CƏBRAYIL RAYONUNDAN OLAN MƏCBURİ KÖÇKÜNLƏR ÜÇÜN SALINMIŞ YENİ QƏSƏBƏLƏRDƏ 1858 AİLƏ MƏSKUNLAŞMIŞDIR
Azərbaycan Prezidenti İlham Əliyev daha sonra məcburi köçkünlər üçün salınmış qəsəbə ilə tanış oldu.
Dövlətimizin başçısına məlumat verildi ki, Cəbrayıl rayonundan olan məcburi köçkünlər üçün salınmış beş qəsəbədə 1858 ailə məskunlaşmışdır. Müasir standartlara uyğun qəsəbələrin hamısı lazımi infrastrukturla təmin edilmişdir. Qəsəbələrdə, ümumilikdə, 1800 yerlik 5 məktəb, 250 yerlik 5 uşaq bağçası, 5 inzibati bina, 5 poçt şöbəsi, 5 kənd həkim ambulatoriyası, 5 klub-idman mərkəzi, 1 baytarlıq məntəqəsi, 2 yanğınsöndürmə deposu vardır. 110 kilovoltluq yardımçı elektrik stansiyası tikilmişdir.
Prezident İlham Əliyev qəsəbədəki İskəndər Tahirov adına 7 nömrəli Mehdili kənd orta məktəbinin həyətində uşaqların nümunəvi idman çıxışlarına baxdı.
Məcburi köçkünlər doğma yurdlarından didərgin düşsələr də, adət-ənənələrini qoruyub yaşadırlar. Cəbrayıllıların el sənəti nümunələrinin nümayişi də bu baxımdan maraq doğurdu.
Böyük Mərcanlı kənd uşaq incəsənət məktəbi şagirdlərinin çıxışı da xoş təsir bağışladı.
Daha sonra ikimərtəbəli məktəb binası ilə tanış olan Prezidentə məlumat verildi ki, 360 yerlik təhsil ocağında hazırda 264 şagird oxuyur. Onların təlim-tərbiyəsi ilə 40 müəllim məşğul olur.
Məktəbin foyesindəki lövhələrdə ulu öndər Heydər Əliyevin və Prezident İlham Əliyevin fəaliyyətini əks etdirən fotoşəkillər, habelə Cəbrayıl rayonundan olan şəhidlərin şəkilləri vurulmuşdur.
Dövlətimizin başçısı məktəbin idman salonunda qoyulmuş fotostendlərə də baxdı. Burada ümummilli lider Heydər Əliyev və Prezident İlham Əliyevin müxtəlif vaxtlarda məcburi köçkünlərlə görüşləri zamanı çəkilən şəkillər var. Cəbrayıl rayonunun işğaldan əvvəlki vəziyyətini, məcburi köçkünlərin çadır şəhərciklərindəki çətin həyat tərzini və yeni salınan qəsəbələri əks etdirən fotostendlər də maraq doğurdu.
Daha sonra Prezident İlham Əliyev Cəbrayıl rayonunun tarixini əks etdirən muzey eksponatlarına baxdı. Burada müxtəlif vaxtlara aid geyimlər, qılınclar, kəmərlər və məişət əşyaları toplanmışdır.
Məcburi köçkün KAMILXAN RÜSTƏMOVA dövlətimizin başçısına müraciətlə dedi:
-O vaxt Siz bizimlə görüşə gələndə axırıncı çıxış edən mən oldum. Üzümü Sizə çevirib dedim - “biz cəbrayıllılar Sizə səs verəcəyik!”. İlk xeyir-duanı biz verdik. Yenə də qabaqdan seçkilər gəlir. Mən Sizi əmin edirəm, bütün Cəbrayıl camaatı Sizi dəstəkləyir. Ulu öndərə Allah min rəhmət eləsin! Siz də verdiyiniz vədə əməl etdiniz. Bir dənə də çadır düşərgəsi qalmadı. Çadırdan çıxıb belə qəşəng evdə yaşayırıq. Biz necə hökumətimizə sadiq olmaya bilərik? Biz Sizə sadiq adamlarıq, Sizinlə sıx, birlikdəyik. İcazə verin, 1968-ci ildə mən pambıqçı işləyirdim. Onda qış aylarında bu xalını toxumuşam. Bilirəm, çox ölkə gəzmisiniz, çox yer görmüsünüz, çox xalılar-xalçalar görmüsünüz. Mən zəhmətimin bəhrəsi olan bu kiçik hədiyyəni Sizə təqdim edirəm.
