Müəllimlikdən turizm bələdçiliyinə, oradan magistraturaya - Dövlət Proqramı qalibinin hekayəsi
Bakı, 1 oktyabr, AZƏRTAC
Xaricdə təhsil bəzən yalnız yeni ixtisas və universitet seçimi deyil, insanın əvvəlki təcrübələrini yeni istiqamətlərlə birləşdirmək imkanı da yaradır. Selcan Cəbrayılovanın təhsil və peşə yolu da bu baxımdan diqqət çəkir. Azərbaycan Dillər Universitetində ingilis dili müəllimliyi ixtisası üzrə bakalavriat təhsili alan Selcan Cəbrayılova tələbəlik illərində müxtəlif beynəlxalq layihə və tədbirlərdə könüllü kimi iştirak edib. Bu təcrübə onda ölkəmizin tarixini və mədəniyyətini xarici qonaqlara tanıtmağa maraq yaradıb. O, 2022-ci ildən peşəkar turizm bələdçisi kimi fəaliyyət göstərərək Dövlət Turizm Agentliyi və Azərbaycan Turizm Bürosunun birgə təşkil etdiyi sertifikatlaşdırma imtahanlarını uğurla keçib və ölkəmizdəki rəsmi bələdçilərdən biri olub. İndi isə Selcan Cəbrayılova “Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2028-ci illər üçün Dövlət Proqramı” çərçivəsində Avstraliyanın Sidney Universitetində dövlət siyasəti ixtisası üzrə magistratura təhsili alacaq.
Selcan Cəbrayılova AZƏRTAC-a açıqlamasında bildirib ki, magistratura təhsili almaq uzun müddətdir qarşısına qoyduğu məqsədlərdən biri olub. Lakin 2022-ci ildən etibarən intensiv şəkildə turizm bələdçiliyi fəaliyyəti ilə məşğul olması akademik inkişafını bir müddət ikinci plana keçirib.
“2025-ci ildən etibarən magistratura təhsili barədə daha ciddi düşünməyə başladım. Turizm sahəsində qazandığım təcrübə mənə aydın göstərdi ki, ölkəmizin turizm və mədəniyyət sahəsində böyük potensialı var və bu potensialı daha yüksək səviyyəyə qaldırmaq üçün sistemli yanaşmaya ehtiyac duyulur. Anladım ki, əgər Azərbaycan turizm siyasətinə köklü, yenilikçi və dayanıqlı töhfələr vermək istəyirəmsə, beynəlxalq standartlara cavab verən keyfiyyətli təhsilə sahib olmalıyam. Beləliklə, gənclərə tam təqaüd və dəstək verən Dövlət Proqramına müraciət etmək qərarına gəldim. Dünyanın nüfuzlu universitetlərində təhsil almaq, potensialımızı inkişaf etdirmək və gələcəkdə qazandığımız bilik və təcrübə ilə ölkəmizin inkişafına töhfə vermək mümkündür. Neft kapitalının insan kapitalına çevrilməsi istiqamətində həyata keçirilən xüsusi təhsil siyasətinə və Dövlət Proqramına göstərilən dəstəyə görə ölkə rəhbərinə təşəkkürümü bildirirəm. Müraciət prosesi mənim üçün həm böyük məsuliyyət, həm də ciddi zəhmət tələb edən mərhələ oldu. Eyni vaxtda həm intensiv çalışır, həm imtahanlara hazırlaşır, həm müxtəlif universitetlərin şərtlərini araşdırır, həm də müsahibələrə hazırlaşırdım. Hətta işə getmədiyim, istirahət günlərimdə belə vaxt itirməyib kitabxanaya gedirdim. Bəzən o qədər yorulurdum ki, özüm də bilmədən kitabxanada masanın üstündə yatıb qalırdım. Səhərlər işə gecikməmək üçün dalbadal, bir dəqiqə fərqlə 5-6 həyəcan siqnalı qururdum. Bu dövrü özüm üçün mərhələlərə bölmüşdüm və sanki çoxetaplı bir oyun qurmuşdum. Məsələn, dil sertifikatına hazırlaşanda telefonumun ekranına hədəflədiyim C1/C2 səviyyəli IELTS sertifikatının fotosunu qoyurdum. Universitetlərə müraciət