Azərbaycanın haqq işinə xalqın dəstəyi tamdır - ŞƏRH
Bakı, 2 oktyabr, AZƏRTAC
Sentyabrın 30-da Prezident İlham Əliyev Aşıq Ələsgərin abidəsinin açılış mərasimində iştirak edərkən çıxışı zamanı bir sıra məsələlərə toxunub. Bu çıxış, həm də xalqın birliyini və tarixə olan ehtiramını önə çəkən bir mesaj idi. Aşıq Ələsgər və onun yaradıcılığı Azərbaycan xalqının qəlbində əbədi yer tutur və böyük əhəmiyyət kəsb edir. Məhz bu səbəbdən Aşıq Ələsgərin 200 illik yubileyi dövlət səviyyəsində qeyd edilmişdi. Hazırda isə onun abidəsinin ucaldılması dövlətimizin başçısının mədəni irsimizin qorunmasına verdiyi önəmdən irəli gəlir.
XX əsrdə Qərbi azərbaycanlılar üç böyük deportasiyaya məruz qalıb və bu deportasiyalar yaddaşımızda acı izlər buraxıb. Qərbi azərbaycanlı olaraq Aşıq Ələsgər də bu proseslərdən təsirlənmişdi.
Bunu AZƏRTAC-a açıqlamasında COP29 Təşkilat Komitəsinin üzvü, Milli Məclisin deputatı Pərvanə Vəliyeva deyib.
Deputat xatırladıb ki, Aşıq Ələsgərin abidəsi ermənilər tərəfindən dağıdılıb, həmçinin Qarabağda, Şərqi Zəngəzurda Azərbaycan xalqına aid tarixi abidələr, məscidlər, saraylar, qəbiristanlıqlar da erməni vandalları tərəfindən məhv edilib. Əsrlər boyu davam edən bu vandalizm və ədalətsizlik bütün dünyanın gözü qarşısında baş verib.
“Ermənistan üç onillik ərzində Azərbaycanın mədəni irsini geniş miqyasda dağıdıb, talan və vandalizmə məruz qoyub. Ölkəmizin işğal edilmiş ərazilərində yerləşən tarix və mədəniyyət abidələrindən 100 mindən çox artefakt oğurlanaraq qanunsuz olaraq Ermənistana aparılıb. Qərbi Zəngəzurda, Qafanda, İrəvanda, Göyçədə, Nüvədidə və Vedidə Ermənistan tərəfindən azərbaycanlılara qarşı aparılan aqressiv siyasət nəticəsində azərbaycanlıların yaşadığı suveren ərazisinin böyük bir hissəsi işğal edilib, etnik təmizləmələr həyata keçirilib, azərbaycanlıların fiziki izləri bütün Ermənistanda ardıcıl olaraq qəsdən məhv edilib, onların tarixinin bu torpaqlardan silinməsi siyasəti həyata keçirilib”, - deyə deputat əlavə edib.
Pərvanə Vəliyeva xatırladıb ki, Azərbaycanın bütün yaşayış məntəqələrinin və toponimlərinin adları dəyişdirilib, Azərbaycanın tarixi-mədəni irsi, məscidləri və qəbiristanlıqları qəsdən hədəfə alınıb, vandal hərəkətlərə məruz qalıblar. Azərbaycan tarixi-mədəni irsinə qarşı törədilmiş vəhşilikləri dəfələrlə beynəlxalq ictimaiyyətin diqqətinə çatdırıb, UNESCO və digər beynəlxalq təşkilatlara bu irsin qorunmasını təmin etmək üçün təcili tədbirlərin təxirə salınmadan həyata keçirilməsinin zəruriliyini bəyan edib. Azərbaycan hökuməti UNESCO Katibliyinin texniki missiyasının göndərilməsi təklifini əvvəldən alqışlamış və belə bir missiyanın göndərilməsinin zəruriliyini tələb etmişdi. Bu istək son 30 ildə, işğal zamanı çoxsaylı platformalarda UNESCO-nun diqqətinə çatdırılıb. Təəssüf olsun ki, Ermənistan hər dəfə Azərbaycanın işğal olunmuş ərazilərinə missiyanın göndərilməsinə qarşı çıxıb və bu da UNESCO-nun hesabatında etiraf edilib.
“Bu gün Azərbaycan üçün müharibə başa çatıb, Azərbaycan öz suverenliyini tam bərpa edib, bu regionun əsl və tarixi simasını və keçmiş ruhunu dirçəltmək üçün tammiqyaslı yenidənqurma və bərpa işlərinə başlanılıb.
Prezident İlham Əliyev Qarabağdan və Şərqi Zəngəzurdan olan insanların doğma torpaqlarına qayıtmasını böyük nailiyyət kimi qiymətləndirir və gələcəkdə Qərbi Azərbaycana qayıdışın da mümkün olacağını bildirir. Təbii ki, bu, mənim kimi bütün Qərbi azərbaycanlılara böyük ümid verir. Prezident Aşıq Ələsgərin ermənilər tərəfindən dağıdılmış abidəsinin gələcəkdə Ağkilsə kəndində bərpa ediləcəyini də bildirdi. Bu ifadələr həqiqətən də doğma yurd həsrəti ilə yaşayan hər bir Qərbi azərbaycanlının sevincinə səbəb olub.
Prezident suverenliyin tam bərpa edilməsinin xalqda nikbinlik yaratdığını və gələcək hədəflərin həm strateji, həm də taktiki baxımdan düzgün seçilməsinin vacibliyini vurğuladı. Azərbaycanın haqq işinə xalqın dəstəyi tamdır və bu dəstək bizə daim qələbələr gətirəcək”, - deyə deputat vurğulayıb.
Bölmənin digər xəbərləri
