Brodveydə “Opera kabusu” müziklinin nümayişi 35 ildən sonra dayandırılıb
Bakı, 17 aprel, AZƏRTAC
Brodveydəki “Macestik” teatrında Endrü Lloyd Uebberin “Opera kabusu” müziklinin sonuncu dəfə nümayişi keçirilib. Brodvey tarixində ən uzunömürlü quruluşlardan birinin ilk dəfə səhnədə göstərildiyi vaxtdan 35 il sonra nümayişi dayandırılıb.
AZƏRTAC “Associated Press” agentliyinə istinadla xəbər verir ki, nümayişdə tamaşanın quruluşçusu Endrü Lloyd Uebber, Kristina rolunun ilk ifaçısı - müğənni Sara Braytman, eləcə də bu tamaşada və onun əsasında çəkilən filmdə yer alan aktyorlar iştirak ediblər. Finalda hazırkı aktyor heyəti və müziklin əvvəlki iştirakçıları “Gecənin musiqisi”ni səsləndiriblər.
Bu, “Macestik” teatrında “Opera kabusu” tarixində 13981-ci nümayiş idi. İlk dəfə Londonda nümayiş etdirildiyi 1986-cı ildən bəri müziklə dünyanın 183 ölkəsində 145 milyondan çox insan tamaşa edib. Tamaşa Brodveydə 1,3 milyard dollar gəlir gətirib.
“Opera kabusu”nun nümayişinin dayandırılmasının səbəbi bilet satışından əldə olunan gəlirin azalmasıdır ki, bu da tamaşanın nümayişinə qoyulan xərclərin əvəzini vermir. Müziklin prodüseri Kameron Makintoş tamaşanın gələcəkdə səhnəyə qayıdacağını istisna etmir.
Bölmənin digər xəbərləri
