Azərbaycanın Liviyadakı səfirliyi Xocalı soyqırımı ilə bağlı bir sıra tədbirlər keçirmişdir
Bakı, 28 fevral (AZƏRTAC). Azərbaycanın Liviyadakı səfirliyi Xocalı soyqırımının iyirmi birinci ildönümü ilə əlaqədar bir sıra tədbirlər keçirmişdir.
Səfirlik tərəfindən hazırlanmış mətbuat məlumatı Liviyanın Xarici İşlər və Beynəlxalq Əməkdaşlıq Nazirliyinə, həmçinin ölkədəki diplomatik nümayəndəliklərə göndərilmişdir.
Səfirlikdən AZƏRTAC-a bildirmişlər ki, mətbuat məlumatı Azərbaycan Respublikası Prezidenti Administrasiyası ictimai-siyasi məsələlər şöbəsinin və AZƏRTAC-ın birgə layihəsi olan “Xocalı. XX əsrin soyqırımı” kitabı, alman tədqiqatçı Yohannes Raunun “Ermənistan və Azərbaycan arasında Dağlıq Qarabağ münaqişəsi. Qısa tarixi xülasə” kitabı (ərəb dilində) və ərəb dilində “Məhv edilmiş şəhər” sənədli filminin DVD formatında nüsxəsi ilə birlikdə Ümummilli Konqresin sədrinə, Müvəqqəti Hökumətin başçısına, xarici işlər və beynəlxalq əməkdaşlıq nazirinə, mədəniyyət və vətəndaş cəmiyyəti nazirinə, parlamentdə ən çox deputat mandatına sahib olan Milli Qüvvələr Alyansının başçısına, parlamentdə ikinci ən böyük fraksiya olan Ədalət və Quruculuq Partiyasının sədrinə, Liviya Arxiv və Tarixi Araşdırmalar Mərkəzinin və Liviya İnsan Hüquqları Fondunun idarə heyətlərinin sədrlərinə təqdim edilmişdir.
Eyni zamanda, Liviyanın aparıcı kütləvi informasiya vasitələrində Xocalı soyqırımı ilə bağlı məlumatların geniş yayılması təmin edilmişdir. Səfirliyin media nümayəndələri ilə keçirdiyi çoxsaylı görüşlərin nəticəsi olaraq “Qurina əl-Cədidə” qəzetində “Azərbaycan Xocalı qətliamını yad edir”, “Tadamun” xəbərlər agentliyinin internet səhifəsində “Azərbaycanın Tripolidəki səfirliyi Xocalı faciəsinin iyirmi birinci ildönümünü qeyd edir”, “Fəsəniyə” qəzetində “Azərbaycan tarixində ən dəhşətli faciələr. Xocalı”, “Brniq” qəzetində “Xocalı qətliamının iyirmi birinci ildönümü”, “Əl-Vatan əl-Libiyyə” elektron qəzetində “Azərbaycanın Tripolidəki səfirliyindən alınmış Xocalı qətliamına dair mətbuat məlumatı” başlıqlı məqalələr dərc olunmuşdur.
Həmçinin fevralın 23-də “Libya” dövlət televiziya kanalında ərəb dilində “Məhv edilmiş şəhər” sənədli filmi nümayiş etdirilmişdir.
Bölmənin digər xəbərləri
