Hörmətli xanımlar və cənablarHörmətli mərasim iştirakçıları!

Mən yenidən Bakıya gəlməyimdən və burada iştirak etməyimdən çox şadam. Mən dördüncü dəfədir ki, beynəlxalq neft və qaz sərgisində iştirak edirəm. Bu, həm də mənə Böyük Britaniyanın Azərbaycana olan diqqət və marağını çatdırmaq üçün verilmiş bir fürsətdir.

Bu gün Azərbaycan çox böyük dəyişikliklərə nail olmuşdur. Bu məsələdə mən öz düşündüklərimi sizinlə bölüşmək istəyirəm. Mən həm də Sizin atanızın vəfatı ilə əlaqədar kədərimi bildirmək istəyirəm. Çünki Azərbaycanın və xalqınızın rifahı milli lider Heydər Əliyevin böyük istəyi olmuş və onun əməyi, səyi nəticəsində mühüm irəliləyişlər əldə edilmişdir.

Hazırda dünya bazarında neftin qiymətinin artması prosesi gedir. Eyni zamanda, enerji ehtiyatlarının artırılmasına da böyük ehtiyac vardır. Azərbaycan və Böyük Britaniya bu sahədə öz əlaqələrini və əməkdaşlığı daha da genişləndirmək istəyirlər. Bu baxımdan sərginin təşkilində Azərbaycan və Böyük Britaniya şirkətlərinin işini yüksək qiymətləndirirəm.

Böyük Britaniya şirkətləri burada əsas iştirakçılardan biridir. Neft-qaz layihələrinin həyata keçirilməsində mənim ölkəmin şirkətləri çox böyük rol oynayır. Ölkəmiz hazırda bu sahənin inkişafına ciddi səylər göstərir. Burada Britaniyanın neft, xidmət və podratçı şirkətləri vardır. Onlar öz ehtiyaclarına uyğun olaraq, Azərbaycanın neft və qaz layihələrinin gələcək inkişafına nail olmaq üçün ciddi səy göstərirlər. Eyni zamanda, biz həm də çalışırıq ki, Azərbaycan mühəndislərini, işçilərini yeni biliklər və texnologiyalarla təmin edək. Ümid edirik ki, yaxın gələcəkdə Azərbaycan öz neft və qaz ehtiyatlarını dünya bazarına çıxara biləcəkdir. Bu da Azərbaycan xalqının rifahının yüksəlməsinə geniş imkanlar yaradacaqdır.

Cənab Prezident!

Biz, eyni zamanda, ölkənizin beynəlxalq şəffaflıq təşəbbüsünə qoşulmasını alqışlayırıq. Azərbaycan bu sahədə böyük bir addım atmışdır. Mən qeyd etmək istəyirəm ki, Azərbaycanın bu təşəbbüsə qoşulması neftdən əldə olunan gəlirlərin daha şəffaf idarə olunmasına böyük kömək göstərəcəkdir. Bu, həm də ölkənizdə demokratiyanın inkişafı sahəsində mühüm bir addımdır.

Cənab Prezident, Baş nazir Toni Bleyerin təbrik məktubunda da bir fikir xüsusi vurğulanır ki, Azərbaycan təkcə özünün deyil, eləcə də bütün region dövlətlərinin inkişafında mühüm bir rol oynayır. Biz Azərbaycanın şəffaflıq istiqamətində atdığı addımı yüksək qiymətləndiririk. Mən Azərbaycan Dövlət Neft Fondunun icraçı direktoru Samir Şərifovu da təbrik etmək istəyirəm. Sizin bu addımınız ölkənizdə sülhün və əmin-amanlığın əldə olunmasında böyük imkanlar yaradır. Şəffaflıq sərmayələrin daha da artması üçün əlverişli şərait yaradır və mən çox şadam ki, əksər şirkətlər də bu təşəbbüsü dəstəkləyir. Böyük Britaniya hökuməti qeyri-hökumət təşkilatlarının da bu təşəbbüsü dəstəkləməsini yüksək qiymətləndirir.

