Bəxtiyar Quliyev: Ölkəmiz müstəqilliyini bərpa etdikdən sonra idmanımız şərəfli yol keçib
Bakı, 4 mart, AZƏRTAC
Ölkəmiz müstəqilliyini bərpa etdikdən sonra idmanımız şərəfli yol keçib. İdmançılarımız bu müddət ərzində dünyanın müxtəlif arenalarında öz sözlərini deyib, üçrəngli bayrağımızı ucaldaraq himnimizi səsləndiriblər.
Bu sözləri 5 Mart - Bədən Tərbiyəsi və İdman Günü ilə bağlı AZƏRTAC-a açıqlamasında Azərbaycan Stronqmen Federasiyasının prezidenti, Dünya Stronqmen Federasiyasının vitse-prezidenti Bəxtiyar Quliyev deyib.
Bildirib ki, əsası Ümummilli Lider Heydər Əliyev tərəfindən qoyulan və hazırda dövlətimizin başçısı, Milli Olimpiya Komitəsinin rəhbəri İlham Əliyev tərəfindən uğurla davam etdirilən idman siyasəti öz bəhrəsini verməkdədir. Azərbaycan beynəlxalq idman qurumları tərəfindən ciddi tərəfdaş kimi qəbul olunur və onlar heç bir tərəddüd etmədən irimiqyaslı yarışların təşkilini ölkəmizə həvalə edirlər. “Bakı-2015” birinci Avropa və “Bakı-2017” dördüncü İslam Həmrəyliyi oyunlarının yüksək səviyyədə təşkili, atletlərimizin mötəbər yarışlarda əldə etdiyi nailiyyətlər və ölkəmizin beynəlxalq idman hərəkatının mərkəzinə çevrilməsi uğura hesablanmış dövlət siyasətinin tərkib hissəsidir.
“Azərbaycan Prezidenti, Müzəffər Ali Baş Komandan İlham Əliyevin rəhbərliyi altında şanlı Ordumuzun qazandığı Qələbədə idmançılarımız da öz şücaətləri ilə seçiliblər. Azərbaycanda idmana göstərilən dövlət qayğısı nəticəsində gənclərin vətənpərvər ruhda formalaşması, onların pis vərdişlərdən uzaq olması, asudə vaxtlarının səmərəli təşkili və bədən tərbiyəsinə cəlb edilməsi əsas prioritet istiqamətlərdəndir. Ulu Öndər Heydər Əliyev həmişə idman və idmançılara böyük qayğı ilə yanaşıb. Belə ki, ölkəmizdə Bədən Tərbiyəsi və İdman Gününün martın 5-də qeyd olunması təsadüfi deyil. 1995-ci il martın 5-də Ümummilli Lider Heydər Əliyev Bakı İdman Sarayında dünya və Avropa çempionatlarının qalibləri və mükafatçıları ilə görüşüb, İdman Fondunu təsis edib. Bununla da ölkəmizdə bədən tərbiyəsi və idmanın inkişafında yeni strategiyanın təməli qoyulub.
Bölmənin digər xəbərləri
