Bələdiyyələrin fəaliyyətinə inzibati nəzarəti həyata keçirən orqanın illik məruzəsi müzakirə edilib
Bakı, 5 fevral, AZƏRTAC
Fevralın 5-də Milli Məclisin regional məsələlər komitəsinin iclası keçirilib.
AZƏRTAC xəbər verir ki, iclasda bələdiyyələrin fəaliyyətinə inzibati nəzarəti həyata keçirən orqanın illik məruzəsi, “Bələdiyyə qulluqçularının etik davranış qaydaları haqqında” və “Bələdiyyə qulluğu haqqında” Qanunda dəyişikliklər edilməsi barədə” qanun layihələri müzakirə edilib.
Komitənin sədri Arif Rəhimzadə bildirib ki, hər il Milli Məclisin yaz sessiyasının ilk iclaslarının birində bələdiyyələrin fəaliyyətinə inzibati nəzarəti həyata keçirən orqanın illik məruzəsi dinlənilir.
Ədliyyə Nazirliyinin Bələdiyyələrlə İş Mərkəzinin sədri Mehdi Səlimzadə bələdiyyələrin fəaliyyətinə inzibati nəzarətin həyata keçirilməsi ilə bağlı ətraflı məlumat verib. Bildirilib ki, respublikamızın ictimai-siyasi həyatında ənənəvi xarakter almış dinamik inkişaf prosesi 2014-cü ildə də davam etdirilib və əldə olunan nəticələr bələdiyyələrin də inkişafına öz müsbət təsirini göstərib. Bələdiyyələrin əldə etdikləri nailiyyətlər onların əhali arasında nüfuzunun artmasına səbəb olub. Bu, 2014-cü ildə keçirilən bələdiyyə seçkilərində də əyani təsdiqini tapıb. Digər tərəfdən, gənclərin və qadınların bələdiyyələrin fəaliyyətinə marağı artıb. Onlar seçkilərdə əvvəlkinə nisbətən daha fəal iştirak ediblər.
Vurğulanıb ki, 2014-cü il ümumiyyətlə bələdiyyələrin həyatında bir sıra mühüm hadisələrlə yadda qalıb. Bələdiyyələrlə bağlı qanunvericiliyn təkmilləşdirilməsi istiqamətində görülən tədbirləri xüsusilə qeyd etmək olar. Habelə 21 rayon üzrə 204 bələdiyyənin birləşməsi nəticəsində 94 yeni bələdiyyənin yaradılması da ilin əhəmiyyətli hadisələrdən biri olub. Seçki prosesində bu qəbildən bir bələdiyyə istisna olmaqla, 93 bələdiyyənin formalaşdırılması prosesi həyata keçirilib. Ləğv olunmuş, fəaliyyəti dayandırılmış bələdiyyələrin sənədlərinin yeni yaradılmış bələdiyyələrə təqdim olunması ilə əlaqədar Ədliyyə Nazirliyi hazırlıq işlərini həyata keçirib. Yaxın günlərdə bu prosesə başlanacaq.
Mehdi Səlimzadə yerli özünüidarə sahəsində beynəlxalq əlaqələrin inkişaf etdirilməsi, qarşılıqlı səmərəli əməkdaşlıq şəraitində həyata keçirilən tədbirlər barədə də məlumat verib, ötən il görülən geniş maarifləndirmə işlərindən danışıb. Qeyd edilib ki, əvvəllər bələdiyyə sədrləri tərəfindən təkbaşına qərarlar qəbul olunur və bu, ciddi qanun pozuntusu sayılırdı. Son üç ildə isə artıq belə hallar müşahidə edilmir. Bu, həyata keçirilən inzibati məsuliyyət tədbirlərinin, eyni zamanda bələdiyyə sahəsində aparılan maarifləndirmə tədbirlərinin müsbət nəticəsi kimi qiymətləndirilə bilər.
Sonra məruzə ətrafında müzakirələr aparılıb.
Çıxış edən komitə üzvləri məruzənin əsaslandırılmış şəkildə, dolğun və əhatəli hazırlandığını vurğulayaraq bildiriblər ki, ötən il bələdiyyələrin işinin daha yaxşı təşkili, onların məsuliyyətinin və fəaliyyətlərində şəffaflığın, maliyyə və mülkiyyətdən istifadədə səmərəliyin artırılması istiqamətində mühüm əhəmiyyət kəsb edən qanunvericiliyə dəyişikliklər edilib. Nəticədə ictimai həyatda bələdiyyələrin rolu getdikcə artır.
Çıxışlarda bələdiyyələrin maliyyə mənbələrinin, büdcəsinin yaxşılaşdırılması ilə bağlı rəy və təkliflər də səsləndirilib.
Daha sonra iclasda qanun layihələrinə baxılıb.
Komitə sədri Arif Rəhimzadə bildirib ki, 3 fəsil, 20 maddədən ibarət olan “Bələdiyyə qulluqçularının etik davranış qaydaları haqqında” qanun layihəsi bələdiyyə qulluqçuları üçün etik davranış qaydaları və prinsiplərini, həmçinin onlara əməl olunması ilə bağlı hüquqi mexanizmləri müəyyən edir. Qanun layihəsində bələdiyyə qulluqçusunun xidməti davranışının hüquqi tənzimlənməsi, etik davranış qaydaları və bu qaydaların həyata keçirilməsinin təmin edilməsi prinsipləri əksini tapıb. Sənəd etik davranış qaydalarının pozulmasına görə məsuliyyəti də nəzərdə tutur.
İclasda daha sonra “Bələdiyyə qulluğu haqqında” Qanunda dəyişikliklər edilməsi barədə” qanun layihəsi müzakirə edilib. Bildirilib ki, layihəyə əsasən qanunun 5-ci maddəsinin ikinci hissəsində “bələdiyyənin sədri birbaşa təyin edir” sözləri “bələdiyyənin müsabiqə komissiyasının qiymətləndirməsinin nəticəsinə uyğun olaraq bələdiyyənin sədri təyin edir” sözləri ilə əvəzlənib. Qanun layihəsində bələdiyyə qulluğuna qəbul, müsabiqə komissiyası üzvlərinin hüquq və vəzifələri, təşkilati məsələlər və bələdiyyə qulluğuna qəbulla bağlı məhdudiyyətlərə dair maddələr əlavə edilib.
Arif Rəhimzadə vurğulayıb ki, “Bələdiyyə qulluğu haqqında” Qanunda təklif edilən dəyişiklik bələdiyyə sahəsində aparılan islahatların məntiqi davamı olmaqla, bələdiyyə qulluğuna qəbul sahəsində yaranan münasibətlərin daha mükəmməl və şəffaf surətdə tənzimlənməsi məqsədi ilə həyata keçirilir.
Çıxış edən Milli Məclisin deputatları dəyişikliklərin vacibliyini diqqətə çatdıraraq bildiriblər ki, bu, bələdiyyələrin fəaliyyətində şəffaflığın daha da artırılmasını və bələdiyyələrlə seçicilər arasında əlaqələrin daha da möhkəmləndirilməsini təmin edəcək.
Sonda illik hesabat və qanun layihələri Milli Məclisin plenar iclasına tövsiyə edilib.
Bölmənin digər xəbərləri
