Beynəlxalq ekspert Vəkillər Kollegiyasının mediasiya fəaliyyətinə dəstəyini yüksək qiymətləndirib
Bakı, 11 oktyabr, AZƏRTAC
Azərbaycan Vəkillər Kollegiyasının (VK) Hüquqi Yardım və Tədris Mərkəzində beynəlxalq ekspertlə görüş keçirilib.
Kollegiyanın mətbuat xidmətindən AZƏRTAC-a bildirilib ki, VK-nin Hüquqi Yardım və Tədris Mərkəzində Azərbaycan hökumətinin Dünya Bankı ilə birgə maliyyələşdirdiyi və Ədliyyə Nazirliyinin həyata keçirdiyi “Mütərəqqi ədliyyə xidmətləri və müasir məhkəmə infrastrukturu” layihəsi çərçivəsində “Mediasiya haqqında” Qanunun tətbiqinə dəstək" fəaliyyəti üzrə beynəlxalq ekspert Leonardo D"Urso ilə görüş olub.
Görüşdən əvvəl qonaq mərkəzin inzibati binası ilə tanış olub, mərkəzin fəaliyyəti barədə ətraflı məlumatlandırılıb.
Sonra Vəkillər Kollegiyasının sədr müavini - Hüquqi Yardım və Tədris Mərkəzinin direktoru Şahmar Məmmədov qonağa Dünya Bankı ilə əməkdaşlığın səmərəli və faydalı olduğunu deyib. O, Vəkillər Kollegiyasının Mediasiya institutunun həmtəsisçisi kimi, mediasiya fəaliyyətinə göstərilən dəstəkdən, həmin işdə vəkillərin rolundan və bu sahədə təcrübədə rast gəlinən məsələlər barədə danışıb.
Mediasiya üzrə beynəlxalq ekspert çıxışında qeyd edib ki, Vəkillər Kollegiyası ilə sıx əməkdaşlıqdan məmnundur və kollegiyanın bu sahədə atdığı addımları yüksək qiymətləndirir. Beynəlxalq ekspert diqqətə çatdırıb ki, “Mediasiya haqqında" Qanunun tətbiqinə dəstək” tövsiyələr paketi layihəsi və Fəaliyyət Planı üzrə yekun hesabatın hazırlanması tamamlanıb.
Daha sonra hesabat dinlənilib və təqdim edilib. Görüş çərçivəsində Vəkillər Kollegiyasının Rəyasət Heyətinin aparatı yanında “Mübahisələrin alternativ həlli üzrə Komitə”sinin üzvləri, vəkillər - Qasım Şaliyev və Natiq Məmmədov çıxış edərək mediatorların hazırlanması istiqamətində müvafiq işlərin görüldüyünü, müxtəlif kurs və təlimlərin keçirildiyini vurğulayıblar.
Görüşdə, həmçinin Bankın dəstəyi ilə reallaşdırılan layihə barədə fikir mübadiləsi aparılıb, qarşılıqlı maraq doğuran bir sıra digər məsələlər müzakirə edilib.
Bölmənin digər xəbərləri
