BMT Asiya ölkələrini iqlim təhdidlərinə hazırlığı sürətləndirməyə çağırır
Bakı, 17 may, AZƏRTAC
“Asiya iqlim dəyişikliyi qarşısında ən həssas regionlardan biri olaraq qalır və milli adaptasiya planları iqtisadi inkişafı qorumaq üçün həyati əhəmiyyət daşıyır”.
AZƏRTAC xarici mediaya istinadla xəbər verir ki, bu barədə BMT-nin İqlim Dəyişikliyi üzrə Çərçivə Konvensiyasının icraçı katibi Saymon Stil Sinqapurda keçirilən “Ecosperity Week” konfransında videomüraciətində bildirib.
Onun sözlərinə görə, regiona yerli reallıqları nəzərə alan həllər lazımdır və bu da sərmayələrin yenidən bölüşdürülməsini və maliyyə strategiyalarının dəyişdirilməsini tələb edəcək.
Proqnozlara əsasən, təkcə inkişaf etməkdə olan ölkələrin infrastruktur və əhalini ekstremal hava şəraitinin nəticələrindən qorumaq üçün 2030-cu ilə qədər hər il təqribən 340 milyard ABŞ dollarına ehtiyacı olacaq.
Bu sahə artıq investorlar tərəfindən karbon emissiyalarının azaldılması üzrə layihələrin maliyyələşdirilməsinə alternativ kimi getdikcə daha çox maraq doğurur.
Paris Sazişi çərçivəsində ölkələr bu il ərzində öz adaptasiya strategiyalarını təqdim etməlidirlər. BMT-nin məlumatına görə, artıq 63 inkişaf etməkdə olan ölkə bu sənədləri hazırlayıb, onlardan 19-u Asiya-Sakit okean regionuna aiddir.
Bölmənin digər xəbərləri
