Bakı kənd və qəsəbələri arasında uşaq futbol turnirinə yekun vurulub
Bakı, 12 noyabr, AZƏRTAC
Bakı kənd və qəsəbələri arasında uşaq futbol turnirinə yekun vurulub.
AZƏRTAC xəbər verir ki, Bakı Tennis Akademiyasında keçirilən medal uğrunda qarşılaşmalarından əvvəl Azərbaycan Respublikasının Dövlət Himni səsləndirilib və torpaqlarımızın azad edilməsi uğrunda canından keçmiş şəhidlərin əziz xatirəsi bir dəqiqəlik sükutla yad edilib.
Binə və Mehdiabad komandaları arasında üçüncü yer uğrunda oyunun əsas vaxtı 1:1 hesabı ilə başa çatıb. Penalti zərbələrində daha dəqiq olan Mehdiabad futbolçuları turnirin bürünc medalına layiq görülüblər.
Final matçından əvvəl incəsənət ustalarının ifasında musiqi proqramı təşkil olunub. Tanınmış futbolçular Ruslan Abışov, Emil Balayev və Emin Mahmudovun uşaqlar üçün imza sessiyası keçirilib.
Gərgin idman mübarizəsi şəraitində keçən final qarşılaşmasında Yeni Suraxanı komandası Sabunçunu 1:0 hesabı ilə məğlub edərək turnirin qalibi olub.
Turnirin ən yaxşı oyunçusu Rəhim Hüseyn (Yeni Suraxanı), ən yaxşı qapıçısı isə Rinat Ataxanov (Sabunçu) seçiliblər. Yarışın bombardiri mükafatına isə Nicat Qardaşov (Binəqədi, 11 qol) layiq görülüb.
Mükafatları gənclər və idman naziri Fərid Qayıbov, nazir müavini Mariana Vasileva, Milli Olimpiya Komitəsinin baş katibi Azər Əliyev, Bakı Abadlıq Xidmətinin direktor müavini Vüqar Müfidzadə, Azərbaycan Tennis Federasiyasının prezidenti Oqtay Əsədov, AFFA-nın vitse-prezidenti Rauf Əliyev, Binəqədi rayon İcra Hakimiyyətinin başçısı Elxan Allahverdiyev təqdim ediblər.
Böyük coşqu və təntənəli şəkildə təşkil olunan mükafatlandırma mərasimində ilk üç yeri tutan komandaların üzvlərinə medal və diplomlar təqdim olunub. Nazir Fərid Qayıbov qalib komandaya turnirin baş mükafatı olan xüsusi kuboku təqdim edib.
Mükafatlandırma mərasiminin davamı olaraq turnirdə iştirak edən bütün uşaqlara “İSMA bikes Azərbaycan” şirkəti tərəfindən velosipedlər təqdim edilib.
Xatırladaq ki, Gənclər və İdman Nazirliyi və Bakı Abadlıq Xidmətinin təşkilatçılığı, AFFA-nın dəstəyi ilə keçirilən yarışlarda Bakının 32 kənd və qəsəbəsinin futbol komandası oktyabrın 8-dən noyabrın 13-dək mübarizə aparıb. 350-dən çox 2010-2011-ci il təvəllüdlü futbolçunun qoşulduğu turnirin keçirilməsində əsas məqsəd uşaq futbolunun inkişafı və təbliği, eyni zamanda idmanın kütləviliyinə nail olmaqdır.
Bölmənin digər xəbərləri
