AZƏRBAYCANIN AVROPAYA VƏ AVRATLANTİK STRUKTURLARA İNTEQRASİYASI MƏSƏLƏLƏRİ GENİŞ MÜZAKİRƏ OLUNMUŞDUR
Xarici İşlər Nazirliyinin mətbuat mərkəzindən AZƏRTAC-a bildirmişlər ki, nazir ölkəmizdə aparılan demokratik islahatlar və dövlət quruculuğu sahəsində görülən işlər barədə qonağa ətraflı məlumat vermişdir.
Görüşdə ölkəmizdə sosial-siyasi durum, xarici siyasətimizin başlıca istiqamətləri ətrafında geniş fikir mübadiləsi aparılmışdır.
Azərbaycanın Avropaya və Avratlantik strukturlara inteqrasiya siyasəti yolunda olduğunu söyləyən nazir, NATO ilə “Sülh naminə tərəfdaşlıq” Proqramı və Fərdi Tərəfdaşlıq Fəaliyyəti Planı, həmçinin Avropa İttifaqı ilə Qonşuluq Siyasəti çərçivəsində əməkdaşlıq apardığını qonağın diqqətinə çatdırmışdır. Nazir qeyd etmişdir ki, Ermənistan-Azərbaycan, Dağlıq Qarabağ münaqişəsi, respublikamızın ərazisinin 20 faizinin Ermənistan tərəfindən işğalı və bir milyona qədər insanın qaçqın və məcburi köçkün düşməsi nəticəsində yaranmış vəziyyət təkcə ölkəmizdə deyil, bütün regionda demokratiya və siyasi sabitliyin tam formalaşmasında və beləliklə, demokratik Avropa ailəsinə inteqrasiya siyasətində başlıca maneəyə çevrilmişdir.
Münaqişənin həlli yolları və prinsipi ilə bağlı qonağın suallarına cavabında nazir qeyd etmişdir ki, münaqişə Dağlıq Qarabağın erməni və azərbaycanlı əhalisinə ən yüksək muxtariyyət statusu verməklə Azərbaycanın dünya ictimaiyyəti tərəfindən tanınmış ərazi bütövlüyü prinsipi çərçivəsində həll edilməlidir. Aparılmış sülh danışıqları prosesi ilə bağlı söhbətində Praqa prosesinə toxunan nazir demişdir ki, bu proses münaqişənin həll yolunu özündə cəmləşdirir. Qeyd edilmişdir ki, əvvəlcə Dağlıq Qarabağın ətrafındakı işğal olunmuş ərazilərdən işğalçı qüvvələr çıxarılmalı, sonra müzakirə olunan bir sıra digər komponentlər, həmçinin qaçqın və məcburi köçkünlərin öz doğma torpaqlarına qaytarılması, regiondakı bütün nəqliyyat və kommunikasiya xətlərinin bərpa edilməsi üzrə razılıq əldə edilməsi Dağlıq Qarabağın statusunun müəyyənləşdirilməsi üçün daha əlverişli mühit yaratmış olar. Münaqişənin həllində dünya ictimaiyyətinin və beynəlxalq təşkilatların dəstəyinin zəruriliyi də vurğulanmışdır.
Münaqişədən əvvəlki demoqrafik vəziyyətlə bağlı qonağın suallarına cavabında nazir demişdir ki, işğaldan əvvəl Dağlıq Qarabağın azərbaycanlı əhalisinin sayı 40 min nəfərdən artıq olmuşdur ki, onlar əsasən hazırkı danışıqların mövzusu olan Şuşa şəhərində və digər şəhər və qəsəbələrdə daha sıx yaşayırdılar. Ermənistan işğal olunmuş ərazilərdə demoqrafik vəziyyəti dəyişdirmək məqsədi ilə bu ərazilərdə qeyri–qanuni məskunlaşdırma siyasəti həyata keçirmişdir və bunu, məsələni araşdırmış ATƏT-in faktaraşdırıcı missiyasının müvafiq hesabatında da görmək olar.
Sonra ölkəmizdə həyata keçirilən iqtisadi islahatlar barədə geniş fikir mübadiləsi aparılmışdır. Ölkəmizin mühüm strateji-coğrafi mövqedə yerləşdiyini diqqətə çatdıran nazir, Azərbaycanın təşəbbüsü ilə reallaşan Bakı-Tbilisi-Ceyhan, Bakı-Tbilisi-Ərzurum və Bakı-Tbilisi-Qars kimi irimiqyaslı enerji və nəqliyyat layihələri barədə qonağa ətraflı məlumat vermişdir.
Azərbaycanın Avropa İttifaqı, NATO və MDB ilə bağlı çoxistiqamətli xarici siyasəti ilə əlaqədar qonağın suallarına cavabında nazir demişdir ki, belə əlaqələr qarşılıqlı iqtisadi-siyasi maraqlardan irəli gələn əməkdaşlıq prinsipinə əsaslanır.
Görüşdə Azərbaycanın regionun digər dövlətləri ilə münasibətləri və bu sahədəki perspektivlər, dünyada və Avropada gedən proseslər, Avropanın gələcəyi və sair mövzularda da geniş fikir mübadiləsi aparılmışdır.
Sonra respublikamızda keçiriləcək parlament seçkilərinə hazırlıq işlərinin gedişi və Azərbaycan Prezidentinin “Azərbaycan Respublikasının Milli Məclisinə seçkilərin hazırlanması və keçirilməsi ilə bağlı təxirəsalınmaz tədbirlər haqqında” 2005-ci il 25 oktyabr tarixli Sərəncamında qarşıya qoyulan vəzifələr barədə qonağa ətraflı məlumat verilmişdir. Bildirilmişdir ki, Sərəncamdan irəli gələn vəzifələr, həmçinin barmaqların mürəkkəblə işarələnməsi seçkilərdə “bir seçici – bir səs” prinsipinin təminatına yönəlmişdir.
Görüşdə qarşılıqlı maraq doğuran digər məsələlər də müzakirə olunmuşdur.
Bölmənin digər xəbərləri
