“AZƏRREYL” VOLEYBOLÇULARI NÖVBƏTİ QƏLƏBƏ QAZANDILAR
AZƏRTAC xəbər verir ki, qadınlar arasında voleybol üzrə Çempionlar Liqası qrup turnirinin növbəti görüşündə Bakının “Azərreyl” klubu yanvarın 11-də Bakı idman sarayında İstanbulun “Beşiktaş” komandasını qəbul etmişdir. Ötən ilin axırlarında rəqib meydançasında da voleybolçularımız 3:0 hesabı ilə inamli qələbə qazanmışdılar.
Hesabat görüşünün birinci hissəsi qızlarımızın üstünlüyü şəraitində keçmiş və onların xeyrinə qurtarmışdır - 25:19.
İkinci hissədə vəziyyət dəyişmiş və qonaqlar təşəbbüsü ələ alaraq, onu öz xeyrinə başa çatdırmışlar - 26:24.
Üçüncü hissədə də türklər daha yaxşı oynamışlar - 25:23.
Növbəti hissədə Faiq Qarayevin yetirmələri bütün xətlərdə əzmlə mübarizə aparmış və 25:18 hesabı ilə qələbə qazanmışlar.
Beşinci hissə Azərbaycan idmançılarının tam üstünlüyü ilə keçmiş və onların xeyrinə sona yetmişdir - 15:7.
Beləliklə, “Azərreyl” növbəti görüşdə “Beşiktaş”a qalib gələrək, 14 xal toplamışdır və qrupda 3-cü yeri tutur. Voleybolçularımız növbəti görüşü yanvarın 18-də İspaniyada “Tenerife” komandası ilə keçirəcəklər.
Bölmənin digər xəbərləri
