İDMAN
BASKETBOLÇULARIMIZ BELARUSDA TƏLİM-MƏŞQ TOPLANIŞI KEÇİRLƏR
Baş məşqçi Rimas Kurtinaytisin rəhbərlik etdiyi Azərbaycan yığma basketbol komandası təlim-məşq toplanışları keçmək üçün Belarusa getmişdir. Xatırladaq ki, bu, komandamızın xaricdə keçirdiyi ilk təlim-məşq toplanışıdır. Milli komandamız məşqləri “Raubiçi” idman bazasında keçir.
Azərbaycan basketbolçuları Belarusun gənclərdən ibarət yığma komandası ilə yoldaşlıq görüşü keçirmiş və 90:60 hesabı ilə qalib gəlmişlər. Onların bu uğuru azarkeşləri sevindirməyə bilməz, çünki yaxın keçmişdə Azərbaycan basketbolçuları Belarus komandalarına 40-50 xal fərqi ilə uduzurdular. Digər komandalarla da yoldaşlıq görüşləri keçirmək nəzərdə tutulur.
Respublika Basketbol Federasiyasından AZƏRTAC-a bildirmişlər ki, komandamız noyabrın 30-da Bakıya qayıtdıqdan sonra baş məşqçi Rimas Kurtinaytis Belarusda keçirilmiş təlim-məşq toplanışı barədə ətraflı məlumat verəcəkdir.