Bolqarıstan Prezidenti Rumen Radev iranlı həmkarı Məsud Pezeşkian ilə görüşüb
Bakı, 26 sentyabr, AZƏRTAC
Bolqarıstan Prezidenti Rumen Radev iranlı həmkarı Məsud Pezeşkian ilə BMT Baş Assambleyasının 79-cu sessiyası çərçivəsində görüşüb.
AZƏRTAC BTA agentliyinə istinadla xəbər verir ki, görüş zamanı ölkə başçıları ikitərəfli əməkdaşlığı müzakirə ediblər.
Bolqarıstan Prezidenti Rumen Radev İranla iqtisadiyyat, ticarət, enerji və nəqliyyat sahələrində ikitərəfli tərəfdaşlığı inkişaf etdirmək istədiyini və bunun üçün birgə səylərin əhəmiyyətini qeyd edib. O, İranın yeni rəhbərliyinin Avropa İttifaqına üzv dövlətlərlə dialoqu dərinləşdirmək niyyətini yüksək qiymətləndirib.
İran İslam Respublikasının Prezidenti Məsud Pezeşkian İran və Bolqarıstan əməkdaşlığının uzun illərdən bəri ikitərəfli münasibətlərin təcrübəsi əsasında qurulduğunu bildirib.
Bolqarıstan Prezidenti 2023-cü ilin noyabrında Yəmən sahillərində husilər tərəfindən girov götürülən “Galaxy Leader” gəmisinin kapitan və köməkçi kapitanının azad edilməsi üçün aparılan danışıqlarda iranlı həmkarından dəstək istəyib.
Məsud Pezeşkian Rumen Radevi İrana səfərə dəvət edib.
Bölmənin digər xəbərləri
