Azərbaycanın yerli idarəetmə orqanları Fransanın müvafiq təcrübəsi ilə tanış olur
Fransada səfərdə olan Azərbaycanın Yevlax, Kəpəz, Naftalan, Lerik, Zərdab, Xocalı, Cəbrayıl, Zəngilan, Sədərək, Kəngərli, Qax, Goranboy və Göygöl rayonlarının icra hakimiyyətlərinin başçıları bir sıra işgüzar görüşlər keçiriblər.
Fransanın Merlər Assosiasiyasında keçirilən görüşdə sədr Jak Pelisar rəhbərlik etdiyi qurumun müstəqil fəaliyyət göstərdiyini, ölkənin bütün icmalarını özündə birləşdirdiyini, təşkilatın fəaliyyətinin təhsil, ekologiya, maliyyə kimi sahələri əhatə etdiyini diqqətə çatdırıb.
Assosiasiyada çalışan 70 nəfərin şəhərlərin idarə edilməsi sahəsində böyük təcrübəyə malik olduqlarını, onların şəhərsalma ilə bağlı qanunvericiliyin elmi müddəalarını yaxşı mənimsədiklərini vurğulayan J.Pelisar ilk dəfə Azərbaycanın bir sıra şəhər və rayonlarının icra başçıları ilə görüşdüyünü, gələcəkdə şəhərsalma məsələsində birgə əməkdaşlığın davam etdiriləcəyinə və əldə olunan təcrübələrin bölüşdürüləcəyinə ümidvar olduğunu bildirib. O, Azərbaycanın tarixindən, mədəniyyətindən, ölkənin iqtisadiyyatının sürətli inkişafından müəyyən qədər məlumatlı olduğunu qeyd edib.
Azərbaycan nümayəndə heyətinin Milli Assambleyada Alenson şəhərinin meri, Orn vilayətinin deputatı Yoakim Pöyo ilə görüşündə mer Alenson şəhəri barədə məlumat verib.
Alenson şəhərində Orn departamentinin Ali Şurasının sədri və Vimutye şəhərinin meri Qi Romanla görüşdə isə iqtisadi sahədə əməkdaşlığın inkişaf etdirilməsinin və şəhər quruculuğu ilə bağlı təcrübə mübadiləsi aparılmasının vacibliyi vurğulanıb.
Azərbaycan Respublikası Prezidenti Administrasiyasının regional idarəetmə və yerli özünüidarəetmə orqanları ilə iş şöbəsinin baş məsləhətçisi Vəfadar Bağırov keçirilən görüşlərdə Azərbaycanın əldə etdiyi nailiyyətlərdən danışıb, son illər iqtisadi cəhətdən sürətlə inkişaf edən ölkələrdən biri olduğunu söyləyib. O, Azərbaycanın müstəqilliyini tanıyan ilk ölkələrdən biri olan Fransa ilə iqtisadi və mədəni sahələrdə yüksək səviyyədə əlaqələrin mövcudluğunu qeyd edib.
Paytaxt Bakı şəhəri ilə yanaşı, regionların da inkişaf etdiyini bildirən V.Bağırov bu inkişafı daha da sürətləndirmək məqsədilə iri layihələrin həyata keçirildiyini söyləyib. O, Azərbaycanın bəzi şəhər və rayonları ilə Fransanın ayrı-ayrı şəhər və rayonlarının qardaşlaşmasının ölkələrimiz arasında dostluq əlaqələrinin inkişafının bariz nümunəsi olduğunu diqqətə çatdırıb. Səfərin şəhərsalma, nəqliyyatın, kommunal sahələrin və ümumilikdə şəhər təsərrüfatının və infrastrukturunun inkişaf etdirilməsi sahəsində Fransanın təcrübəsi ilə yaxından tanışlıq məqsədi daşıdığı diqqətə çatdırılıb.
Azərbaycan nümayəndə heyətinin tərkibində Ermənistan silahlı qüvvələri tərəfindən işğal edilmiş Xocalı, Zəngilan və Cəbrayıl rayonlarının icra hakimiyyəti başçılarının da iştirak etdiklərini xatırladan Prezident Administrasiyasının baş məsləhətçisi erməni hərbi birləşmələrinin bu rayonların əhalisini ata-baba yurdlarından silah gücünə çıxardığını, onların ölkəmizin müxtəlif şəhər və rayonlarında məcburi köçkün kimi məskunlaşdıqlarını bildirib.
Nümayəndə heyətinin üzvləri Alenson şəhərində süd və kosmetika məhsullarının, dərmanların hazırlanmasında istifadə olunan kimyəvi maddələrin saxlanılması üçün nəzərdə tutulan rezervuarlar istehsal edən “Geoavec” zavodu və “Crouttes” heyvandarlıq fermasının fəaliyyəti ilə də tanış olublar.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
