BALAKƏNDƏ RADİKAL MÜXALİFƏTPARTİYALARININ SIRALARI SEYRƏLİR

02.12.2005 [15:21]
Çap et
A⁺ A^-

“Azadlıq” blokuna daxil olan radikal müxalifət qüvvələrinin noyabrın 26-da paytaxtda keçirdikləri son mitinq zamanı Azərbaycanda ictimai-siyasi sabitliyin pozulmasına yönəldilən çirkin və təxribatçılıq əməllərinə etiraz əlaməti olaraq, həmin partiyaların Balakən rayon təşkilatlarının üzvləri təmsil olunduqları siyasi partiyaların sıralarını tərk etmələri barədə xüsusi bəyanat vermişlər. Bəyanatın AZƏRTAC-ın bölgə nümayəndəliyinə daxil olmuş mətnində deyilir:

“Ölkəmizin ictimai-siyasi həyatında mühüm hadisə olan üçüncü çağırış Azərbaycan Respublikasının Milli Məclisinə seçkilər Balakən rayonunda da şəffaf və demokratik şəraitdə uğurla başa çatmışdır.

Azərbaycan Prezidenti İlham Əliyevin seçki öncəsi imzaladığı müvafiq Sərəncamlardan irəli gələn vəzifələrin yerinə yetirilməsini təmin etmək üçün rayonun bütün seçki məntəqələrində Seçki Məcəlləsinin tələblərinə ciddi əməl olunmaqla yüksək hazırlıq işləri görülmüş, deputatlığa namizədlərin təbliği və seçicilərlə görüşlərin keçirilməsi üçün hamıya bərabər şərait yaradılmışdır. Seçki günü məntəqələrdə səsvermənin gedişini xarici və yerli müşahidəçilər izləmiş, icra orqanlarının seçki prosesinə müdaxiləsinə qətiyyən yol verilməmişdir. Ədalətli, şəffaf və demokratik şəraitdə keçən səsvermə nəticəsində Balakən rayonunun əhatə etdiyi 109 və 111 saylı seçki dairələrindən namizədliyi irəli sürülmüş Rəbiyyət Aslanova və Dünyamin Xəlilov inamlı qələbə qazanmışlar.

Biz çox təəssüf edirik ki, təmsil olunduğumuz siyasi partiyaların rəhbərləri 2003-cü ildə keçirilən prezident seçkilərində olduğu kimi, yenə də real həqiqəti qəbul etmək istəmir, xalqın iradəsi ilə hesablaşmayaraq, seçkilərin qeyri-demokratik keçməsi barədə əsassız fikirlər söyləyir, mətbuat səhifələrində böhtan və iftira dolu yazılar dərc etdirir, həqiqəti əks etdirməyən və xalqda ikrah hissi doğuran müsahibə və bəyanatlar verir, xalqı növbəti dəfə iğtişaşlara və qarşıdurmaya sürükləyirlər. Biz artıq tam əminliklə başa düşürük ki, özlərini siyasətçi adlandıran bu üzdəniraq “liderləri”, hakimiyyət hərislərini Azərbaycanın tərəqqisi və demokratiyanın inkişafı deyil, yalnız və yalnız özlərinin şəxsi firavanlığı və mənafeləri maraqlandırır.

Odur ki, radikal müxalifət qüvvələrinin son xəyanətkar əməllərinə etiraz əlaməti olaraq biz “Azadlıq” blokuna daxil olan partiyaların sıralarını tərk edirik.

1. Fərhad Gondolov - Müsavat Partiyasının üzvü

2. Əmrullah Şirinov - Müsavat Partiyasının üzvü

3. Könül Qarayeva - Müsavat Partiyasının üzvü

4. Məryəm Mərdanova - AXCP üzvü

5. Məmməd Eminov - AXCP üzvü

6. Əminə Hacıyeva - AXCP üzvü

7. Fərhad Xanayev - ADP üzvü

8. Rəfiqə Gülməmmədova - ADP üzvü və başqaları”

Cəmi: 37 imza