BDU alimləri badam yarpaqlarının xərçəng və mikrob əleyhinə təsirini araşdırıblar
Bakı, 13 mart, AZƏRTAC
Bakı Dövlət Universitetinin (BDU) alimləri badam yarpaqlarının xərçəng və mikrob əleyhinə təsirini araşdırıblar.
Bu barədə AZƏRTAC-a BDU-dan məlumat verilib. Bildirilib ki, universitetin Biofizika və biokimya kafedrasının müdiri professor Rövşən Xəlilov, həmin kafedranın dosenti Səbinə Ömərova və doktorantı Mehmet Tefvik Adicanın həmmüəllifi olduqları “Amigdalus communis (badam) bitkisinin yarpaqlarının sulu ekstraktının kimyəvi tərkibinin və ekstrakt vasitəsilə sintez edilmiş qızıl nanohissəciklərin antimikrob və xərçəng əleyhinə agentlər kimi tədqiqi” (The Investigation of the Chemical Composition and Applicability of Gold Nanoparticles Synthesized with Amygdalus communis (Almond) Leaf Aqueous Extract as Antimicrobial and Anticancer Agents) adlı elmi məqalə “Web of Science”, “SCOPUS”, “PubMed” və “AGRİS” kimi elmmetrik bazalarda indekslənən (IF: 4.927) “Molecules” jurnalında yer alıb.
İşin əsas məqsədi badam bitkisinin yarpaq ekstraktının kimyəvi tərkibini müəyyən etmək və həmin ekstrakt vasitəsilə biosintez edilmiş qızıl nanohissəciklərin antibakterial və sitotoksik xüsusiyyətlərini araşdırmaqdır. Yarpaq ekstraktının kimyəvi tərkibi LC-ESI/MS/MS (maye xromatoqrafiya/mass spektroskopiya) metodundan istifadə olunaraq tədqiq edilib, nanohissəciklərin sintezi, stabilləşdirilməsi və bağlanması mərhələlərinə cavabdeh ola biləcək birləşmələr müəyyənləşdirilib. Əldə edilmiş biogen qızıl nanohissəciklərin kolorektal adenokarsinoma, qlioma, yumurtalığın xərçəng hüceyrə xətlərinə və insanın dermal fibroblastlarına qarşı in vitro sitotoksik effektivliyi MTT analizi ilə qiymətləndirilib. Həmçinin əldə edilmiş nanohissəciklərin “Bacillus subtilis”, “Staphylococcus aureus” bakteriyalarına və “Candida albicans” göbələyinə qarşı toksik effekti müəyyən olunub. “Yaşıl biosintez” yolu ilə əldə edilmiş Au nanohissəcikləri antibakterial və xərçəng əleyhinə mübarizədə istifadə oluna bilər.
Bölmənin digər xəbərləri
