Azərbaycanın xarici işlər naziri Nyu-Yorkda bir sıra görüşlər keçirib
Bakı, 30 sentyabr, AZƏRTAC
Azərbaycanın xarici işlər naziri Elmar Məmmədyarov BMT Baş Assambleyasının 70-ci sessiyası çərçivəsində bir sıra görüşlər keçirib.
Paraqvay Respublikasının xarici işlər naziri Eladio Loizaga ilə görüşdə Azərbaycan və Paraqvay arasında müxtəlif sahələrdə əməkdaşlığın inkişafı üçün yaxşı imkanların mövcud olduğu bildirilib, qarşılıqlı səfərlərin həyata keçirilməsinin, iki ölkənin Xarici İşlər nazirlikləri arasında siyasi məsləhətləşmələrin təşkilinin əhəmiyyəti qeyd edilib.
Görüşdə regional və beynəlxalq mövzular, o cümlədən Dənizə çıxışı olmayan inkişaf etməkdə olan ölkələr qrupu, Paraqvayın MERKOSUR-dakı fəaliyyəti, Azərbaycanın Latın Amerikası ölkələri ilə əlaqələri, habelə Ermənistan-Azərbaycan münaqişəsi barədə fikir mübadiləsi aparılıb.
Münaqişənin son vəziyyəti və danışıqlar prosesində Ermənistanın qeyri-konstruktiv mövqeyi barədə paraqvaylı həmkarına məlumat verən E.Məmmədyarov 2015-ci il sentyabrın 10-da Paraqvay Respublikasının Milli Konqresinin Deputatlar Palatasında müvafiq bəyanatın qəbul edilməsinin əhəmiyyətli olduğunu bildirib. O, həmkarını Azərbaycana səfərə dəvət edib. Dəvətə görə təşəkkürünü bildirən paraqvaylı nazir qarşılıqlı olaraq azərbaycanlı həmkarını da ölkəsinə səfərə dəvət edib.
Görüşün sonunda nazirlər “Azərbaycan Respublikasının Xarici İşlər Nazirliyi ilə Paraqvay Respublikasının Xarici İşlər Nazirliyi arasında siyasi məsləhətləşmələr haqqında Anlaşma Memorandumu” imzalayıblar.
x x x
Azərbaycan xarici siyasət idarəsinin rəhbəri Elmar Məmmədyarov Makedoniya Respublikasının xarici işlər naziri Nikola Poposki ilə də görüşüb.
Görüşdə iki ölkə arasında siyasi dialoqun inkişafından məmnunluq ifadə olunub. E.Məmmədyarov Azərbaycanın Balkan regionu ölkələri ilə əlaqələrin inkişafına xüsusi önəm verdiyini bildirilib. İkitərəfli siyasi əlaqələrin ruhuna uyğun olaraq, iqtisadi-ticarət əlaqələrinin və müqavilə-hüquq bazasının inkişaf etdirilməsinin vacibliyi vurğulanıb. Azərbaycan və Makedoniya arasında enerji, turizm, kənd təsərrüfatı və humanitar sahələrdə əməkdaşlığın inkişafı üçün əlverişli imkanların olduğu bildirilib. BMT və digər beynəlxalq təşkilatlar çərçivəsində iki ölkənin əməkdaşlığı və qarşılıqlı dəstəyinin vacibliyi qeyd edilib.
“Cənub” qaz dəhlizinin reallaşdırılması, “Şahdəniz 2” layihəsinin icrası, TANAP və TAP xəttinin inşası üzrə işlərin gedişi barədə məlumat verən E.Məmmədyarov layihə çərçivəsində boru xəttinin keçəcəyi ölkələrdə yeni iş yerlərinin və investisiya imkanlarının açılacağını, regional əməkdaşlığın inkişaf edəcəyini, diversifikasiya olunmuş mənbə hesabına qaz təchizatının təmin olunacağını diqqətə çatdırıb.
x x x
Nazir Elmar Məmmədyarovun daha bir görüşü İslam Əməkdaşlıq Təşkilatının baş katibi İyad bin Amin Mədəni ilə olub.