İLHAM ƏLİYEV: Çox sağ olun, təşəkkür edirəm sizə.
X X X
Məktəblə tanışlıq zamanı dövlətimizin başçısı ingilis dili dərsində də oldu. Şagirdlər onu böyük sevinclə qarşıladılar, dövlətimizin başçısına həsr olunmuş şeir söylədilər.
Prezident İlham Əliyev şagirdlərlə söhbət edərək dedi ki, məcburi köçkünlər üçün birinci qəsəbə də və sonuncu qəsəbə də Biləsuvarda tikilmişdir. 4 il ərzində bütün çadır şəhərcikləri ləğv edilmişdir. Siz çadır şəhərciyində doğulmusunuz. Ağır, çətin şəraitdə yaşamısınız. Ancaq indi o çadır şəhərcikləri yoxdur. Yeni evlər var, məktəblər var, bütün şərait var. Burada gərək yaxşı oxuyasınız, gələcəkdə yaxşı mütəxəssislər olasınız, doğma ölkənizə dayaq olasınız və Cəbrayıl rayonu işğaldan azad olunandan sonra öz rayonunuzun inkişafında fəal iştirak edəsiniz. Sizə uğurlar arzulayıram, sağ olun.
Məktəbdə kompyuter otağı da var, buradakı kompyuterlərin hamısı internetə qoşulubdur. Tarix, Azərbaycan dili və ədəbiyyatı, hərbi və digər fənn otaqları, zəngin kitabxana var. Məktəb bütün lazımi avadanlıq və istilik sistemi ilə təchiz olunmuşdur.
QƏSƏBƏ SAKİNİ (kişi): Bütün bunlar Sizin əməyinizin bəhrəsidir. Çox-çox təşəkkür edirik.
İLHAM ƏLİYEV: Əminəm ki, burada yaxşı yaşayacaqsınız.
QƏSƏBƏ SAKİNİ: Biz Cəbrayıl camaatı həmişə Sizi dəstəkləyirik, həmişə Sizinlə birlikdəyik. Üzümüzə gələn seçkilərdə də Sizin alternativiniz yoxdur. Bizim bir Prezidentimiz var, ona da səs verəcəyik. Bu şəraitə, bu binalara, bu məktəbə görə çox sağ olun. Ümumiyyətlə, respublikamızın həyatında gürdüyünüz qlobal işlərə görə Sizə dərin minnətdarlığımızı bildiririk.
İLHAM ƏLİYEV: Sağ olun, beş il bundan əvvəl mən birinci qəsəbənin açılşına gəlmişdim. Ulu öndər Heydər Əliyevin göstərişi ilə o vaxt Neft Fondundan ilk vəsait qəsəbənin tikilməsinə xərclənmişdi. 2003-cü ilin oktyabr ayında mən onun açılışını etdim. O vaxt mən dedim ki, Azərbaycanda bir dənə də çadır şəhərciyi qalmamalıdır. Siz çadırlarda çox, 15 il ağır, çətin şəraitdə yaşamısınız. Amma indi çadır şəhərcikləri yoxdur, hamısını yığışdırmışıq. Onların əvəzinə gözəl binalar tikilib, qəsəbələr, demək olar ki, şəhərlər tikilibdir. İnsanlar burada müvəqqəti, torpaqlarımız azad olunana qədər yaşayacaqlar. O gün də uzaqda deyil, biz öz fəaliyyətimizlə o günü yaxınlaşdırırıq.
QƏSƏBƏ SAKİNİ: Cənab Prezident, Sizin fəaliyyətinizə böyük ümidimiz var.
İLHAM ƏLİYEV: Haqq-ədalət bərpa edilməlidir. Beynəlxalq hüquq normaları bərpa olunmalıdır. Ədalətsizlik aradan qaldırılmalıdır. Bunu biz, özümüz etməliyik və edəcəyik.
