Bakıda Azərbaycan Pediatriya Cəmiyyətinin IV Milli və II Beynəlxalq Pediatriya Konqresi işə başlayıb
Bakı, 12 dekabr, AZƏRTAC
Bakıda Azərbaycan Pediatriya Cəmiyyətinin təşkilatçılığı ilə IV Milli və II Beynəlxalq Pediatriya Konqresi öz işinə başlayıb.
AZƏRTAC xəbər verir ki, tədbirin açılışında iştirakçılar Ulu Öndər Heydər Əliyevin və ölkəmizin ərazi bütövlüyü uğrunda şəhid olmuş qəhrəmanların xatirəsini bir dəqiqəlik sükutla yad ediblər, sonra Azərbaycanın Dövlət Himni səsləndirilib.
Açılış mərasimində iştirakçılara Ümummilli Lider Heydər Əliyevin uşaqların sağlamlığı və gələcəyi ilə bağlı dərin qayğısını əks etdirən videoçarx təqdim olunub.
Ardınca Azərbaycan Pediatriya Cəmiyyətinin sədri Əli Quliyev açılış nitqində cəmiyyətin son bir ildəki fəaliyyəti və görülən işlər haqqında məlumat verib. O həmçinin bu elmi platformanın artıq ənənəyə çevrildiyini, hər il yüzlərlə yerli və xarici mütəxəssisi bir araya gətirərək pediatriya elminin inkişafına töhfə verdiyini vurğulayıb.
Dövlət Gömrük Komitəsi Tibbi Xidmət İdarəsinin Elmi-Təcrübi və Tədris Mərkəzinin rəisi, Milli Məclisin Səhiyyə komitəsinin sədr müavini Rəşad Mahmudov uşaqların sağlam böyüməsinin yalnız tibbi məsələ deyil, cəmiyyətin inkişafı, ölkəmizin gələcəyi, dövlətin strateji prioriteti olduğunu deyib. O qeyd edib ki, hər bir körpənin sağlamlığı bizim ümumi məsuliyyətimizdir. Bu istiqamətdə görülən işlər, yeni yanaşmalar, elmi yeniliklər və praktiki təcrübə mübadiləsi gələcək nəticələr üçün son dərəcə vacibdir. “Bugünkü konqres pediatriyada çağdaş problemlərin müzakirəsi, neonatal və uşaqlara yönəlik xidmətlərin təkmilləşdirilməsi, eləcə də müasir texnologiyaların tətbiqi baxımından mühüm platformadır. Əminəm ki, burada səsləndiriləcək tövsiyələr həm kliniki praktikaya, həm də ölkəmizin səhiyyə siyasətinə mühüm töhfə verəcək”, - deyə deputat vurğulayıb.
Prezident Administrasiyasının QHT-lərlə iş və kommunikasiya şöbəsinin QHT-lərlə iş sektorunun müdiri Tural Əliyev deyib ki, Ümummilli Lider Heydər Əliyevin digər istiqamətlərdə olduğu kimi, vaxtında səhiyyə sahəsində də formalaşdırdığı möhkəm təməl, dövlət siyasəti və onun bəhrələrinin bu gün - Ulu Öndərin anım günündə bu cür səmimi duyğular, dərin hörmətlə xatırlanması bir daha bu görkəmli şəxsiyyətin tarix və xalq qarşısında xidmətlərini nümayiş etdirir. O deyib: “Burada paralel təşkil olunan - həm milli, həm də beynəlxalq müstəvidə müzakirələrin zəngin proqramları ilə tanışlıq göstərir ki, ortada böyük bir əmək, zəhmət, fədakarlıq var.
Azərbaycan Pediatriya Cəmiyyəti səmərəli fəaliyyəti ilə ölkə hüdudlarını aşa bilən, Beynəlxalq Pediatriya Assosiasiyasının Mərkəzi Asiya regionu üzrə təmsilçisi mövqeyinə yüksəlmiş nümunəvi təşkilatdır. Azərbaycan QHT-sinin bu Assosiasiyanın ali idarəetmə orqanı olan Daimi Komitəsinin bu il növbəti dəfə üzvü seçilməsi ciddi göstəricidir. Bu, Assosiasiyada birləşən 148 ölkənin milli pediatriya cəmiyyətlərinə əlverişli çıxış imkanı, onların fəaliyyətlərinin əlaqələndirilməsində, tənzimlənməsində birbaşa iştirak fürsətidir. Ümid edirik ki, Azərbaycan Pediatriya Cəmiyyəti dünya ölkələrinin yarıdan çoxunu əhatə edən milli pediatriya cəmiyyətlərinin bu etimadını layiqincə doğruldacaq.
