Azərbaycanlı deputat Ermənistanı Konstitusiyasında dəyişiklik etməyə çağırdı
Strasburq, 15 oktyabr, AZƏRTAC
Burada bir sıra ittihamlar eşidir və bəzilərimizin barmaqla işarə edildiyini görürük. Belə bir sual doğur: 2020-ci ildə baş verən genişmiqyaslı müharibənin bitməsindən iki il keçməsinə baxmayaraq, niyə hələ də davamlı sülh sazişi yoxdur?
AZƏRTAC xəbər verir ki, Azərbaycanın AŞPA-da nümayəndə heyətinin üzvü Nigar Arpadarainin bu fikirləri qurumun sərbəst debatlar iclası üçün hazırladığı və yazılı olaraq avropalı parlamentarilərə yayılan çıxışında qeyd edilib.
Nigar Arpadarai bildirib ki, Ermənistanın Azərbaycana qarşı ərazi iddiaları var. Ölkəmizə qarşı ərazi iddiaları Ermənistanın Konstitusiyasında əks olunub, eləcə də Konstitusiya Məhkəməsi tərəfindən təsdiq edilib. Bu isə bütün beynəlxalq təşkilatların mövqeyinə ziddir.
BMT Təhlükəsizlik Şurası, ATƏT və digər bütün beynəlxalq təşkilatlar Azərbaycanın Qarabağ ərazisinin Ermənistan silahlı qüvvələri tərəfindən işğal olunduğunu tanıyıb. BMT Təhlükəsizlik Şurasının erməni silahlı qüvvələrinin işğal etdiyi Azərbaycan torpaqlarından çıxarılmasına dair bir neçə qətnaməsi bunu bir daha sübut edir. Qarabağ Azərbaycanın ayrılmaz tərkib hissəsi olub və olacaqdır.
Müharibə Azərbaycan torpaqlarında baş verib, Ermənistan tərəfindən Azərbaycan xalqına qarşı etnik təmizləmə siyasəti aparılıb, bir milyon azərbaycanlı doğma yurdundan didərgin düşüb. Ermənistan Azərbaycana qarşı urbisid, ekosid aparıb, bütün kənd və şəhərlər tamamilə dağıdılıb.
“Ancaq təəssüflər olsun ki, BMT Təhlükəsizlik Şurasının 4 qətnaməsi kağız üzərində qaldı, Ermənistana qarşı heç bir sanksiya tətbiq edilmədi.
Bu gün Ermənistan qurban rolu oynayır, ən acınacaqlı olan isə Avropanın bəzi dövlətlərinin onu dəstəkləməsidir. Ermənistanın revanşist ideyalarını alovlandıran siyasətçilər bilməlidirlər ki, bununla onlar Ermənistana kömək etmirlər. Sadəcə, Ermənistandan siyasi oyunlar üçün istifadə edirlər. Buradakı erməni deputatlar bunu bilməlidirlər.
Bu gün sülh axtarışındayıq. Ermənistan hökuməti sülhə hazır olduğunu təkrarlasa da, bu istiqamətdə heç nə etmir. Ermənistan sülh istəyirsə, ilk növbədə, ərazi iddiasından əl çəkməlidir və bu iddialarla bağlı Konstitusiyasında dəyişiklik etməlidir”,-deyə N. Arpadarai qeyd edib.
Şəhla Ağalarova
AZƏRTAC-ın xüsusi müxbiri
Strasburq
Bölmənin digər xəbərləri