QƏSƏBƏ SAKİNİ: Yoldaş İlham Əliyev, Siz Prezident seçiləndən bir çox nailiyyətlər əldə etmisiniz. Amma ən başlıcası çadır şəhərciklərinin ləğv olunmasıdır. Cəbrayıl sakinlərinin bu qəsəbədə yerləşdirilməsi Sizin müvəffəqiyyətlərinizdən ən birincisidir. Bu qəsəbənin sakinləri adından Sizə öz minnətdarlığımızı bildirik. Çadır şəhərciklərində çox çətin vəziyyətdə yaşamışıq. Bizim balalarımız dizi üstə quru yerdə oturub yazı yazıblar. Amma Sizin sayənizdə bu cür məktəb, belə bir gözəl şəhərcik tikildi. Biz Sizinlə, Mehriban Əliyeva ilə fəxr edirik. İşinizin nəticəsini görəndə hamımız ürəkdən qürur duyuruq. Siz Azərbaycanın quruculuğunda iki tərəfdən iştirak edirsiniz. Sizin bu zəhmətinizə görə bütün cəbrayıllılar dərindən minnətdarlığını bildirirlər. Siz əvəzedilməzsiniz. Arzu edirik ki, gələn görüşləri Cəbrayıl rayonunda keçirək və Sizə orada minnətdarlığımızı bildirək.
İLHAM ƏLİYEV: Çox sağ olun.
QƏSƏBƏ SAKİNİ (ağbirçək): Xoş gəlmisiniz, gələn ayaqlarınız var olsun! O gün olsun ki, bu qəsəbəni, məsələn, kimsəsizlərə, əlacsızlara verək, biz öz rayonumuza gedək. Mən istəyirəm ki, dünya durduqca yaşayasınız. Sizin işiniz göz qabağındadır. Kiçik Heydər Əliyev də Sizin yolunuzu davam etdirsin.
İLHAM ƏLİYEV: Çox sağ olun, biz mütləq, mütləq Cəbrayılda belə gözəl binaları tikəcəyik. Son müddət ərzində salınan qəsəbələrin timsalında biz görürük ki, Azərbaycan dövləti hər şeyə qadirdir. Cəmi dörd il ərzində 56 qəsəbə tikilibdir. Demək olar ki, 56 böyük kənd, yəni bir neçə şəhər tikilibdir. Biz işğaldan azad olunacaq bütün torpaqlara qayıdandan sonra orada da belə gözəl məktəblər, binalar tikəcəyik, yollar, işıq, su, qaz, - hər şey olacaqdır. Bilirsiniz ki, indi o torpaqlarda hər şey dağıdılıb, erməni qəsbkarları hər şeyi dağıdıblar. Orada bir dənə də salamat bina qalmayıbdır. Biz hər şeyi yenidən yaratmalıyıq və bunu edəcəyik. Bizim indi buna gücümüz çatır və işğal olunacaq bütün əraziləri bərpa edəcəyik. Son illər ərzində həm Biləsuvarda, Füzulidə, Ağdamda, həm də başqa yerlərdə nə qədər böyük işlər görülübdür. Amma növbəti illərdə Dövlət proqramına ediləcək əlavələr hesabına 300 mindən artıq köçkün soydaşımız yaxşı şəraitlə təmin ediləcək və biz bu ağır sosial problemin, demək olar ki, həllinə nail olacağıq.
Sosial problem həll ediləcək, amma əsas problem hələ ki, qalır. Amma biz onu da həll edəcəyik və ondan sonra, xalanın dediyi kimi, bu binalar veriləcək - kim istəyər, gəlib yaşayar. Onsuz da, Azərbaycan əhalisinin sayı artır. Hazır evlərdir, hər şey var, gözəl infrastruktur var, hazır şəhərçikdir. Hələliksə burada xoşbəxt yaşayın və bilin ki, mən həmişə sizinləyəm. Mən bu vəzifəyə sizə xidmət etmək üçün gəlmişəm. Sağ olun.
######
 |
 |
 |
 |
Bölmənin digər xəbərləri