Azərbaycanın İƏT-in üzvü kimi fəal rolunu yüksək qiymətləndirən baş katib ölkəmizin təşkilatın qarşısında duran məqsədlərin həyata keçirilməsində verdiyi töhfələrin təqdirəlayiq olduğunu qeyd edib.
Fələstin bayrağının BMT-nin mənzil-qərargahında qaldırılmasının İƏT ölkələri üçün mühüm bir hadisə olacağını bildirən baş katib bayraq qaldırılmasında bütün İƏT dövlətlərinin iştirakının vacib olduğunu bildirib.
Azərbaycanın İƏT ilə əlaqələrinə xüsusi önəm verdiyini vurğulayan E.Məmmədyarov İƏT-in üzv dövlətlərlə ikitərəfli və çoxtərəfli əməkdaşlığın daha da inkişaf etdirilməsi üçün əlverişli mühit yaratdığını nəzərə çatdırıb. O, BMT Baş Assambleyasının sessiyası çərçivəsində İƏT xarici işlər nazirlərinin əlaqələndirmə görüşünün və gündəlikdə duran məsələlər üzrə xüsusi iclasların keçirilməsinin faydalı olduğunu bildirib.
İslam ümməti daxilində həmrəyliyin vacibliyini qeyd edən nazir İƏT-in İslam dünyasının üzləşdiyi problemlərin müzakirəsi və həlli üçün vacib mexanizm olduğunu söyləyib.
E.Məmmədyarov Ermənistanın Azərbaycana qarşı təcavüzünün İƏT tərəfindən qəti şəkildə pislənilməsi, münaqişənin Azərbaycanın beynəlxalq səviyyədə tanınmış sərhədləri daxilində ərazi bütövlüyü və suverenliyi çərçivəsində həllinin dəstəklənməsinə dair mövqeyinin yüksək qiymətləndirildiyini diqqətə çatdırıb.
Nazir son dövrlər islamofobiya meyillərinin artmasının narahatlıq doğurduğunu, birgə səylərlə buna qarşı mübarizə aparmağın vacib olduğunu nəzərə çatdırıb. Həmçinin Yaxın Şərqdə baş verən münaqişələr nəticəsində çoxlu sayda müsəlman əhalinin qaçqın vəziyyətinə düşməyə məcbur olduğunu qeyd edərək onların problemlərinə diqqət yetirilməsinin vacibliyini vurğulayıb.
Sonda İƏT-in prioritet istiqamətləri və qarşılıqlı maraq doğuran digər məsələlər ətrafında fikir mübadiləsi aparılıb.
x x x
Xarici işlər naziri Elmar Məmmədyarov Kiprin türk icmasının rəhbəri Mustafa Akınçı ilə də görüşüb.
Görüşdə qarşılıqlı maraq doğuran məsələlər ətrafında fikir mübadiləsi aparılıb.
x x x
Elmar Məmmədyarovun növbəti görüşü Avropa İttifaqının qonşuluq siyasəti və genişlənmə danışıqları üzrə komissarı Yohannes Hann ilə keçirilib.
Nazir Avropa Parlamenti tərəfindən Azərbaycan haqqında qəbul edilmiş əsassız və cəfəng qətnamə vasitəsilə bəzi dairələrin Azərbaycanın Avropa İttifaqı ilə əlaqələrinə zərbə vurmaq məqsədi güddüklərini diqqətə çatdırıb. O, bu qətnamənin və qərəzli münasibətin qəbuledilməz olduğunu vurğulayıb.
Yohannes Hann Avropa İttifaqının Azərbaycan ilə əməkdaşlıqda maraqlı olduğunu və hətta bir sıra sahələrdə əməkdaşlığı genişləndirmək arzusunda olduğunu bildirib. O, qarşılıqlı faydalı əməkdaşlığın təmin edilməsi məqsədilə yaxın zamanlarda təmaslara başlanacağına ümidvar olduğunu diqqətə çatdırıb.
Bölmənin digər xəbərləri
