BRAF-ın toplantısı qarşılıqlı əməkdaşlığın genişləndirilməsi baxımından mühüm əhəmiyyət daşıyır VİDEO
Bakı, 15 aprel, AZƏRTAC
Audiovizual Şura bir çox regional və beynəlxalq platformalarda ölkəmizi layiqincə təmsil edir. Bu platformalarda audiovizual media sahəsindəki yeniliklər, əməkdaşlıq və dialoq məsələləri müzakirə olunur. Bugünkü tədbirdə də audiovizual media sahəsində baş verən yeniliklər, mövcud çətinliklər, əməkdaşlıq və dialoq imkanları ətrafında fikir mübadiləsi aparıldı. Eyni zamanda, tədbirin əsas mövzusu olan media xidmətlərində uşaq hüquqlarının qorunması məsələsi geniş şəkildə müzakirə edildi.
AZƏRTAC xəbər verir ki, bu fikirləri jurnalistlərə açıqlamasında Audiovizual Şuranın Kommunikasiya sektorunun müdiri Taleh Quliyev səsləndirib.
O bildirib ki, tədbir çərçivəsində bu mövzu ilə bağlı təqdimatlar və hesabatlar dinlənilib. Qeyd edib ki, Audiovizual Şura artıq iki ildir Qara Dəniz Yayım Tənzimləyici Qurumlarının Forumuna (BRAF) sədrlik edir. Bu gün keçirilən tədbirdə BRAF-ın növbəti sədrliyinə dair məsələlər də müzakirə olunacaq.
Tədbir çərçivəsində iki panel sessiyanın təşkilinin nəzərdə tutulduğunu deyən Taleh Quliyev qeyd edib: “Bu sessiyalardan biri tədbirin əsas mövzusuna uyğun olaraq uşaqların sosial mediada hüquqlarının qorunması və bu istiqamətdə media savadlılığının artırılması məsələlərinə həsr olunacaq. Digər panel isə bu mövzu üzrə hüquqi tənzimləmə mexanizmlərini əhatə edəcək. Hər iki sessiyada regional, beynəlxalq və yerli ekspertlərin çıxışları planlaşdırılıb. Bugünkü tədbirdə doqquz ölkədən otuzdan çox nümayəndə, o cümlədən rəhbər şəxslər iştirak edib”.
O, həmçinin bildirib ki, bu cür tədbirlər audiovizual media sahəsində beynəlxalq təcrübənin öyrənilməsi və qarşılıqlı əməkdaşlığın genişləndirilməsi baxımından mühüm əhəmiyyət daşıyır.
Bölmənin digər xəbərləri
