AZƏRTAC xəbər verir ki, ölkəmizin Belarusdakı səfirliyi 31 dekabr - Dünya azərbaycanlılarının həmrəyliyi günü münasibətilə Belarus Dövlət Filarmoniyasında tədbir təşkil etmişdir.

Belarusun dövlət, elm-təhsil, mədəniyyət xadimlərinin, diplomatların, Azərbaycan İcmaları Konqresinin nümayəndələrinin, azərbaycanlı tələbələrin iştirak etdikləri tədbirə Belarusun xarici işlər nazirinin birinci müavini Vasili Puqaçyev də qatılmışdır.

Ümumilikdə 500 qonağın iştirak etdiyi tədbirdə Azərbaycan səfiri Əli Nağıyev qonaqları Qurban, Milad bayramı, Dünya azərbaycanlılarının həmrəyliyi günü və Yeni il münasibətilə təbrik etmiş, azərbaycanlıların həmrəyliyi gününün tarixindən, Azərbaycanın artan beynəlxalq nüfuzundan, ölkəmizdə gedən sosial-iqtisadi proseslərdən, sürətli iqtisadi yüksəlişindən ətraflı söhbət açmışdır. O, Azərbaycan-Belarus münasibətlərinin hərtərəfli inkişaf etdiyini diqqətə çatdırmışdır.

Sonra Azərbaycanın tanınmış musiqiçiləri geniş konsert proqramı ilə çıxış etdilər.

Tədbir iştirakçıları Azərbaycan süfrəsinə qonaq edilmişlər.