“Bank Respublika” Bakı Ali Neft Məktəbi ilə əməkdaşlığa başlayıb
Bakı, 7 fevral, AZƏRTAC
Ölkəmizdə təhsilin inkişafına xüsusi qayğı ilə yanaşan Bank Respublika və respublikamızın qabaqcıl ali təhsil ocaqlarından biri olan Bakı Ali Neft Məktəbi (BANM) arasında əməkdaşlıq barədə memorandum imzalanıb.
BANM-dən AZƏRTAC-a bildirilib ki, memorandum “Bank Respublika”nın İdarə Heyətinin sədri Tariyel İsmayılov və BANM-in rektoru Elmar Qasımov tərəfindən imzalanıb. İmzalama mərasimində hər iki qurumdan nümayəndələr, eləcə də təhsil ocağının tələbələri iştirak ediblər.
Bu əməkdaşlıq hər iki tərəfə yeni imkanlar yaradacaq. Bank Respublika üçün bu, gənc, yaradıcı və potensiallı mütəxəssislərlə birbaşa əlaqə qurmaq, onların bilik və bacarıqlarını erkən mərhələdə dəyərləndirmək imkanıdır. Digər tərəfdən, Bakı Ali Neft Məktəbinin tələbələri real iş mühiti ilə tanış olmaq, praktiki bilik və təcrübə qazanmaq, bank sahəsindəki yenilikləri birbaşa öyrənmək şansı əldə edəcəklər.
Memorandum çərçivəsində tərəflər arasında birgə layihələrin həyata keçirilməsi, tələbələr üçün təcrübə proqramlarının təşkil olunması, “Bank Respublika”nın mütəxəssisləri tərəfindən təlim və seminarların keçirilməsi, eləcə də gənc mütəxəssislərin peşəkar inkişafına dəstək göstərilməsi nəzərdə tutulur.
Müəllim və tələbə heyəti qarşısında çıxış edən “Bank Respublika”nın İdarə Heyətinin sədri Tariyel İsmayılov deyib: “Biz təhsilin inkişafını və gənclərin dəstəklənməsini strateji prioritetlərimizdən biri hesab edirik. Bakı Ali Neft Məktəbi təhsil sahəsində yenilikçi yanaşmaları, elmi tədqiqatlara verdiyi dəstək ilə tanınır. Bu məktəb gənc ixtisas sahiblərinin beynəlxalq standartlara uyğun şəkildə hazırlanmasında, onlara analitik düşüncə bacarıqları, liderlik qabiliyyətləri aşılamaqda əvəzsiz rol oynayır. Biz bu əməkdaşlığı sadəcə bir memorandum kimi deyil, uzunmüddətli və perspektivli bir tərəfdaşlıq kimi qiymətləndiririk. Biz inanırıq ki, bu cür təşəbbüslər gənclərin peşəkar bacarıqlarının inkişafına dəyərli töhfə verəcək və onların gələcəyin uğurlu liderləri kimi formalaşmasına şərait yaradacaq”.
BANM-in rektoru Elmar Qasımov da öz növbəsində bildirib: “Bank Respublika” kimi aparıcı və nüfuzlu maliyyə qurumu ilə əməkdaşlıq tələbələrimiz üçün unikal imkanlar yaradacaq. Bankın sosial məsuliyyət layihələrinə verdiyi önəm, xüsusilə təhsilin dəstəklənməsi istiqamətində atdığı addımlar təqdirəlayiqdir. Biz inanırıq ki, bu əməkdaşlıq tələbələrimizə yalnız nəzəri bilikləri praktik bacarıqlarla birləşdirmək deyil, həm də “Bank Respublika” kimi dinamik və peşəkar mühitdə çalışaraq gələcək karyeralarına güclü bir əsas yaradacaq. Bu, həm də tələbələrimizə real iş proseslərini yaxından müşahidə etmək və özlərini inkişaf etdirmək üçün geniş imkanlar açacaq”.
Bölmənin digər xəbərləri
