Bolqarıstanın ətraf mühit və su naziri Azərbaycana gələcək
Bakı,17 noyabr, AZƏRTAC
Bolqarıstan Respublikasının ətraf mühit və su naziri İvelina Vasilevanın rəhbərlik etdiyi nümayəndə heyəti Azərbaycana səfər edəcək.
Səfərin məqsədi ekologiya və təbii sərvətlər naziri Hüseyn Bağırovla ətraf mühit sahəsində gələcək əməkdaşlığa dair məsələlərin müzakirə olunması və noyabrın 18-dən 20-dək Bakı Ekspo Mərkəzində keçiriləcək “Xəzər: ətraf mühit üçün texnologiyalar” 6-cı Beynəlxalq Ətraf Mühit sərgisində nümayiş etdirilən stendlərə, təqdim olunan məhsullara baxış keçirməkdir. Noyabrın 18-də xanım İvelina Vasilevanın başçılıq etdiyi nümayəndə heyəti ekologiya və təbii sərvətlər naziri Hüseyn Bağırovla birgə Fəxri xiyabanda ümummilli Lider Heydər Əliyevin məzarını və Şəhidlər xiyabanını ziyarət edəcək.
Səfər çərçivəsində 2014-cü ildə Azərbaycanın paytaxtında imzalanmış “Azərbaycan Respublikası Hökuməti ilə Bolqarıstan Respublikası Hökuməti arasında ətraf mühitin mühafizəsi sahəsində əməkdaşlıq haqqında Anlaşma Memorandumu”nun həyata keçirilməsi üzrə 2016 və 2017-ci illəri əhatə edən ikiillik proqramın imzalanması gözlənilir.
Bölmənin digər xəbərləri
