Azərbaycanın Ermənistan üzərində qələbəsi ölkəmizdə həyata keçirilən məqsədyönlü siyasətin nəticəsidir
Bakı, 10 noyabr, AZƏRTAC
Ermənistanın hərbi təcavüzünə qarşı Azərbaycan Ordusunun sentyabrın 27-dən əks-hücum əməliyyatı ilə başlanan Vətən müharibəsi və ya İkinci Qarabağ müharibəsi noyabrın 10-da qələbə ilə başa çatdı. Azərbaycanın bu qələbəsi ölkədə həyata keçirilən məqsədyönlü siyasətin nəticəsidir. Bu siyasət nəticəsində ölkədə hər bir dövlətin həsəd apara biləcəyi birlik təmin edildi.
Bu fikirləri AZƏRTAC-a açıqlamasında tarix elmləri doktoru, professor Kərim Şükürov deyib. O bildirib ki, Azərbaycan dövləti, xalqı və ordusunun birliyi müharibə sınağı qarşısında sarsılmaz bünövrəyə çevrildi. Azərbaycanın bütün maddi və mənəvi resursları qələbəyə hədəfləndi. Müzəffər Ali Baş Komandan İlham Əliyevin illərin təcrübəsindən irəli gələn diplomatik istedadı, yenilməz ordu yaratması qələbədə həlledici rol oynadı.
Azərbaycanın böyük mütəfəkkirləri tarixən ölkə həyatında erməni faktorunun dağıdıcı rolundan bəhs edib, onu aradan qaldırmaq üçün müəyyən ideyalar irəli sürüblər. Bitməyən erməni təcavüzləri, onların Azərbaycana gətirdiyi müsibətlər bu sahədə yeni baxışlar tələb edirdi. Prezident İlham Əliyev xalqa müraciətləri, kütləvi informasiya vasitələrinə müsahibələri və digər çıxışları ilə bu sahəyə yeni nəfəs gətirdi. Bu çıxışlar qələbə əldə olunması ilə yanaşı, onun qorunub saxlanması, daha da inkişaf etdirilməsi və möhkəmləndirilməsi üçün də olduqca önəmlidir.
Azərbaycan Respublikasının Prezidenti, Ermənistan Respublikasının baş naziri və Rusiya Federasiyasının Prezidentinin imzaladığı bəyanatla Müzəffər Ali Baş Komandan İlham Əliyev yeni tarix yazdı. Bu müqavilə Azərbaycanın diplomatiya tarixində xüsusi yer tutacaq. Çünki bu bəyanatla təkcə Ermənistan deyil, dünya erməniliyi və onların havadarları da Azərbaycan qarşısında təslim oldu.
Tarixçi alim Kərim Şükürov diqqətə çatdırıb ki, Azərbaycan müharibə cəbhəsində əldə etdiyi qələbələrlə yanaşı, Ermənistanın işğal dövründə barbarcasına dağıtdığı, maddi-mədəni irsini talan etdiyi, ekoloji fəlakət törətdiyi torpaqlarımızın idarəsi, dəyən ziyanın hesablanması və bərpa işləri ilə də bağlı çox əhəmiyyətli planlar irəli sürüb. Bu sahələr üzrə Prezidentin fərman və sərəncamları ciddi tarixi perspektivdən xəbər verir: “Sözsüz ki, bu qələbə Azərbaycanın dostlarını sevindirdiyi kimi, müxtəlif miqyaslı anti-Azərbaycan qüvvələrə də təsir edəcək. Əminəm ki, xalqımız Müzəffər Ali Baş Komandanın ətrafında bir yumruq kimi birləşərək bütün çətinliklərin öhdəsindən gələcək. Azərbaycanın Ermənistan üzərində tarixi qələbəsinin yaratdığı ümummilli ruh yüksəkliyi, özünəinam pandemiya kimi ümumbəşəri bəlaya qarşı birləşməyə və onun üzərində qələbəyə də mühüm stimul olacaq”.
Bölmənin digər xəbərləri
