Bolqarıstanda Xocalı soyqırımı qurbanlarının xatirəsi anılmışdır
Bakı, 25 fevral (AZƏRTAC). Azərbaycanın Bolqarıstandakı səfirliyindən AZƏRTAC-a bildirmişlər ki, Sofiyada Xocalı soyqırımının 19-cu ildönümü ilə bağlı tədbir keçirilmişdir.
“Xocalıya ədalət” kampaniyası çərçivəsində keçirilmiş tədbirdə ictimai-siyasi xadimlər, dövlət qurumlarının, ölkədə akkreditə olunmuş diplomatik korpusun, beynəlxalq təşkilatların nümayəndələri, KİV təmsilçiləri və tələbələr iştirak etmişlər.
Azərbaycanın Bolqarıstandakı səfiri Emil Kərimov Dağlıq Qarabağ həqiqətləri, erməni təcavüzü və onun ağır nəticələri ilə bağlı danışmış, o cümlədən Ermənistan-Azərbaycan, Dağlıq Qarabağ münaqişəsinə dair BMT Təhlükəsizlik Şurasının, Avropa Şurasının və İKT-nin qətnamələri haqqında ətraflı məlumat vermişdir. Diplomat vurğulamışdır ki, Ermənistan tərəfi hələ də bu sənədlərə məhəl qoymur.
Səfir Xocalı faciəsinin 19-cu ildönümünü soyqırımı cinayətinin qarşısının alınması və cəzalandırılmasına dair konvensiyanın 60 illiyi ilə əlaqələndirmiş və Xocalıda xalqımıza qarşı törədilmiş faciə barədə ətraflı məlumat vermişdir. Bildirilmişdir ki, ulu öndər Heydər Əliyevin qətiyyəti sayəsində 1994-cü ildə Xocalı faciəsinə siyasi-hüquqi qiymət verilmişdir.
E.Kərimov İslam Konfransı Gənclər Forumunun mədəniyyətlərarası dialoq üzrə baş əlaqələndiricisi, Heydər Əliyev Fondunun vitse-prezidenti Leyla xanım Əliyevanın təşəbbüsü ilə irəli sürülmüş “Xocalıya ədalət” kampaniyası çərçivəsində görülən işlərdən danışmış, dünya liderlərinə ünvanlanmış müraciət barədə də məlumat vermişdir.
Tədbirdə Heydər Əliyev Fondunun dəstəyi ilə çəkilmiş “Xocalı soyqırımı” filmi də göstərilmişdir.
Rusiya və MDB Xalqları Dostluq Federasiyasının və “Slavyanlar” Fondunun katibi Beço Yakimov filmə baxdıqdan sonra ermənilərin Xocalıda törətdikləri vəhşilikləri insanlığa qarşı həyata keçirilmiş ən dəhşətli cinayətin olduğunu demişdir. B.Yakimov bu cinayətin təkcə Azərbaycan xalqına deyil, bütün dünya ictimaiyyətinə qarşı törədildiyini qeyd etmiş, faciəyə dünya ictimaiyyəti tərəfindən siyasi-hüquqi qiymət verilməsinin vacibliyini vurğulamışdır.
Dünya İqtisadiyyat İnstitutunun baş eksperti Sevda Stoyanova da Xocalı soyqırımı ilə bağlı danışmış, ermənilər tərəfindən xalqımıza qarşı etnik təmizləmə siyasətinin aparıldığını bildirmişdir.
“Xocalıya ədalət” kampaniyasının Bolqarıstan üzrə milli əlaqələndiricisi Axmed Başev isə kampaniyanın fəaliyyəti haqqında ətraflı məlumat vermişdir.
Tədbirdə “Xocalıya ədalət” rep üslubunda yazılmış mahnının klipi göstərilmiş, iştirakçılara soyqırımı ilə bağlı kitablar, jurnallar, disklər təqdim olunmuşdur.
######
Bölmənin digər xəbərləri