Əlbəttə, gələcək inkişafa nail olmaq üçün neft sahəsindən əldə olunan gəlirlərin idarə olunmasında şəffaflıq mühüm rol oynayır. Ona görə də Böyük Britaniya hökuməti energetika sahəsində şəffaflığın təmin olunmasına xüsusi diqqət yetirir. Yalnız istehlakçı ölkələrdə deyil, hasilatçı ölkələrdə də şəffaflığa nail olunmasının böyük əhəmiyyəti vardır. Biz əminik ki, tələbat və istehlak bazarın daha düzgün başa düşülməsində mühüm rol oynayacaqdır.

Mən öz çıxışımı bu fikirlə bitirmək istəyirəm. Azərbaycanda neft və qaz sərgisi keçirilir və son onillik ərzində belə bir imkan yaranmışdır ki, bütün şirkətlər burada görüşərək, fikir mübadiləsi aparsınlar.

Mən hökumətim adından, cənab Toni Bleyerin adından sərginin açılışı münasibətilə bir daha sizi təbrik edir və təşəkkürümü bildirirəm. Ümid edirəm ki, Azərbaycan bu sahədə böyük rol oynamaqla, öz işini davam etdirəcəkdir. Ölkələrimiz arasında əməkdaşlığın daha da inkişafında sizə uğurlar diləyirəm.

X X X

Sonra Yunanıstanın Azərbaycandakı səfiri Merkurios Karafotias ölkəsinin Prezidenti Konstantinos Stefanopulosun, Fransanın respublikamızdakı səfiri xanım Şantal Puare ölkəsinin Baş naziri Jan-Pyer Raffarenin Azərbaycan Prezidenti İlham Əliyevə məktubunu oxudular. Məktubların mətni qəzetin bugünkü nömrəsində dərc olunur.

X X X

Azərbaycan Prezidenti İlham Əliyev açılış mərasimindən sonra sərgiyə baxdı. Dövlətimizin başçısı əvvəlcə ARDNŞ-in ekspozisiyası ilə tanış oldu. Burada “Əsrin müqaviləsi”nin imzalanması, “Çıraq” yatağından ilk neftin alınması, ümummilli liderimiz Heydər Əliyevin “Dədə Qorqud” platformasında olması, “Şahdəniz” layihəsi ilə bağlı görülən işlər barədə şəkillər, Azərbaycan Dövlət Neft Şirkətinin nəşri olan yeni kitab da nümayiş etdirilir. Şirkətin vitse-prezidenti Xoşbəxt Yusifzadə son on ildə əldə olunan nəticələr barədə danışaraq dedi ki, 1997-ci ildə Azərbaycanda neft hasilatı cəmi 9 milyon ton idi. İndi 15 milyon tona çatmışdır. 2003-cü ildə mənfəət neftimiz 4 milyon 94 ton idi, bu il isə 5 milyon 494 ton olacaqdır. Eyni zamanda, Neft Fonduna gələn gəlirlər 2003-ci ildə 908 milyon dollar idisə, indi 1 milyard 138 milyon dollar olubdur.

Ölkə Prezidentinə Xəzərin Azərbaycan sektorundakı yataqların və neft boru kəmərlərinin təsvir olunduğu maket nümayiş etdirildi və bildirildi ki, hazırda Bakı-Tbilisi-Ceyhan neft boru kəmərinin Azərbaycan ərazisinin 452 kilometrindən təqribən 200 kilometrinə boru düzülmüş, onun 155 kilometrinin üstü örtülmüşdür. Gürcüstan ərazisində kəmərin 90 kilometrinin, Türkiyədə isə 200 kilometrinin üstü örtülmüşdür. Eyni zamanda, Bakı-Tbilisi-Ərzurum qaz kəmərinin çəkilişi, Bakı-Novorossiysk, Bakı-Supsa kəmərləri və qoyulan yeni nasoslar barədə də söhbət açıldı.

