Bakı, 27 sentyabr, AZƏRTAC

Bakı Dövlət Universitetində (BDU) 27 Sentyabr - Anım Gününə həsr olunmuş xüsusi dərslər keçirilir.

Bu barədə AZƏRTAC-a BDU-dan məlumat verilib.

Dərslərdə müəllimlər 44 günlük Vətən müharibəsində Azərbaycan Ordusunun şanlı Zəfəri haqqında ətraflı məlumat veriblər. Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusunun işğalçı Ermənistan üzərində tarixi Qələbəsindən bəhs edilib.

Xüsusi dərslərdə, həmçinin bu il sentyabrın 19-da həyata keçirilən antiterror tədbirləri nəticəsində Azərbaycan ərazisində qanunsuz məskunlaşmış Ermənistan ordusunun təslim olduğu, suverenliyimizin tam təmin olunduğu və Azərbaycanın qəhrəman oğullarının bu şanlı tarixi öz qanları ilə yazdıqları vurğulanıb.