DÜNYA
Braziliya Prezidenti G20-nin fəaliyyətinin siyasiləşdirilməsinin əleyhinə çıxış edib
Bakı, 10 sentyabr, AZƏRTAC
Geosiyasi ziddiyyətlər və problemlər İyirmilik Qrupunun (G20) işinə mane olmaq üçün bəhanə kimi istifadə edilməməlidir.
AZƏRTAC xəbər verir ki, bu fikri Braziliya Prezidenti Luiz İnasio Lula da Silva Yeni Dehlidə G20 sammitinin bağlanış mərasimində çıxış edərkən bildirib.
"Biz geosiyasi problemlərin G20-nin müxtəlif səlahiyyətli orqanlarının gündəmini əvəz etməsinə icazə verə bilmərik. Biz G20-nin bölünməsində maraqlı deyilik. Yalnız birgə fəaliyyətlə günümüzün çağırışlarına cavab verə bilərik", - deyə o qeyd edib.
Yeni Dehlidə keçirilən G20 sammiti bu gün başa çatır. Liderlər bir sıra məsələlər, ilk növbədə Ukrayna münaqişəsi üzrə fikir ayrılıqlarına baxmayaraq, birgə bəyannamə üzərində razılığa gəliblər. Eyni zamanda, ilin sonuna qədər Hindistanda G20-nin daha bir neçə tədbiri keçiriləcək. Dekabrın 1-dən qrupa sədrlik Braziliyaya keçəcək.