Azərbaycanın Moldovadakı səfirliyi Xocalı faciəsi haqqında press-reliz yaymışdır
Kişineu, 15 fevral (AZƏRTAC). Azərbaycanın Moldovadakı səfirliyi Xocalı faciəsi haqqında bu ölkədə press-reliz yaymışdır. Sənəddə Ermənistan-Azərbaycan, Dağlıq Qarabağ münaqişəsi tarixində ən qanlı səhifə olan Xocalı soyqırımından bəhs edilir, erməni cəlladların və bu qanlı cinayətdə onlarla əlbir olanların - keçmiş SSRİ-nin 366-cı motoatıcı alayının şəxsi heyətinin törətdiyi vəhşiliklərin tam mənzərəsi təsvir edilir.
Press-relizdə xatırladılır ki, bu qanlı qırğın nəticəsində 613 nəfər, o cümlədən 63 uşaq, 106 qadın, 70 nəfər ahıl şəxs qətlə yetirilmiş, 8 ailənin bütün üzvləri məhv edilmişdir; 25 uşaq hər iki valideynini, 130 uşaq valideynlərindən birini itirmişdir. 487 nəfər, o cümlədən 76 uşaq yaralanmış, 1275 adam girov götürülmüş, 150 nəfər itkin düşmüşdür.
Press-relizdə bildirilir ki, dövlətə və vətəndaşların şəxsi əmlakına çox böyük ziyan vurulmuşdur. Vurğulanır ki, 1988-ci ilin fevral ayında Azərbaycan SSR-in Dağlıq Qarabağ Muxtar Vilayətində yaşayan etnik ermənilərin bu vilayəti Ermənistan SSR-ə birləşdirmək barədə qeyri-qanuni tələblərindən başlanmış Dağlıq Qarabağ münaqişəsi Ermənistan SSR-in hakim dairələrinin açıq-aşkar dəstəyinin, Sovet İttifaqının mərkəzi hakimiyyət orqanlarının üstüörtülü razılığının və fəaliyyətsizliyinin nəticəsi olmuşdur.
Press-relizdə daha sonra qeyd edilir ki, Xocalı şəhərində törədilmiş vandalizm aktının əsas təqsirkarları Azərbaycanın yaşayış məntəqələrinin atəşə tutulmasında iştirak etmiş erməni silahlı dəstələri və 366-cı motoatıcı alayın şəxsi heyəti, onlara əmrlər verən şəxslər, Ermənistanın indiki prezidenti Serj Sarkisyan və indiki müdafiə naziri Seyran Ohanyandır.
Xocalı faciəsinin törədilməsində iştirak etmiş ermənilərin və onların cinayət yoldaşlarının əməlləri insan hüquqlarının kobud şəkildə pozulması, beynəlxalq hüquq aktlarına - Cenevrə Konvensiyasına, İnsan Hüquqlarının Ümumi Bəyannaməsinə, Mülki və Siyasi Hüquqlar haqqında Beynəlxalq Pakta, İqtisadi, Sosial və Mədəni Hüquqlar haqqında Beynəlxalq Pakta, Uşaq Hüquqları Bəyannaməsinə, Fövqəladə Vəziyyətlərdə və Silahlı Münaqişələr Dövründə Qadınların və Uşaqların Müdafiəsi haqqında Bəyannaməyə və beynəlxalq hüququn digər aktlarına həyasızcasına etinasızlıqdır.
Diplomatlarımız tərəfindən hazırlanmış sənəddə vurğulanır ki, Xocalı faciəsi haqqında əsl həqiqət Azərbaycan xalqının ümummilli lider Heydər Əliyev hakimiyyətə qayıdandan sonra dünyaya çatdırılmışdır.
Azərbaycan Milli Məclisi (parlamenti) hər il fevralın 26-nı Xocalı soyqırımı günü elan etmişdir. Hər il fevralın 26-da saat 17:00-da Azərbaycan xalqı Xocalı qurbanlarının xatirəsini bir dəqiqəlik sükutla yad edir.
Qaçqın vəziyyətinə düşərək Azərbaycanın şəhər və rayonlarında müvəqqəti sığınacaq tapmış Xocalı sakinləri Dağlıq Qarabağ münaqişəsinin ədalətli həllini, Ermənistanın Azərbaycana qarşı təcavüzünə son qoyulmasını, respublikanın ərazi bütövlüyünün bərpa olunmasını gözləyirlər. Onlar dünya xalqlarına, dövlətlərə və beynəlxalq təşkilatlara müraciətlə onları haqqı və ədaləti müdafiə etməyə, Xocalıda törədilmiş terrorizm və etnik təmizləmə faktlarını pisləməyə çağırırlar.
Sənəddə deyilir: “Xocalı faciəsinin təqsirkarları, onun təşkilatçıları və icraçıları layiqli cəzalarını almalıdırlar. Cəzasız cinayət yoxdur və ola bilməz. XX əsrdə soyqırımı və etnik təmizləmələr tarixini əks etdirən qanlı səhifələr çox olmuşdur. Xocalı faciəsi belə səhifələrin ən dəhşətlilərindən biridir. Bu vəhşi cinayətdə bu və ya digər şəkildə əlil olmuş hər kəs hələlik yalnız öz vicdanı qarşısında məsuliyyət daşıyır, lakin bir gün gələcək, onlar bütün əməllərinə görə tarix məhkəməsi qarşısında cavab verəcəklər. Tarix hər şeyi yadda saxlayır!”.
Azərbaycan səfirliyinin press-relizi Moldova Respublikasının bütün hakimiyyət şaxələrində, Kişineuda akkreditə edilmiş diplomatik korpus arasında, Moldovanın ictimai təşkilatlarında və KİV-lərdə yayılmışdır.
Zeynal Ağazadə
AZƏRTAC-ın xüsusi müxbiri
Kişineu
Bölmənin digər xəbərləri
