Britaniyada bir il ərzində 2 mindən çox uşaq itib
London, 25 noyabr, AZƏRTAC
Böyük Britaniyada sosial xidmət orqanlarının himayəsində olan həssas kateqoriyalı uşaqların itmə halları ciddi təhlükəsizlik boşluqlarını üzə çıxarıb.
AZƏRTAC “The Independent”ə istinadla xəbər verir ki, ötən il təkcə yerli idarələrin qayğısında olan təxminən 2 min 400 uşaq, o cümlədən insan alverinə məruz qalan və ya ölkəyə tək gələn sığınacaq axtaran uşaqlar itib. Məlumatlar onların itkin düşdüyü müddətdə cinsi və ya kriminal istismara məruz qalma riskinin xüsusilə yüksək olduğunu göstərir. Xeyriyyə qurumları bu statistikanı sistemdə geniş yayılmış problemlərin göstəricisi kimi qiymətləndirir.
Hesabat uşaqların itməsi ilə bağlı ölkə üzrə məlumatların toplanması üçün sosial xidmət idarələrinə göndərilən informasiya sorğuları əsasında hazırlanıb. Bu tapıntılar hər il itkin düşən 70 min uşağa əlavə dəstək göstərilməsi məqsədilə 165 min funt sterlinq toplamağı hədəfləyən “SafeCall” kampaniyasına paralel olaraq dərc edilib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
