Türkiyənin tanınmış folklorşünası Hayrettin İvgin Bakıya səfəri zamanı Azərbaycan Musiqi Mədəniyyəti Tarixi Muzeyi ilə tanışlıqdan aldığı təəssürat barədə Türkiyədə nəşr olunan “Sizə” jurnalının 361-ci nömrəsində dərc etdirdiyi məqalədə bu fikri bildirmişdir. Muzeydə Azərbaycanın musiqi mədəniyyəti tarixi ilə bağlı 35 min eksponat saxlanıldığını qeyd edən alim yazır: “Bunlar barədə məlumat verilərkən biz həm qürur hissi keçirdik, həm də utandıq. Azərbaycanda belə bir muzeyin yaradılmasından eyni millətin övladları olduğumuza görə qürur hissi keçirdik. Türkiyədə buna bənzər muzey olmadığına görə utandıq”.
AZƏRTAC-ın müxbiri xəbər verir ki, müəllif “Azərbaycan Musiqi Mədəniyyəti Dövlət Muzeyi” başlıqlı məqaləsində respublikamızın paytaxtında bir sıra kitabxana və muzeylərdə olduğunu, Bakı Musiqi Akademiyasında ona “Azərbaycan xalq çalğı alətləri” kitabının hədiyyə edildiyini, ölkəmizə hər səfərində respublikamızın demokratiya yolu ilə inkişafının şahidi olduğunu və bundan məmnunluq duyduğunu da bildirir.
