BAKIDA TƏŞKİL OLUNAN DÜNYA ÇEMPİONATI SON İLLƏR KEÇİRİLƏN YARIŞLARIN ƏN MÜKƏMMƏLİDİR
Azərbaycan Prezidenti İlham Əliyevin idmana göstərdiyi diqqət və qayğı, dövlətinizin idman siyasəti Bakıda güləşin üç növü üzrə dünya çempionatının keçirilməsi üçün qısa müddət ərzində Beynəlxalq Güləş Federasiyasının razılığını almağa imkan vermişdir.
Bunu AZƏRTAC-ın müxbiri ilə söhbətində Bakıda keçirilən dünya çempionatında fəxri qonaq qismində iştirak edən, sərbəst güləş üzrə Ukrayna yığmasının heyətində Afina Yay Olimpiya Oyunlarının qalibi Elbrus Tedeyev söyləmişdir.
Güləş üzrə dünya çempionatına qədər mən Bakıda bədii gimnastika və yeniyetmələr arasında boks üzrə Avropa birinciliklərini izləmişəm. Budəfəki güləş üzrə dünya çempionatı daxil olmaqla hər üç yarış yüksək səviyyədə təşkil olunmuşdur.
Qonaq ölkəmizdə beynəlxalq səviyyəli yarışların belə tez-tez keçirilməsinin gələcəkdə Azərbaycan idmanının maddi-texniki bazasının daha da güclənəcəyinə gətirib çıxaracağını bildirmişdir.
Ümumiyyətlə, Bakıda keçirilən güləş üzrə dünya çempionatının son illər təşkil olunan yarışlar arasında ən mükəmməli olduğunu nəzərə çarpdıran olimpiya çempionu, dövlətin idmana bu cür dəstəyindən məmnun qaldığını söyləmişdir. O demişdir ki, dövlətin idmana bu cür qayğısı ilk növbədə ölkədə bədən tərbiyəsinin inkişafına, yeniyetmə və gənclərin sağlamlığına xidmət edəcəkdir.
Bölmənin digər xəbərləri
