Braziliya koronavirusa yoluxanların sayına görə yenidən ikinci pilləyə yüksəlib
Bakı, 13 mart, AZƏRTAC
Braziliya dünyada koronavirusa yoluxma hallarının sayına görə Hindistanı qabaqlayaraq, yenidən ABŞ-dan sonra ikinci pilləyə yüksəlib.
AZƏRTAC pandemiyanın statistikasını aparan Worldometer saytına istinadla xəbər verir ki, ötən sutka ərzində Braziliyada 84 mindən çox insan COVID-19 infeksiyasına yoluxub və yoluxanların ümumi sayı 11 milyon 368 min 316 nəfərə çatıb.
Həmçinin martın 12-də ölkədə koronavirus səbəbindən ölənlərin sayı 2 min 152 nəfər artıb və ümumilikdə 275 min 376 nəfər təşkil edib. Gündəlik ölüm hallarının sayı artıq üçüncü gündür ki, iki minin üzərindədir. Braziliya bu göstəriciyə görə də yalnız Birləşmiş Ştatlardan geri qalır.
Eyni zamanda Braziliyada xəstəlikdən sağalanların sayı 10 milyonu ötüb, 1 milyon 92 min aktiv xəstədən 8 min 318-nin vəziyyəti ağırdır. Ölkədə hər 100 min insana 5 min 407 yoluxma və 131 ölüm faktı düşür.
Braziliya Səhiyyə Nazirliyi nəzdində fəaliyyət göstərən Osvaldo Kruz adına Elmi-Tədqiqat Birliyi mart ayının əvvəlində bütün ölkə ərazisində epidemioloji vəziyyətin kəskin pisləşdiyini bildirib. Onların məlumatına görə, dünyada koronavirus infeksiyasından ölüm hallarının 10 faizdən çoxu Braziliyada qeydə alınır.
Bölmənin digər xəbərləri
