Uşaqların süni intellektlə emosional bağ qurması narahatlıq yaradır - Araşdırma
Bakı, 1 oktyabr, AZƏRTAC
Smartfon və süni intellekt uşaqların gündəlik həyatının ayrılmaz hissəsinə çevrilir. Lakin mütəxəssislər xəbərdarlıq edirlər ki, ekran qarşısında keçirilən uzun saatlar və rəqəmsal dostlara artan maraq real insan münasibətlərini kölgədə qoya bilər.
AZƏRTAC İtaliyanın “Askanews” informasiya agentliyinə istinadla xəbər verir ki, bununla bağlı Karolina Fondu araşdırma aparıb. Tədqiqata əsasən, hər dörd yeniyetmədən biri emosional çatbotlardan istifadə edir. Hər üç gəncdən biri isə rəqəmsal dost axtarır. Araşdırmada gənclərin gündə 8-12 saat internetdə vaxt keçirdiyi də müəyyənləşib.
Mütəxəssislərin diqqət çəkdiyi məqamlardan biri isə yeniyetmələrin süni intellektlə emosional ünsiyyət qurmasıdır. Çatbotlar onları mühakimə etmir, dinləyir və bəzi hallarda yeniyetmələr tərəfindən dost kimi qəbul edilir.
Karolina Fondunun baş katibi İvano Zoppi bildirib ki, uşaqların rəqəmsal dünyada təhlükəsizliyi yalnız qadağalarla təmin edilə bilməz. Onun sözlərinə görə, valideynlərin uşaqları dinləməsi, onlarla vaxt keçirməsi və birlikdə oynaması daha vacibdir.
Bu səbəbdən Fond ailələr üçün telefonsuz vaxt keçirməyə yönəlmiş xüsusi tədbir təşkil edib. Tədbir zamanı valideynlər və uşaqlar birgə oyunlara qatılaraq həm əylənib, həm də real ünsiyyətin əhəmiyyətini təcrübədən keçiriblər.
Mütəxəssislər hesab edirlər ki, uşağın rəqəmsal dünyada sağlam münasibət qurmasının əsas yollarından biri onun real həyatda özünü dinlənilən, başa düşülən və dəyərli hiss etməsidir.
Bölmənin digər xəbərləri
