AZƏRBAYCANIN İSLAMABADDAKI SƏFİRLİYİ RESPUBLİKA GÜNÜ MÜNASİBƏTİLƏ TƏNTƏNƏLİ QƏBUL KEÇİRMİŞDİR
Pakistanda rəsmi səfərdə olan qardaş Türkiyə Respublikasının daxili işlər naziri Əbdülqadir Aksu və onu müşayiət edən nümayəndə heyəti də qəbulda fəal iştirak edərək ölkəmiz və Prezidentimiz İlham Əliyev haqqında xoş sözlər söyləmişlər. Pakistanın dini işlər naziri Məhəmməd İcaz ul Haq ölkəsinin Prezidenti və hökuməti adından Respublika günü münasibətilə Azərbaycan xalqını və Prezident İlham Əliyevi təbrik etmişdir.
Səfirliyin hazırladığı material üzrə Pakistanın nüfuzlu “Səs” jurnalı milli bayramımıza xüsusi buraxılış həsr etmişdir. Buraxılışın üz qabığında və içərisində Azərbaycanın dövlət bayrağının şəkli, himnimizin mətni və Prezident İlham Əliyevin portreti verilmişdir. Nəşrdə Azərbaycan Prezidentinin tərcümeyi-halı, 2004-cü il aprelin 29-da Strasburqda AŞPA-nın yaz sessiyasının iclasındakı nitqinin mətni, xarici işlər naziri Elmar Məmmədyarovun bu il may ayının 12-də Strasburqda Avropa Şurası Nazirlər Kabinetinin iclasında çıxışı, Respublika günü ilə əlaqədar səfir Eynulla Mədətlinin müraciəti, ölkəmizin tarixi, mədəniyyəti, iqtisadiyyatı haqqında məqalələr və məlumatlar, çoxlu fotoşəkil dərc edilmişdir.
Təntənəli qəbulda Azərbaycanın istiqlal günü ilə bağlı nüfuzlu “Pakistan observer”, “Nation”, “The News” və digər qəzetlərində dərc olunmuş materiallar, həmçinin, səfirliyin urdu dilində təkrar nəşr etdirdiyi “Heydər Əliyev və onun Azərbaycanı” adlı kitabı iştirakçılara paylanmışdır. Yerli mətbuat təntənəli qəbuldan fotoşəkillərin müşayiəti ilə reportajlar dərc etmişdir.
X X X
Səfirlik bundan üç gün əvvəl – mayın 25-də Pakistanın ən böyük təhsil ocaqlarından biri olan Qaydi Əzəm Universitetinin müdafiə və strateji təhqiqatlar fakültəsində Azərbaycan Demokratik Respublikasının 86-cı ildönümü ilə əlaqədar konfrans keçirmişdir. Konfransda ölkəmiz haqqında videofilm nümayiş olunmuş, səfir Eynulla Mədətli məruzə ilə çıxış etmişdir. Səfir konfrans iştirakçılarının Ermənistan-Azərbaycan, Dağlıq Qarabağ münaqişəsinə, respublikamızın MDB, NATO, AŞ və digər regional və beynəlxalq qurumlarla əlaqələrinə, ölkəmizin beynəlxalq terrorizmlə mübarizədəki roluna, dövlətimizin Pakistanla münasibətlərinə dair çoxsaylı suallarına ətraflı cavab vermişdir.
Bölmənin digər xəbərləri