Azərbaycan Prezidentinə ARDNŞ-in yaratdığı AZLAB qapalı tipli səhmdar cəmiyyəti barədə məlumat verildi. Bildirildi ki, 1996-cı ildə Azərbaycan Prezidenti Heydər Əliyev Norveçdə səfərdə olarkən ona laboratoriya bağışlanmışdı. Həmin laboratoriyanın əsasında bu cəmiyyət yaranmışdır. AZLAB təkcə Azərbaycanda yox, Xəzər regionunda nüfuzlu elmi tədqiqat mərkəzinə çevrilmişdir. Bu gün onun sifarişçiləri Qazaxıstan və Türkmənistandır. AZLAB Özbəkistanda da bir müsabiqədə qalib gəlmişdir. ARDNŞ-in vitse-prezidenti dedi ki, Azərbaycanda fəaliyyət göstərən xarici neft şirkətləri ilə müqavilələr əsasında 750 min dollara alınmış xüsusi laboratoriyada quraşdırılan avadanlıq hesabına işlər görürük. Biz lazımi işlər barədə dəqiq məlumat verərək və kəşfiyyat quyularının qazılmasına xərclənəcək vəsaitə qənaət edərək, Azərbaycana milyonlarla dollar fayda vermiş oluruq. Bütün bu avadanlığı AZLAB öz hesabına quraşdırmışdır.

Prezident İlham Əliyev Dövlət Neft Şirkətinin tabeliyində olan istehsalat birliklərinin, emal zavodlarının, eləcə də “Barmek” şirkətinin, “Azəriqaz” Səhmdar Cəmiyyətinin və digər yerli müəssisələrin son nailiyyətləri ilə, tikilən yeni platformalarla, Abşeron Magistral Qaz Kəmərləri Şəbəkəsi, dənizin ekologiyasını yaxşılaşdırmaq üçün görülən tədbirlərlə tanış oldu.

Sonra ABƏŞ-in başçısı, bp şirkətinin Bakı nümayəndəliyinin rəhbəri Devid Vudvord Prezident İlham Əliyevə “Azəri”, “Çıraq”, “Günəşli” yataqlarında görülən işlər barədə məlumat verdi, ilk neftin 2005-ci ildə hasil edilməsi üçün tikinti işlərinin cədvələ uyğun davam etdiyini bildirdi. Faza-1, Faza-2, Faza-3 layihələri, Səngəçal terminalında görülən işlərin gedişindən də danışıldı və bildirildi ki, bu işlərə Azərbaycanın 3500 nəfərdən çox vətəndaşı cəlb olunmuşdur.

Prezident İlham Əliyev Bakı-Tbilisi-Ceyhan neft kəmərinin Azərbaycan, Gürcüstan və Türkiyə ərazisində tikintisinin gedişinə dair videofilmə də baxdı.

“Ekson/Mobil”, “Total””, “Yupek”, “Statoyl”, ”İtoçu”, “Siemens”, “Türkiyə Petrolları Anonim Ortaqlığı” və bir çox başqa şirkətlərin, Amerikanın Azərbaycandakı Ticarət Palatasının ekspozisiyalarına baxış zamanı Azərbaycan Prezidentinə onların birgə layihələrdə iştirakı haqqında məlumat verildi.

Sərgi ilə tanışlıq zamanı dövlətimizin başçısına xatirə hədiyyələri təqdim olundu.

Azərbaycan Prezidenti İlham Əliyev beynəlxalq sərgi-konfransın xatirə kitabını imzaladı.

X X X

“Xəzər neft, qaz, neftayırma və neft kimyası – 2004” beynəlxalq sərgi və konfransın açılış mərasimində Milli Məclisin sədri Murtuz Ələsgərov, Prezident Administrasiyasının rəhbəri Ramiz Mehdiyev, Baş nazirin müavinləri Abid Şərifov, Yaqub Eyyubov, Milli Məclisin deputatları, ARDNŞ-in prezidenti Natiq Əliyev, nazirliklərin, komitələrin, konsernlərin rəhbərləri, xarici ölkələrin Bakıdakı səfirləri və digər rəsmi şəxslər iştirak edirdilər.