciddi separatizm dalğasının olduğu halda yalnız siyasi mahirlik və manevr qabiliyyətinə malik xadim münasib çıxış yolu tapa bilərdi.
Azərbaycandakı rus icmasının rəhbəri Mixail Zabelin, udi icma rəhbəri Robert Mibili, “Samur” ləzgi milli Mərkəzinin sədri Şair Həsənov, Talış Mədəniyyət Mərkəzinin rəhbəri Rafiq Cəlilov, Azərbaycanda yaşayan Axıska türklərinin “Vətən” İctimai Birliyinin sədri İbrahim Məmmədov, Avar Azərbaycan İctimai Birliyinin sədri Məhəmməd Nooyev, “Azəri” Tat Mədəniyyət Mərkəzinin sədri Maqsud Hacıyev, “Rohani” kürd Mədəniyyət Mərkəzinin rəhbəri Fəxrəddin Paşayev, Kazak Həmyerlilərinin Azərbaycan Cəmiyyətinin başçısı Viktor Mereşko, gürcü İcmasının sədri Rafael Qvaladze və başqa dini, milli icma rəhbərləri və nümayəndələri çıxış edərək bildiriblər ki, ölkədə müşahidə edilən stabil durum məhz Heydər Əliyevin milli barışıq və həmrəylik strategiyasının təntənəsi kimi qiymətləndirilməlidir. İştirakçıların fikrincə hazırda Azərbaycanda olan quruculuq potensialı ona görə ildən-ilə güclənib artır ki, milli və dini zəmində anlaşma şəraiti hökm sürür və insanlar hamının bərabərhüquqlu olmasından bəhrələnir. Heydər Əliyevin vaxtilə “Azərbaycanın çoxmədəniyyətliliyi bizim ən böyük varlığımız və sərvətimizdir” fikri özünü əyani tərzdə doğruldur. Millətlərarası münasibətlərin harmonik şəkildə inkişaf etməsi ümumi Azərbaycan evində inkişaf meyillərinin sabit axarla davam etməsinə imkanlar yaradır və konfrans iştirakçıları buna son illərin təcrübəsindən əyani nümunələrə söykənərək misallar gətiriblər.
Konfransa “Skype” vasitəsilə qoşulmuş BBMM-in xarici filial rəhbərləri Azərbaycan multikultural modelinin xaricdə müzakirə obyekti olub, örnək kimi tədqiq edilməsini artıq mütərəqqi ənənənin beynəlxalq aləmdə təsdiqini tapması kimi qiymətləndiriblər.
Almaniyadakı Drezden filialının direktoru, doktor Birgit Vaysgerber bu haqda danışarkən
deyib: “Biz Almaniya ictimaiyyəti, alim və mütəxəssisləri arasında Azərbaycan multikulturalizminin açar rolu oynaması barədə diskussiya və debatlarda iştirak edəndə ona görə çətinlik çəkmirik ki, postsovet ölkəsi bu sahədə özünün uğurlu modelini tapıb. Modelin ən üstün cəhəti isə ondan ibarətdir ki, Azərbaycan son onilliklər ərzində reallığa uyğun konseptual mexanizmlərdən istifadə edib. Bu prosesdə ulu öndər Heydər Əliyevin rolu danılmazdır. O, hələ ötən əsrin ən qızğın dövrlərində mürəkkəb sayılan beynəlmiləl problemlərdən heç vaxt çəkinmirdi, onlara arxa çevirmirdi, çünki onlarla bağlı aydın və adekvat baxışları formalaşmışdı. Ona görə də o, tez bir zamanda həll modellərini irəli sürməyə çətinlik çəkmirdi. Bugünkü Azərbaycanın müdrikliyi isə ondan ibarətdir ki, ölkə özünü təsdiqləmiş konsepsiyanı yaşadır, onu məharətlə indiki şəraitə adaptasiya etdirir”.
Rusiyadakı Moskva filialının rəhbəri, psixologiya elmlər namizədi Natalya Krasovskaya isə konfransa bağlantı zamanı bildirib: “Azərbaycan modelinin üstünlüyü fərqliliklər vəhdətini yeni orijinal konfiqurasiyalarla zənginləşdirməkdədir. Bu yol zamanın tələblərinə tam cavab verir. Quruculuq potensialına malik xalqlar çətin imtahan və böhranlardan qurtulan kimi intibah yoluna tez çıxırlar. Çünki bu, onların mədəni-mənəvi tələbatından irəli gələn istəkdir və vaxtilə güclü siyasətçi Heydər Əliyev bu xüsusiyyət və incə özəllikləri duyaraq öz xalqına arxalanıb sərt siyasi çağırışlara adekvat cavablar tapa bilmişdi”.
Portuqaliyanın Lissabon filialının rəhbəri, professor Terza Damsio isə konfrans iştirakçıları ilə fikirlərini bölüşərək bildirib ki, onun da xalqı 1974-cü ildə diktatura rejimi ilə mübarizədən xilas olarkən qurtuluşun nə olduğunu öz hissiyyatı ilə yaşayıb: “Azərbaycanın bugünkü sabit və ümidverici mənzərəsi, inkişafı artıq onu göstərir ki, Heydər Əliyev nahaq yerə müasir Azərbaycanın memarı sayılmır. O, əsl siyasi nəhəng olduğundan ölkəsində və onun hüdudlarından uzaqda həm tanınır, həm də rəğbətlə qarşılanır. Böyük şəxsiyyət böyük istəyə layiqdir”.
Bölmənin digər xəbərləri
