İQTİSADİYYAT
Bank Olmayan Kredit Təşkilatlarının əməkdaşları üçün təlim keçirilib
Bakı, 16 mart, AZƏRTAC
Martın 16-da Azərbaycan Mərkəzi Bankı (AMB), Bakı Fond Birjası (BFB), “Unicapital İnvestisiya Şirkəti” və Azərbaycan Mikromaliyyə Assosiasiyası (AMFA) tərəfindən Bank Olmayan Kredit Təşkilatlarının əməkdaşları üçün “Qiymətli kağızların buraxılışı, Bakı Fond Birjasında listinq və Listinq Məsləhət Proqramı” mövzularında onlayn təlim keçirilib.
BFB-dən AZƏRTAC-a bildirilib ki, təlimdə kapital bazarı ilə bağlı ümumi məlumat, qiymətli kağızların buraxılışı, onların birjada listinqə alınması proseduru və Listinq Məsləhət Proqramı ilə bağlı ətraflı məlumat verilib. Tədbirin əsas məqsədi yerli şirkətlərə alternativ maliyyələşmə üsullarını təqdim etmək və bu istiqamətdə beynəlxalq təcrübəni bölüşməkdir.
Qeyd edək ki, Bakı Fond Birjası əməkdaşlıq etdiyi investisiya şirkətləri və AMFA ilə birlikdə kapital bazarı haqqında məlumatlılığın artırılması, yerli biznes mühitində qiymətli kağız buraxılışı təcrübəsinin aşılanması və fond birjasında listinqin təşviqi məqsədilə mütəmadi olaraq ödənişsiz təlimlər təşkil edir.