DÜNYA
Böyük Britaniyada avtomobil istehsalı kəskin azalıb
London, 30 yanvar, AZƏRTAC
Böyük Britaniyada avtomobil istehsalı 1950-ci illərdən bəri ən aşağı səviyyəyə düşüb.
AZƏRTAC “The Telegraph”a istinadla xəbər verir ki, bu barədə Böyük Britaniya Avtomobil İstehsalçıları və Tacirləri Cəmiyyəti (SMMT) məlumat verib.
Bildirilib ki, ötən il ölkədə cəmi 779 min 584 avtomobil istehsal edilib. Bu, COVID-19 pandemiyası dövrü istisna olmaqla, 1954-cü ildən bəri ən aşağı göstəricidir.
Sənaye qurumu istehsalın daha da zəifləyəcəyini proqnozlaşdırıb və 2025-ci ildə istehsal ediləcək avtomobil sayının cəmi 775 min olacağını bildirib. Müqayisə üçün, 2019-cu ildə Böyük Britaniyada 1,3 milyon avtomobil istehsal olunmuşdu.
İstehsalın azalmasının əsas səbəblərindən biri Avropada tələbin zəifləməsi, xüsusilə sürücülərin elektrik avtomobillərə marağının azalmasıdır. Sürücülər yüksək qiymətlər və bu texnologiyanın etibarlılığı ilə bağlı narahatlıqlar səbəbindən elektrikli nəqliyyat vasitələrindən uzaq dururlar. Elektrik avtomobillərin satışındakı geriləmə, eyni zamanda benzin və dizel mühərriklərindən imtina tendensiyası avtomobil zavodlarına ciddi təzyiq yaradır. Bu böhran nəticəsində “Vauxhall” şirkəti ötən il Luton şəhərindəki mikroavtobus istehsal edən zavodunu bağlayıb. Şirkət net-zero qaydalarını tənqid edərək istehsalçılara benzinlə işləyən avtomobillərin satışını məhdudlaşdırmağı məcbur edən siyasətlərin sektora mənfi təsir etdiyini bildirib.
Böyük Britaniya hökuməti yaranmış vəziyyətlə bağlı sıfır emissiyalı nəqliyyat vasitələri (ZEV) mandatı üçün ictimai məsləhətləşməyə start verib. Bu proses net-zero hədəflərinin yumşaldılması üçün zəmin yarada bilər.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