Azərbaycan Pediatriya Cəmiyyətinin bu ilin mayında Meksikada uğurlu ölkə təqdimatı nəticəsində ölkəmizin Beynəlxalq Pediatriya Assosiasiyasının Konqresinə ev sahibliyinə əsas namizəd ölkələr içərisində ilk dəfə üst pillələrdə qərarlaşdı. Qarşıdakı dövrdə bu sistemli işin real nəticə verəcəyinə inanırıq”.
T.Əliyev bildirib ki, son illər Azərbaycanda səhiyyə profilli təşkilatların fəaliyyətində müşahidə olunan canlanma, təşəbbüskarlığın artması, layihələrin keyfiyyətinin yüksəlməsi sevindiricidir. Yaxın vaxtlarda ölkədə səhiyyə profilli QHT-lərin ilk forumu təşkil olunacaq.
“Düşünürük ki, son elmi yeniliklər nəzərə alınmaqla, müasir müalicə protokollarının tərtib olunmasında, davamlı əsasda yenilənməsində beynəlxalq təcrübəyə uyğun olaraq, ixtisaslaşmış peşə birlikləri, profil üzrə QHT-lər layiqli töhfə verə bilər.
Tibb elmi, bu xüsusda pediatriya sürətlə dəyişir, zənginləşir. Bir tərəfdən uşaqların sağlamlığının daha səmərəli qorunmasını təmin edən kliniki, tibbi həllər tapılır, digər tərəfdən rəqəmsal texnologiyaların, sosial medianın, süni intellekt məhsullarının yan təsirləri, ifrat və nəzarətsiz istifadəsi uşaqları daha müdafiəsiz vəziyyətə gətirir. Təbii ki, zərərli asılılıqlar, virtual mühit aludəçiliyi onların sağlamlığına, inkişafına mənfi təsir göstərir”, - deyə o əlavə edib.
Səhiyyə Nazirliyinin Səhiyyə siyasəti şöbəsinin müdiri Ramiq Quliyev konqresdə müzakirə olunacaq elmi nəticə, təqdimat və təkliflərin gələcəkdə qəbul olunacaq qərarların daha dəqiq və effektiv olmasına yardım edəcəyini deyib. O vurğulayıb ki, Səhiyyə Nazirliyi pediatriya xidmətlərinin davamlı şəkildə təkmilləşdirilməsini prioritet hesab edir və bu sahədə bütün tərəfdaşlarla sıx əməkdaşlığa böyük önəm verir.
Tibbi Ərazi Bölmələrini İdarəetmə Birliyinin icraçı direktorunun müavini Araz Nəsirov isə qeyd edib ki, uşaq sağlamlığı sahəsində atılan hər addım gələcəyin sağlam cəmiyyətinin qurulmasına yönəlib. “Son illər ölkəmizdə icbari tibbi sığortanın tətbiqi, xəstəxanaların idarəedilməsində yeni standartların formalaşdırılması və klinik protokolların vahid yanaşma ilə yenilənməsi nəticəsində pediatriya xidmətlərinin keyfiyyətində nəzərəçarpan dəyişikliklər baş verib”,- deyə o əlavə edib.
Daha sonra Azərbaycan Pediatriya Cəmiyyətinin sədri Əli Quliyev tərəfindən konqres çərçivəsində ölkə pediatriyasının inkişafına göstərdikləri dəstəyə görə bir sıra şəxslərə fəxri plaketlər təqdim olunub.
Qeyd edək ki, iki gün davam edəcək konqresdə çoxprofilli panel sessiyaları, yerli və xarici mütəxəssislərin elmi məruzələri, pediatriyanın aktual problemlərinə həsr olunmuş müzakirələr keçiriləcək.
Azərbaycan Pediatriya Cəmiyyəti ölkədə pediatriya elminin və uşaq sağlamlığının inkişafına xidmət edən aparıcı peşəkar təşkilatlardan biridir. Cəmiyyət mütəmadi olaraq yerli və beynəlxalq elmi tədbirlər keçirir, pediatrların peşəkar təkmilləşməsinə dəstək göstərir və uşaq sağlamlığı sahəsində elmi araşdırmaları təşviq edir.
Bölmənin digər xəbərləri
