Brüsseldə Ermənistan Azərbaycanın ərazi bütövlüyünü bir daha təsdiqləyərək, Qarabağ "sevdası”ndan əl çəkməli oldu
Bakı, 15 may, AZƏRTAC
Brüssel görüşü Azərbaycanın siyasi iradəsini tam ifadə edir və gəlinən nəticələr, əslində, Azərbaycanın iki il yarımdır bəyan etdiyi mövqeyin bir qisminin təkrarlanması, yaxud etiraf olunmasından ibarətdir. Bu mənada, Şarl Mişelin də, Azərbaycan XİN-in də ifadə etdiyi kimi, görüş faydalı və nəticəyönümlü sayılmalıdır. Azərbaycan qalib tərəf olmasına baxmayaraq, Prezident İlham Əliyev böyük qətiyyət nümayiş etdirərək Zəfərdən dərhal sonra Ermənistan-Azərbaycan münasibətlərinin normallaşmasına yönəlik səylər göstərir. Dövlətimizin başçısının bu məqsədlə irəli sürdüyü təkliflər beynəlxalq hüququn prinsiplərini ehtiva etsə və Ermənistan prinsipcə bu təklifləri qəbul etdiyini bildirsə də, bu günə qədər ortada real nəticələr yoxdur. Təbii ki, Azərbaycan İrəvanı daha 30 il gözləyə bilməz və təsadüfi deyil ki, Prezident İlham Əliyev 2023-cü ili sülh üçün son fürsət kimi dəyərləndirib. Ermənistan isə əksinə, daha çox sülhü pozmaq taktikası seçib və hətta şərti sərhədlərdə erməni təxribatları nəticəsində toqquşmalar adi hala çevrilib. Belə bir şəraitdə Brüsseldə Cənubi Qafqazda sülhün bərqərar olmasına hazırlığın ifadə edilməsi özlüyündə pozitiv mühit yaradır. Müzakirələrdə Azərbaycanın tələbi üzrə sərhədlərin delimitasiyası ilə bağlı növbəti addımların nəzərdən keçirilməsi fonunda müəyyən irəliləyişlərin əldə olunmasını da məhz Bakının nail olduğu bu müsbət mühitin nəticəsi hesab etmək mümkündür.
Bunu AZƏRTAC-a açıqlamasında Milli Məclisin deputatı Bəhruz Məhərrəmov deyib.
Deputat bildirib ki, Brüssel görüşünün digər mühüm məqamı, ərazi bütövlüyü prinsipi üzrə bir daha gəlinən razılıqla Ermənistanın təcavüzkar niyyətlərinin üzərindən bir daha xətt çəkilməsi olub. Şarl Mişelin yaydığı bəyanatda da ifadə olunduğu kimi, tərəflər 1991-ci il “Alma-Ata Bəyannaməsi”nə, Ermənistanın və Azərbaycanın müvafiq ərazi bütövlüyünə qeyd-şərtsiz sadiq olduqlarını bir daha təsdiq ediblər. Ötən ilin oktyabrında Praqa və Soçi görüşlərində də “Alma-Ata Bəyannaməsi”nə müvafiq olaraq eyni qənaətə gəlinib. Lakin Fransanın pozuculuq fəaliyyəti və İrəvanın da arzusu ilə proses qeyri-müəyyən vəziyyətdə donub. Amma Prezident İlham Əliyevin qətiyyətli addımları ilə İrəvan nəinki oyuna qayıtmaq məcburiyyətində qalıb, əksinə, Azərbaycanın ərazi bütövlüyünü daha detallı formada etiraf edərək Qarabağ "sevdası”ndan əl çəkməli olub.
B.Məhərrəmov vurğulayıb ki, Fransaya gəlincə, Brüssel prosesinin ən diqqətçəkən məqamlarından biri məhz rəsmi Parisin çoxsaylı cəhdlərinə baxmayaraq, prosesin dağılmaması fonunda Bakının onu növbəti dəfə nokauta salmasıdır. Paris nəinki Brüssel prosesini dağıda bilmədi, əksinə, Prezident İlham Əliyev dünyaya göstərdi ki, Fransanı oyundan kənarda saxlamaq iqtidarındayıq. Üstəlik, Azərbaycan və Ermənistan rəhbərləri iyulda Brüsseldə, habelə 2-ci “Avropa siyasi birliyi” Zirvə Toplantısı çərçivəsində Fransa Prezidenti Makron və Almaniya Kansleri Şoltsun iştirakı ilə Kişineuda, oktyabrda isə Qranadada keçiriləcək üçüncü sammit çərçivəsində yenidən görüşəcəklər. Yəni, Bakı faktiki olaraq bütün kənar təsirləri zərərsizləşdirərək prosesi həyata keçirməklə real imkanlarını göstərib, Fransa isə özünün təcavüzkar ideyaları, separatizmə dəstəyi və proksi müharibə cəhdləri ilə pat vəziyyətində qalıb. Digər tərəfdən Avropa İttifaqı Şurasının Prezidenti Şarl Mişel mətbuata açıqlamasında da Azərbaycanın Qarabağ iqtisadi rayonunu bizim mövqeyimizə uyğun formada - keçmiş "Dağlıq Qarabağ Muxtar Vilayəti” formasında ifadə etməklə vəziyyətin Bakının beynəlxalq hüququ ehtiva edən mövqeyinə uyğun irəlilədiyini göstərib. Açıqlamada, həmçinin Qarabağda yaşayan ermənilərin hüquqları və təhlükəsizliyi məsələsindən bağlı ayrıca bəhs olunması, həmin əhalinin hüquqlarının, təhlükəsizliyinin təmin edilməsi ilə bağlı məhz yalnız Azərbaycanın subyektiv tərəf kimi tanınması bu məsələlərin Bakının daxili işi olması barədə mövqeyinin artıq sual yaratmadığını göstərir. Bu, çox ciddi məsələdir və Azərbaycan Prezidentinin müstəsna qələbəsidir.
“Görüşün digər vacib məqamı Azərbaycanın kommunikasiyaların açılmasına dair təklifinin realizəsi üzrə ciddi irəliləyişlə bağlıdır. Şarl Mişelin bəyanatından da aydın olur ki, Zəngəzur dəhlizinin açılması işi ilə bağlı faktiki əngəl qalmır və işin dəstəklənməsi üçün prosesə Ümumdünya Gömrük Təşkilatı cəlb ediləcək. Bu, əlbəttə, Ermənistanın ənənəvi yayınmalarının qarşısının alınmasında əhəmiyyətli rol oynayacaq. Bütün görüşlərdə olduğu kimi, bu dəfə də humanitar məsələlər Prezident İlham Əliyevin əsas tezislərindən olub və Ş.Mişelin ifadə etdiyi kimi, yaxın həftələrdə ciddi nəticələr gözlənilir. Ən əsası, azaraq sərhədi keçən hərbi qulluqçular bundan sonra da sürətləndirilmiş əsaslarla azad olunacaqlar”, - deyə Milli Məclisin deputatı vurğulayıb.
Deputat qeyd edib ki, Azərbaycan ən qısa müddətdə sülh arzu edir. Lakin Bakı üçün vədlər yox, praktiki gedişlər maraqlıdır. Bu mənada, ermənilərin zamanı məhduddur və onlar yaxın dövrdə Brüsseldə gəlinən razılıqlara əməl olunması ilə “dəmir yumruq” arasında sadə seçim etməli olacaqlar.
Bölmənin digər xəbərləri