dövründə isə ekran şəklimi davamlı çalışan bir insan fotosu və Sidney şəhərinin görüntüsü ilə əvəzləyirdim. Hər mərhələni keçdikcə içimdə daha böyük həvəs və stimul yaranırdı. Məhz bu daxili motivasiya və zəhmət mənə bütün çətinliklərin öhdəsindən gəlməyə kömək etdi. Akademik bazam ingilis dili müəllimliyidir, daha sonra isə turizm sahəsində praktiki təcrübə qazanmışam. Birbaşa dövlət siyasəti kimi kompleks bir sahəyə keçid edərkən mənə elə bir təhsil proqramı lazım idi ki, pedaqoji və praktiki təcrübəmi bu yeni sahə ilə harmonik şəkildə birləşdirsin və rahat adaptasiya imkanı yaratsın. Sidney Universiteti məhz bu balansı mənə verirdi. Eyni zamanda, Sidney şəhərinin də ölkəmiz kimi multikultural mühitə malik olması bu seçimi mənim üçün qətiləşdirdi. Məqsədim Sidney Universitetində əldə edəcəyim bilik və təcrübəni Azərbaycanda turizm siyasətinin inkişafına tətbiq etməkdir. “Azərbaycan 2030: sosial-iqtisadi inkişafa dair Milli Prioritetlər” sənədində qeyri-neft sektorunun, xüsusilə dayanıqlı iqtisadiyyatın inkişafı əsas hədəflərdən biri kimi göstərilib. Hesab edirəm ki, qeyri-neft sektorunun əsas dayaqlarından biri turizm olmalıdır. Çünki ölkəmizdə turizmin inkişafı üçün lazımi təbii, tarixi, mədəni və insani potensial mövcuddur.
Əsas hədəfim Sidney Universitetində qazanacağım biliklərlə Azərbaycana turizm siyasəti üzrə yeni və müasir yanaşmalar gətirməkdir. Beynəlxalq təcrübədə “Policy Transfer”- siyasətin transferi adlanan anlayış var. Arzum budur ki, biz elə uğurlu və innovativ turizm modeli formalaşdıraq ki, yalnız başqalarından öyrənməyək, əksinə, digər ölkələr Azərbaycanın turizm siyasətindən bəhrələnsin və bizim təcrübəmizi tətbiq etsinlər. Ölkəmizin resursları və gənclərimizin intellektual potensialı buna imkan verir. Bəzən sadəcə düzgün, keyfiyyətli və yerində olan beynəlxalq təhsil çatışmır ki, biz də bu Dövlət Proqramı sayəsində həmin təhsili alaraq böyük hədəfləri reallaşdıraq”, - deyə Dövlət Proqramı qalibi qeyd edib.
Selcan Cəbrayılova Dövlət Proqramına müraciət etmək istəyən gənclərə, ilk növbədə, təhsillə bağlı konkret məqsəd müəyyənləşdirməyi tövsiyə edib: “Gənclər özlərinə bu sualı verməlidirlər: Mən seçdiyim bu sahədə real addımlar ata biləcəyəmmi? İki ili boşuna keçirməmək üçün konkret bir planım, bir hədəfim varmı? Təhsil almaq böyük məsuliyyətdir. İnsan nə üçün burada olduğunu və gələcəkdə haraya gəlib çıxmaq istədiyini aydın görməlidir. Konkret məqsədiniz olanda daxilinizdəki arzu sizə böyük stimul verir. Dövlət Proqramına müraciət edəcək gənclərə tövsiyəm səbirli olmaq və çox araşdırmaqdır. Xüsusilə müsahibə mərhələsi çox həlledici an olur. Əgər siz niyə təhsil aldığınızı dərindən dərk edirsinizsə, ölkənizə verəcəyiniz töhfəni aydın ifadə edə bilirsinizsə, müsahibədə də özünüzü daha rahat ifadə edə bilərsiniz. Bir sözlə, sistemli çalışmaq, səbirli olmaq və gələcək həyatınızı şəkilləndirəcək böyük bir məqsəd tapmaq lazımdır. Qarşınızda belə bir məqsəd olduqda, çəkilən bütün zəhmət və əziyyətlər də bir anın içində öz dəyərini tapır”.
Müxbir-Nərmin Muradzadə
Bölmənin digər xəbərləri
