Britaniyada on minlərlə alıcının şəxsi məlumatları kiber hücumla oğurlanıb
London, 14 may, AZƏRTAC
Böyük Britaniyanın tanınmış pərakəndə satış şəbəkəsi “Marks & Spencer” (M&S) üç həftə əvvəl baş vermiş kiberhücum nəticəsində bəzi şəxsi müştəri məlumatlarının oğurlandığını açıqlayıb.
AZƏRTAC “BBC”yə istinadla xəbər verir ki, şirkətdən verilən açıqlamada oğurlanan məlumatlara telefon nömrələri, ev ünvanları, doğum tarixləri və onlayn sifariş tarixçələrinin daxil ola biləcəyi qeyd edilib. “M&S” bildirib ki, oğurluq ödəniş məlumatlarını, kart məlumatlarını və ya hesab parollarını əhatə etmir.
Üç həftə əvvəl baş verən kiberhücumdan sonra şirkət hələ də onlayn xidmətlərini tam bərpa edə bilməyib və onlayn sifarişlər müvəqqəti olaraq dayandırılıb. “Bank of America Global Research”in təhlilinə görə, bu fasilələr şirkətə hər həftə təxminən 43 milyon funt sterlinq zərərlə başa gəlir.
Şirkət oğurlanan məlumatların neçə nəfərə aid olduğunu açıqlamasa da, bütün vebsayt istifadəçilərinə məlumat göndərildiyini, məsələ ilə bağlı aidiyyəti orqanlara məlumat verildiyini və kibertəhlükəsizlik üzrə mütəxəssislərlə birlikdə vəziyyəti izlədiklərini bildirib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
